Dünən Qaradağ rayonundakı “Qobu park -3” yaşayış kompleksindən 85 nəfərdən ibarət 23 ailə doğma yurdu Laçına köç edib.
Yolasalınma mərasimində Qaçqınların və Məcburi Köçkünlərin İşləri üzrə Dövlət Komitəsinin, Şərqi Zəngəzur iqtisadi rayonuna daxil olan Laçın rayonunda Azərbaycan Prezidentinin xüsusi nümayəndəliyinin və Laçın Rayon İcra Hakimiyyətinin rəsmiləri iştirak ediblər.
Səhər saatlarında başlanan yolasalma mərasimində müxtəlif media qurumlarının nümayəndələri, yaşayış kompleksinin digər sakinləri də qatılmışdılar. Bütün bu qələbəlikdə Laçına köçənlərin kimlər olduğunu başa düşmək elə də çətin deyildi. Simalarındakı sevinc və fərəh, həyəcan onları digərlərindən fərqləndirirdi.
Qarabağ müharibəsinin bütün ağrı-acılarını yaşayan, öz doğma torpaqlarından didərgin düşən və nəhayət yurd həsrəti sona çatan bu insanların ürək sözlərini dinlədik.
İlk həmsöhbətimiz Laçın sakini Bəxtiyar Şirinov oldu. O, bu sevinci keçmiş köçkünlərə yaşadanlara minnətdarlıq etdi:
–Bu gün doğma torpaqlarımıza dönürüksə, buna görə Ali Baş Komandanımıza, şəhidlərimizin ruhuna və qazilərimizə borcluyuq. Şəhidlərimizə Allahdan rəhmət, qazilərimizə cansağlığı diləyirəm. Biz o torpaqlarda gəzdikcə Vətən uğrunda döyüşənləri daim xatırlayacağıq. Onlar təkcə doğma torpaqlarımızı deyil, qürurumuzu da bizə qaytardılar.
Bahar Həsənova isə yaşadığı hissləri dilə gətirməkdə çətinlik çəkdiyini dedi:
– Bu gün ömrümdə tam fərqli hisslər yaşayıram. Baxın, barxanalarımız yığılır, maşın karvanımız yola çıxmağa hazırlaşır. Əminəm ki, Laçına yaxınlaşanda həyəcan dolu hisslərimiz daha da güclənəcək. Bu barədə düşündükcə həyəcanlanıram. Otuz ildən sonra doğma el-obama geri dönərkən keçirdiyim hissləri sözlərlə ifadə edə bilmirəm.
Digər sakin Elmira Cəfərova uzun illərdir bu günün arzusunda olduğunu vurğuladı:
– Şükürlər olsun Allahın bugünkü gününə ki, doğma elimizə geri dönürük. Bu günü çox arzulayırdıq, arzumuza çatdıq.
Atamoğlan Quliyevlə söhbətimiz zamanı o, böyük qayıdış işlərində əməyi keçən hər kəsə təşəkkür etdi:
– Mən ordan çıxanda oğlumun 5 yaşı var idi, indi nəvəm 6 yaşındadır. Bu müddət ərzində hər gün yurd həsrəti çəkmişik. Şükürlər olsun qovuşdurana. Bu işin təşkilində, orda quruculuq işlərində, bizim evlərimizin təmirində əziyyəti keçən hər kəsə minnətdaram. Hər şey çox yüksək səviyyədə təşkil edilib.
Qeyd edək ki, doğma torpaqlarına köçürülən ailələr, Laçın şəhərində vaxtilə yaşadıqları, işğala son qoyulduqdan sonra Prezident İlham Əliyevin göstərişi əsasında bərpa edilən və ya yenidən tikilən evlərdə məskunlaşacaqlar.
Son bir neçə ay ərzində Laçın şəhərinə 5 köç yola düşüb və 93 ailədən ibarət 351 nəfərin daimi məskunlaşması təmin edilib. İnşallah, yurd həsrəti çəkən bütün soydaşlarımız doğma ocaqlarına qayıdarlar. Dövlətimiz, hökumətimiz bundan ötrü məqsədyönlü addımlar atır.
Rüfət MƏHƏRRƏMOV
