Azərbaycan 2001-ci ildən BMT-nin Ümumdünya Turizm Təşkilatının (UNWTO) üzvüdür. 4 il öncə, iyun ayında Ümumdünya Turizm Təşkilatı İcraiyyə Şurasının 110-cu sessiyası Bakıda keçirilib. Tədbirdə dünyanın 37 ölkəsindən və 5 beynəlxalq təşkilatdan nümayəndələr iştirak ediblər. Bu faktlar Azərbaycanın dünya turizminə sürətli inteqrasiyasının göstəricisidir.

Ölkəmizin güclü turizm potensialı olan dilbər guşələrindən biri də Lerik rayonu­dur. Düz 90 il əvvəl unudulmaz şairimiz Mikayıl Müşfiq Leriki gəzib və təəssüratla­rını duyğulu misralara çevirib:

Hər tərəf yaşıllıq, hər tərəf orman, 

Dağların başında seyrək bir duman. 

Ardında süzülür günün baxışı- 

Dərədə bir çayın məxmur axışı. 

Başqa səfası var hələ Lerikin... 

Bölgənin Bülüdül və Zərinqala kimi təbii istirahət zonaları çox məşhurdur. Əlçatmaz Kömürgöy zirvəsi dəniz səviy­yəsindən 2 min 492 metr, Qızyurdu isə 2 min 433 metr yüksəklikdə göyləri dəlir. Meşələrin palıd, vələs, dəmirağac, azat, nil ağacları canlı təbiət abidələridir. 

Lənkərandan üzüyuxarı qalxdıqca yol­boyu neçə-neçə turist məkanı ilə rastlaşı­rıq. Adı ingilis dilindən tərcümədə “Ruhun dincəldiyi yer” anlamına gələn “Relaks” istirahət mərkəzində ilin bütün fəsillərində dincəlmək üçün şərait var. Müasir turizm məkanları kimi formalaşan digər mərkəz­lərin adlarının isə Azərbaycan leksikonu­na aid olması qançəkərlik doğurur: "Tə­bəssüm”, "Çənlibel”, "Meşəbəyi”, "Ağgöl”, "Qala”, "Həyat”, "Xəyal”, "Cənub”, "Dağ çayı” ...

Həm adı, həm də xidmət səviyyəsi, sö­zün həqiqi mənasında, təbəssüm yaradan “Təbəssüm” ailəvi istirahət mərkəzində dincəlmək xüsusilə xoşdur. Lerik adlı ya­şıl tacın ecazkar bir naxışıdır “Təbəssüm”. Hər dəfə bura gələndə Efesli Heraklitin bir kəlamını xatırlayıram: “Müdriklik təbiətlə həmahəng dolanmaqdadır”. Doğrudan da, “Təbəssüm”də adam təbiətlə bağrıba­daş olur, onun müdriklik aurasına düşür. Orada çəkilən şəkillər hazır foto-açıqçalıq olur. Hər foto əlvan bir rəsm əsərinə bən­zəyir. 

Yerli sahibkar Akif Əliyev “Təbəssüm”ü əvvəlcə kafe kimi açmışdı. Sonra Birin­ci regional inkişaf proqramında “Təbəs­süm”ün 50 yerlik turizm-əyləncə mərkəzi kimi genişləndirilməsi nəzərdə tutuldu. 

Mərkəzin sahibi Akif Əliyevin dedikləri:

– Möhtərəm Prezidentimizlə buradakı ilk görüşümüzü heç zaman unutmaram. O vaxt dövlətimizin başçısı tövsiyə etdi ki, turizmi genişləndirib beynəlxalq səviy­yəyə çatdıraq. Bu, bizi ruhlandırdı, xeyli iş gördük. Daha sonra, 2011-ci ildə Bakı­da keçirilən beynəlxalq turizm sərgisində dövlət başçımız bizim “Təbəssüm”ə aid guşəyə yaxınlaşaraq uğurlarımızla tanış oldu, dəyərli məsləhətini verdi. Mərkəzi daha böyük həvəslə qurub-yaratdıq, ər­səyə gətirdik. Təəssüf ki, sonralar müəy­yən maneələr də oldu, amma biz dayan­madıq, irəli getməyə çalışdıq. Elə keçən il nə qədər iş görmüşük, buradakı dəmir körpünü dəyişərək, memarlıq abidəsi kimi qurmuşuq. İnanırıq ki, bizə daha güclü dəstək veriləcək və biznes-planlarımızı tam reallaşdıra biləcəyik. 

“Təbəssüm”də ötən ilə qədər 22 yer var idi, indi 30-a çatıb. Eyni vaxtda nahar etmək üçün yerlərin sayı artıq 154-dür. İki yeni körpü tikilib. Mətbəx müasirləşdirilib. Xidmət personalının sayı da artaraq 21 nəfərə çatıb. 

Xatırlayırıq ki, fevral ayında qardaş Türkiyədə zəlzələ baş verən zaman “Tə­bəssüm”ün rəhbərliyi sosial şəbəkə va­sitəsilə belə bir elan vermişdi: “9 kottecimiz var. Məktəb yaşlı 30 uşaq və ya 7 ailə gəlib burada məskunlaşa bilər”. Doğrudur, gələn olmadı, amma bu çağırışın özü leriklilərin həmrəylik, xeyirxahlıq amalına sadiqliyin­dən xəbər verir. Yeri gəlmişkən, “Təbəs­süm”də şəhid ailələrinə, Vətən müharibəsi qazilərinə də diqqət və qayğı ilə yanaşılır. Dəfələrlə “Təbəssüm”də bir süfrə arxasına toplaşmış şəhid ana və bacıları cəmiyyətin onlara sayğı və qayğısını görüblər, məm­nunluq duyublar. Kollektiv onların qullugun­da durmağı özünə şərəf sayıb... 

“Təbəssüm”ü gəzərkən bir boş yerin belə olmadığını gördük. Buranın təbii şə­raiti, xidmət səviyyəsi elədir ki, bir gəlib görən bir də gəlmək istəyir. Turistlərdən, xarici qonaqlardan başqa, Lənkəran, Ma­sallı, Cəlilabad və digər yerlərdən “Təbəs­süm”ə bir neçə saatlıq istirahətə gələnlər də yetərli qədərdir. Hamı buradan məm­nun qayıdır. Həm “qüdrətdən səngərli-qa­lalı dağlar”, kölgəli meşələr, axar-baxarlı çay vadisi, təmiz hava, həm də Cənub mətbəxinin təkrarsız təamları hər kəsi heyran qoyur.

Əli NƏCƏFXANLI,

“Xalq qəzeti”