Ordubadın Parağa kəndi isə qaçqınlıq ünvanıdır
Sovet rejiminin çöküşü prosesində erməni millətçiləri, xüsusən, 70 il cildini dəyişmiş daşnak tör-töküntüsü ittifaq daxilindəki və xaricdəki düşmən dairələrin açıq-gizli himayəsi ilə 1988-ci ilin əvvəllərindən Azərbaycana ərazi iddiası irəli sürdülər. Qarabağın dağlıq hissəsinin Ermənistana birləşdirilməsi avantürası ilə başlayan separatçı hərəkatın ilk mərhələsində Ermənistanda yaşayan soydaşlarımızın sonuncu nəsli də tarixi torpaqlarından vəhşicəsinə deportasiya olundu və soyqırımına məruz qaldı.
Qərbi Azərbaycandan qaçqın düşmüş yüz minlərlə soydaşımızın Vətən həsrəti, doğma yurda qayıtmaq niyyəti 35 il keçsə də, bir gün də o sönməyib. Azərbaycan dövlətinin dəstəyi ilə Qərbi Azərbaycan İcmasının başladığı doğma yurdlara qayıtmaq uğrunda hərəkat onların qəlbində gur ümid işığı yandırıb. Qərbi Azərbaycanın ayrı-ayrı bölgələrindən qovulmuş insanlar icma ətrafında toparlanaraq dədə-baba torpaqlarına qayıtmaq üçün təşkilati və siyasi-diplomatik səylərini artırıblar.
Biz də bu arzulara qoşularaq soydaşlarımızın Vətən həsrətinə son qoyacaq zamanın tezliklə yetişəcəyinə inanırıq. İnanırıq, ona görə ki, xalqımız inadlı və qəhrəman mübarizəsinin sonunda Vətən müharibəsi yolu ilə 30 il düşmən tapdağında qalmış Qarabağ və Şərqi Zəngəzur torpaqlarına geri qayıtdı.
Sonuncu deportasiyadan sonra Qərbi azərbaycanlılar Azərbaycanın müxtəlif guşələrində məskunlaşıblar. Onların bir hissəsi də Naxçıvanı özlərinə müvəqqəti məskən seçib. Qarabağ İcmasının uğurlu fəaliyyətinə elmi-ideoloji zəmini möhkəmləndirmək üçün AMEA Naxçıvan Bölməsinin əməkdaşları muxtar respublika da Qərbi azərbaycanlıların yaşadıqları ərazilərinə ekspedisiyalar təşkil edir, qaçqın soydaşlarımızla görüşlər keçirir. Ordubad rayonunda Qərbi azərbaycanlıların yığcam məskunlaşdığı yerlərdən biri də Parağa kəndidir. Onlar, əsasən, Qərbi Azərbaycanın Dərələyəz mahalından qaçqın düşmüş soydaşlarımızdır.
Əzizbəyov (keçmiş Söylan) rayonunun Gomur kəndindən qaçqın düşmüş Şahlar Allahverdiyev dopdolu mülkündən əliboş çıxmağa məcbur olub. O yalnız atası Mərdan kişinin bıçağını özü ilə gətirib və indi də onu ən qiymətli yadigar kimi qoruyur. Soydaşımızın doğma yurduna qayıtmaq üçün Tanrıya duaları bitib-tükənmir. Şair təbli Şahlar müəllim ağrı-acılı günlərin duyğu-düşüncələrini misralara belə çevirib:
Vətən adlı sevincim də, fərəhim də
Ömür boyu bir şələdir kürəyimdə.
Qaçqın düşən el-obanın ürəyində,
Sönməyən ocaqdı, qordu Dərələyəz.
Yenə geri dönəcək o ötən çağlar,
Can dərmanıdı loğman-təbib bulaqlar.
Yurd yerləri boş qalıb, içim qan ağlar,
Dədəmin, babamın yurdu Dərələyəz.
Lala Məmmədova da Gomurdakı həyatını unuda bilmir. Yuxularında elə hey daim doğma kəndlərindəki qayğısız günlərini görür. Uşaq vaxtlarının şən, qayğısız keçdiyindən söhbət açaraq oynadıqları oyunları xatırlayır: “Çəkuzatma”, “Mollamindi”, “Əlləməqaya”, “Qayışagirmə”. İndi o günləri xatırlayaraq gözləri dolan Lala xala doğma yurdlarından qaçqın düşərkən özləri ilə bir neçə xalı-xalça, cecim və bəzi xırda-para əşya götürə bildiklərini söyləyir, əşyaları bizə göstərərək onları qoyub gəldiyi evinin ən əziz nişanəsi kimi qoruyur.
Lala xala doğma yurdlarında icra etdikləri xalq mərasimlərimizi, o cümlədən Novruz bayramında keçirilən ayinləri şirin-şirin xatırlayır: “İlin axırında qədir tutardıq, bir evə yığışardıq. Novruzun gəlişini elliklə keçirərdik, yallı gedərdik, əsasən də İt yallısı. Oğlanlar şar, kişilər güllə atardılar. Hamı sevinclə Novruzu qarşılayardı”...
Lala Məmmədovanın oğlu Bəylər Məmmədov 1970-ci il təvəllüdlüdür. O da vətənli günləri unutmur, davamlı olaraq doğma yurdlarına qayıtmağı arzulayır. Bəylər müəllim Qərbi Azərbaycanla bağlı dəyərləri qoruyub-yaşatmaq yolunda yorulmaz fəaliyyətdədir. Vətən dərdi onu da şair eləyib. Duyğularını, arzularını misralara köçürür, yurd yanğısını poetik dillə ifadə edir
Ölkə Xudayeva isə 45 yaşı olanda doğma el-obasından qovulub. Daim Vətən həsrətli qəlbi göynəyir. O da digər kövrək qəlbli həmyerliləri kimi doğma el-obasını yuxularında görməklə qəlbini ovundurur. Vətəndən qaçqın düşərkən itkin düşən, həlak olan həmyerlilərini də xatırlayır. Ölkə nənənin qəlbinin sızıltısı gözlərindən axan yaşlarla qarışaraq ürək dağlayan bayatılara çevrilir:
Sizi necə ağlayım,
Gündüz yox, gecə ağlayım.
Ananız yanınızda yox,
Yalqız necə ağlayım.
Könlüm bir ana istər,
Lap yana-yana istər.
Bir anayla bir bala,
Bir xəlvətxana istər.
Bəli, öz yurdundan qovularaq qaçqınlıq həyatına düçar edilmiş bu insanların dərdinə şərik olsaq da, onların vətən həsrətli kövrək qəlblərinin sızıltısını hamıdan artıq bu dərddə olanlar anlaya bilər. Kövrək söhbətlərinin əvvəli də, axırı da Vətən olan bu insanlara dövlət qayğısı, yüksək səviyyədədir, ətrafdakıların qayğı-diqqəti də yetərlidir. Lakin Vətən adlı dərdlərinə yalnız Vətənin özü çarədir. Elə bu dözüm və qeyrətlə qədim mədəniyyət daşıyıcıları olan Qərbi azərbaycanlılar, nəhayət, öz doğma yurdlarına qovuşacaqlar.
Aytən CƏFƏROVA,
AMEA Naxçıvan Bölməsi İncəsənət,
Dil və Ədəbiyyat İnstitutu folklorşünaslıq şöbəsinin müdiri, dosent