Cinayətkarlar isə lazımi cəzalarına çatacaqlar
Ermənistanın işğalı zamanı Azərbaycanın nəzarət zonasından kənarda qalan Qarabağ qeyri-qanuni fəaliyyət üçün əlverişli meydan olub. Burada işğalçı dövlət beynəlxalq şirkətlərlə birgə dağ-mədən yataqlarını qanunsuz istismar edib. İşğalın davam etdiyi uzun illər ərzində təbii sərvətlərimiz talan edilərək xaricə daşınıb.
Təbii sərvətlərin istismarı
İstismar edilmiş ərazilər arasında Tərtər rayonunda yerləşən “Qızılbulaq” və “Dəmirli” yataqları da var. "Qızılbulaq" yatağının qiymətlədirilmiş ehtiyatı 13 min 700 ton qızıl, “Dəmirli”nin ehtiyatı isə 457 min ton misdir. Hər iki yatağın istismarında Lixtenşteyndə qeydiyyata alınmış “Base metals” şirkəti əsas rol oynayıb. İllik gəliri 8 milyon ABŞ dolları təşkil edən şirkət “Qızılbulaq” yatağından hər ay 12 min ton filiz çıxarıb. Xammal Ermənistana aparılıb və orada təkrar emal olunduqdan sonra dünya bazarına çıxarılıb.
“Base metals” şirkəti yalnız “Dəmirli” yatağını deyil, “Heyvalı” qızıl və mis mədənlərini də talayıb. Bu yataqdan 2009–2011-ci illərdə 400 min ton filiz emal edilib. Həmin müddətdə texnoloji emal həddi 150 min ton olmalı idi. “Dəmirli” yatağından çıxarılan filiz Avropa ölkələrinə ixrac edilib.
2020-ci ilə qədər “Qızılbulaq” və “Dəmirli” qızıl yataqlarını talayan xarici şirkət cinayətkar fəaliyyətinə haqq qazandırmaq üçün qondarma Xankəndi rejiminə maliyyə dəstəyi göstərib. Məsələn, 2019-cu ildə 38,5 milyon dollar qanunsuz fəaliyyət vergisi ödəyib. Rejimin himayəsi ilə ixracın 60 faizi, ümumi gəlirlərin 32 faizini məhz bu şirkət təmin edib.
“Herq” nəşrinin məlumatında isə bildirilib ki, 2019-cu ildə dağ-mədən sənayesi qondarma rejimin ÜDM-nin 13,7 faizini (97,6 milyon ABŞ dolları) istehsal edib. Bununla yanaşı, “Base metals” şirkətinin öz gəlirləri də az olmayıb. Azərbaycan Baş Prokurorluğu onun 2009–2017-ci illərdə “Qızılbulaq” yatağını amansız istismar edərək 178 milyon dollar qazandığını sübuta yetirib. Digər yataqların istismarını da nəzərə alsaq şirkət 2009–2017-ci illərdə 301 milyon 918 min manat məbləğində qanunsuz gəlir əldə edib.
Ciddi ekoloji risklər
İqtisadi İslahatların Təhlili və Kommunikasiya Mərkəzindən bildirilib ki, Qarabağda təbii ehtiyatların heç bir norma gözlənilmədən amansız istismarı iqtisadi ziyanla yanaşı, ciddi ekoloji təhlükə də yaradıb. Təbiətə vəhşi münasibət çox çirklənmiş tullantı hovuzların əmələ gəlməsinə gətirib çıxarıb. Məsələn, “Heyvalı” filiz yatağında 3 tullantı hovuzu var. “Dəmirli” mədən yatağının 740 hektar ərazisində isə qanunsuz geoloji kəşfiyyat, qazıntı-hasilat işləri və yeni infrastruktur tikintisi aparılıb. Bu zaman ərazidəki tarixi-memarlıq və arxeoloji abidələrimiz də məhv edilib. Bundan başqa, “Dəmirli” dağ-mədən kompleksinin tikintisi zamanı 82 hektara yaxın meşə örtüyü sıradan çıxarılıb. Nəticədə, ətraf mühitə böyük ziyan dəyib, çaylar və yeraltı sular ağır metallarla çirklənib. Uzun illər bu ərazidə yanğınlar təşkil edilib, su hövzələri kimyəvi çirklənməyə məruz qalıb.
Tullantı hovuzlarının yaxınlığında isə Sərsəng Su Anbarı yerləşir. Bu ərazilər seysmik cəhətdən təhlükəli zonadır. Zəlzələ və ya texnogen proseslər nəticəsində tullantı hovuzlarından zəhərli maddələr su anbarına sıza bilər. 2012-ci ildə belə bir hadisə olmuşdu. Həmin vaxt Heyvalı kəndi yaxınlığındakı mədəndən sianid turşusunun sızması nəticəsində Sərsəng Su Anbarında balıqlar məhv olmuşdu.
Cinayətkar şirkətləri cəza gözləyir
Ölkəmizə iqtisadi ziyan vurmaqla yanaşı, ekoloji təhlükə yaradanları ikiqat cəzalar gözləyir. Bu, Azərbaycan Respublikasının Cinayət Məcəlləsi ilə tənzimlənir. Baş Prokurorluğun İstintaq İdarəsi işğal olunmuş rayonların ərazilərində xarici dövlətlərin erməniəsilli vətəndaşlarının ekologiya və yerin təkinin istismarı qaydalarını kobud şəkildə pozması ilə nəticələnən qanunsuz sahibkarlıq fəaliyyəti ilə məşğul olmaları üzrə 2015 və 2018-ci illərdə Cinayət Məcəlləsinin 192.2.3 (qanunsuz sahibkarlıq) və 318.2-ci maddələri ilə (dövlət sərhədini qanunsuz keçmə) cinayət işləri başlanıb. Məcəlləyə görə, “Qızılbulaq” və “Dəmirli” mədənlərində qanunsuz sahibkarlıqla məşğul olaraq sərvətlərimizi talan edənləri 7 ilədək həbs cəzası gözləyir. Onlar Azərbaycan Respublikasına dəymiş ziyanın 4 mislini dövlət büdcəsinə ödəməlidirlər. Onu da bildirək ki, Azərbaycan dövləti işğal nəticəsində dəyən zərərin ödənməsi məqsədilə Ermənistana qarşı beynəlxalq məhkəmələrdə iddia qaldırmağa hazırlaşır.
Artıq "Qızılbulaq" və “Dəmirli” yataqları Azərbaycan Ordusunun nəzarətinə keçib. Düşmənin 30 ilə yaxın işğal altında saxladığı torpaqları azad edən ordumuz ölkənin hərbi-siyasi nüfuzunu yüksəltməklə yanaşı, gələcək iqtisadi inkişafımıza da zəmin yaradıb. Tezliklə bu resursların qeyri-qanuni istismarı ilə bağlı kompleks qiymətləndirilmə aparılacaq. Düşmən ölkənin və separatçı rejimin rəhbərlərinin, bu prosesdə iştirak edən cinayətkar xarici şirkətlərin məsuliyyətə cəlb olunması ilə bağlı bütün lazımi tədbir həyata keçiriləcək.
Pünhan ƏFƏNDİYEV
XQ