Əmək və Əhalinin Sosial Müdafiəsi Nazirliyində vətəndaş cəmiyyəti institutları ilə “İşə qəbul prosesində gender bərabərliyi” mövzusunda görüş olub. Qeyri-Hökumət Təşkilatlarına Dövlət Dəstəyi Agentliyi ilə birgə təşkil olunan görüşdə nazirliyin və vətəndaş cəmiyyəti institutlarının nümayəndələrinin əmək və məşğulluq sahəsində gender bərabərliyinin təmin edilməsi mövzusunda fikirləri dinlənilib.

Görüşdə gender bərabərliyinin tə­min edilməsi ilə bağlı Azərbaycanın fəal dövlət siyasətinə malik olduğu, 2006-cı ildə ölkədə “Gender – kişi və qadınların bərabərliyi təminatları haqqında” Qanun qəbul edildiyi vurğulanıb. Ötən dövrdə ölkəmizin BMT-nin “İqtisadi, sosial və mədəni hüquqlar haqqında Beynəlxalq Pakt”ına, “Qadınlara qarşı ayrı-seçkiliyin bütün formalarının ləğv olunması haqqın­da” Konvensiyasına qoşulduğu, habelə Beynəlxalq Əmək Təşkilatının gender bərabərliyi ilə bağlı mühüm konvensi­yalarını ratifikasiya etdiyi bildirilib. Milli qanunvericilikdə gender bərabərliyi ilə bağlı mütərəqqi beynəlxalq yanaşmalar­dan irəli gələn prinsiplərin əks olunduğu diqqətə çatdırılıb.

Ölkəmizdə əmək və məşğulluq, eləcə də işə qəbul prosesində qadın və kişilər arasında ayrı-seçkiliyə yol verilməsi­nin qanunla qadağan olunduğu, habelə hamilə və ya 3 yaşına çatmamış uşağı, yaxud əlil uşağı olan qadınlarla bağlı əmək qanunvericiliyindəki bir sıra güzəşt­lər və əlavə təminatlar qeyd olunub. Müzakirələrdə son illər aparılan sosial islahatlar, habelə əməkhaqqı islahatları, əmək qanunvericiliyinə edilmiş, o cüm­lədən qadınların əmək bazarına çıxış, məşğulluq imkanlarının genişləndirilmə­sinə yönəlmiş son dəyişikliklər diqqətə çatdırılıb. 

Görüşdə işə qəbul prosesində gen­der bərabərliyinin təmin edilməsi ilə bağlı müzakirə aparılıb, rəy və təkliflər səslən­dirilib.

Zərifə BƏŞİRQIZI, 

“Xalq qəzeti”