Onun haqqında düşünəndə, ilk növbədə, yadıma unudulmaz Xalq şairimiz Musa Yaqubun doğma kəndi Buynuzda öz dilindən eşitdiyim məşhur misraları düşdü:
Bəlkə də borcundan çıxmadım, Vətən,
Ömür bahar deyil bir də qayıtsın.
Ölsəm də, qoynunda qoy ölüm ki, mən
Çürüyüm, bir ovuc torpağın artsın!
Düz 3 il əvvəl – iyulun 14-də Tovuz döyüşlərində şəhidlik zirvəsinə ucalanlardan, şairin təbirincə desək, Vətən torpağını daha bir qarış artıranlardan biri də o idi: 3-cü Ordu Korpusunun artilleriya rəisi İlqar Mirzəyev.
Özü də gözlərini həyata əbədi yuman zaman Vətən borcunu layiqincə vermiş qəhrəmanlardan biri İlqar Mirzəyev həmin gün səhər çağı korpusun komandir müavini, general-mayor Polad Həşimov və tabeliyində olan hərbçilərlə ön xətdə düşmən hücumunun qarşısını alarkən şəhid olub.
...Azərbaycan–Ermənistan dövlət sərhədinin Tovuz rayonu ərazisində düşmənin növbəti silahlı təxribatının qarşısının alınması məqsədilə görülən cavab tədbirləri nəticəsində haylara məxsus müxtəlif təyinatlı hərbi nəqliyyat və döyüş vasitələri, xeyli canlı qüvvə məhv edilib. Lakin igid polkovnik və dostları həmin şiddətli döyüşlərdən sağ çıxa bilməyib, adlarını al qanları ilə şöhrət və şərəf tariximizə yazıblar.
Elə o gün şəhid zabit İlqar Mirzəyevin cənazəsi minlərlə insanın qatıldığı izdihamın müşayiəti ilə yaşadığı Bakının Əhmədli qəsəbəsindəki evinə gətirilib. O, II Fəxri xiyabanda dəfn olunub. Beləcə, Gürcüstanın Qardabani doğulan, sonradan Bakını ünvan seçən, hərbi vəzifə borcu olaraq 2016-cı ilin aprelində Tərtərdə, 2020-ci ilin iyulunda Tovuzda vuruşan və oradaca əbədiyyətə qovuşan İlqar Mirzəyev artıq 3 ildir ki, xatirələrdə yaşayır.
Ölümündən sonra Polad Həşimovla ona “Azərbaycanın Milli Qəhrəmanı” adı verilib. Digər şəhid silahdaşları – mayor Anar Novruzov, mayor Namiq Əhmədov, gizir İlqar Zeynallı, gizir Yaşar Babayev və əsgər Elçin Mustafazadə müxtəlif təltiflərə layiq görülüblər...
İki ay öncə şəhid polkovnikin 50 yaşı Xətai rayonunda ehtiramla qeyd olundu, məzarı ziyarət edildi. Müdafiə Nazirliyinin, hüquq-mühafizə orqanları rəhbərlərinin və ictimaiyyət nümayəndələrinin tədbirə qatılması, Hərbi Orkestrin ifasında Azərbaycan Respublikasının Dövlət Himninin səsləndirilməsi, Xalq artisti – şəhid atası Əli Nurun şeir söyləməsi, şagirdlərin ifasında ədəbi-bədii kompozisiya təqdim olunması və s. şəhidlərimizin xatirəsinin necə yüksək urvatda tutulduğunu bir daha göstərdi. Milli Qəhrəman İlqar Mirzəyevlə bütün Azərbaycan xalqının fəxr etdiyi vurğulandı. Onun adını daşıyan 98 nömrəli tam orta məktəbin ərazisində şəhidlərimizin xatirəsinə ağaclar əkildi.
Yubileyinə həsr olunmuş “İgidlik simvolu İlqar Mirzəyev” adlı digər bir anım tədbirində isə şəhid polkovnikin döyüş yoldaşları – polkovnik Xəyyam Məmmədov, polkovnik-leytenantlar Mürşüd Babayev və Təbriz Kərimov onunla bağlı barıt qoxulu xatirələrini dilə gətirdilər. Bəstəkar-müğənni Ruslan Səfəroğlu Milli Qəhrəmana həsr etdiyi mahnını ifa etdi. Həzi Aslanov adına Ordu İdeoloji iş və Mədəniyyət Mərkəzinin solistlərinin ifasında hərbi-vətənpərvərlik mahnıları səsləndirildi. Sonda Milli Qəhrəmanımız haqqında “Atama məktub” adlı kitabı qonaqlara təqdim olundu.
Daha öncə Azərbaycan Dövlət Pedaqoji Universitetinin tələbələri şəhid polkovnikin ailəsini ziyarət ediblər və İlqar Mirzəyevin obrazını yaratmış gənc rəssam Azadə Zellabdiyeva portreti qəhrəmanın həyat yoldaşı Güllü xanıma təqdim edib. O da öz növbəsində tələbələrə İlqarla bağlı xatirələrini danışıb, onların suallarını cavablandırıb.
Onu da qeyd edək ki, rejissor Kəmalə Mehralı Musazadə “Salnaməfilm” studiyasında “Azərbaycanın Milli Qəhrəmanları” silsiləsindən İlqar Mirzəyev haqqında “Artilleriyanın atası” adlı maraqlı film çəkib. Biz bu faktı qəsdən yazının sonu üçün saxladıq. Ona görə ki, çəkilişləri onun döyüş yolu keçdiyi məkanlarda – Goranboy, Gəncə, Şəmkir və Tovuz istiqamətlərində aparılmış film davadan sonra qəhrəmanın oğlu Elvinin əsgəri xidmətə yollanması ilə sona çatır. Bu isə o deməkdir ki, qəhrəmanlıq ənənələri davam edir.
Qoy düşmən bilsin ki, estafet etibarlı əllərdədir. Qəhrəman ataların yolunda oğullar iftixarla irəliləyirlər.
Əli ƏLİYEV, “Xalq qəzeti”
