Əmək və Əhalinin Sosial Müdafiəsi Nazirliyinin elektronlaşdırma proqramı çərçivəsində yeni “Sosial sığorta ödəmələrinin hesablanması üzrə kalkulyator” elektron xidməti istifadəyə verilib. Geniş funksional imkanları olan e-xidmət emas.sosial.gov.az internet portalında ayrıca bölmə kimi yaradılıb.

Bölmə hər bir sığortaolunana əmək qabiliyyətinin müvəqqəti itirilməsi, ha­miləlik və doğum, uşağa qulluq ilə bağ­lı sosial sığorta hadisələri baş verdiyi zaman ona ödəniləcək sosial sığorta ödəməsinin məbləğini hesablamaq imkanı verir. Xidmətdən yararlanmaq üçün sığortaolunanlar emas.sosial.gov.az portalında şəxsi kabinetə daxil ola­raq “Sosial sığorta ödəmələrinin hesab­lanması üzrə kalkulyator” bölməsinə keçid etməli və açılan pəncərədə sosial sığorta ödəməsinin növünü seçməli­dirlər. Bundan sonra seçilmiş sosial sı­ğorta ödəməsinin növünə uyğun olaraq tələb olunan məlumatları müvafiq xana­lara daxil etməlidir. “Hesabla” düyməsi sıxıldıqda ona ödəniləcək sosial sığorta ödəməsinin məbləği ekranda əks oluna­caqdır.

Yeni e-xidmət elektron xidmətlərin tətbiq dairəsinin genişləndirilməsinə, xidmətlərin keyfiyyət və əlçatanlığı­nın, sığortaolunanların sosial sığorta ödəmələri ilə bağlı məlumatlılığının artı­rılmasına xidmət edir. 2021-ci ilin əvvə­lindən nazirlik tərəfindən “Pensiya kal­kulyatoru” elektron xidməti də istifadəyə verilib və ötən dövrdə bu e-xidmətdən 2 milyon dəfədən çox istifadə edilib.

Sosial sahədə son 5 ildə geniş elekt­ronlaşma proqramı icra olunub və bu gün nazirliyin 153 xidmətindən 140-dan çoxu (90 faizdən çoxu) artıq e-qaydada təqdim edilir. Ötən müddətdə, həmçinin 50-dən çox proaktiv xidmət, 31 e-arayış xidməti yaradılıb. 

Zərifə HÜSEYNOVA
XQ