2023-cü ilin “Heydər Əliyev” ili elan edilməsi ilə əlaqədar “Heydər Əliyev və yeni liderlik: fəlsəfi-elmi təhlil” kitabı işıq üzü görüb. Monoqrafiyada Ulu öndərin Prezident-Lider kimi fəaliyyəti liderologiya-fəlsəfə-elm konteksində müasir fənlərarası elmi metodologiya tətbiq edilməklə araşdırılıb.
Müəllif fəlsəfə elmləri doktoru Füzuli Qurbanov Ümummilli liderin irsinin tədqiqində ciddi fəlsəfi-elmi yanaşmaya keçməyin faydalı ola biləcəyini əsaslandırmağa çalışıb. Bu məqsədlə Heydər Əliyevin dövlət başçısı və lider kimi fəaliyyəti konkret olaraq sinergetikada mövcud olan metodoloji prinsiplər əsasında müəllifin hazırladığı yanaşma prizmasında təhlil edilib. Həmin prinsiplər belədir: qeyri-xəttilik, intersubyektivlik, emercent interfeys, multifraktallıq və təşəkkül.
Monoqrafiyada vurğulanan fənlərarasımetodoloji prinsiplər işığında Heydər Əliyevin müasir müstəqillik mərhələsində Prezident və Lider kimi təcrübəsinin başlıca məqamları fəlsəfi baxımdan araşdırılıb.
O cümlədən, Ulu öndərin siyasi varislik prinsipinin fəlsəfi-elmi analizi aparılıb. Alınan fəlsəfi qənaətlər əsasında Heydər Əliyevin uğurlu Liderlik Məktəbinin mövcudluğu və həmin kontekstdə Prezident İlham Əliyevin XXI əsrdə yeni uğurlu liderlik nümunəsi yaratdığı sübut edilib.
“Xalq qəzeti”
