Nazirlər Kabinetinin qəbul etdiyi “Əmək şəraiti ağır və zərərli olan işlərdə və iqlim şəraitinə görə işləmək üçün əlverişli olmayan iş yerlərində çalışan işçilərin əmək haqqının yüksək məbləğdə ödənilməsini təmin edən artımların (əmsalların) məbləğinin minimum miqdarının müəyyən edilməsi haqqında” qərarda dəyişiklik edilib. Əmək və Əhalinin Sosial Müdafiəsi Nazirliyindən bildiriblər ki, dəyişiklik işğaldan azad edilmiş ərazilərimizdə məskunlaşıb işləyənlər üçün həyata keçirilən stimullaşdırıcı tədbirlərdir.
Qərarla işğaldan azad edilmiş ərazilərimizdə işləyən mütəxəssislərin vəzifə maaşlarına tətbiq olunan artımın minimum məbləği 20 faiz müəyyənləşib. Qeyd edilir ki, artım əmsalları özəl sektorda fəaliyyət göstərən işəgötürənlər tərəfindən könüllü şəkildə kollektiv müqavilədə göstərilməlidir. Kollektiv müqavilə bağlanmadığı hallarda həmin artımların əmək müqaviləsində göstərilməklə tətbiqi nəzərdə tutulur.
Xatırladaq ki, dövlət başçısının ötən ilin dekabr ayında imzaladığı qanunvericilik aktları ilə Əmək Məcəlləsinə “Azərbaycan Respublikasının işğaldan azad edilmiş ərazilərində işləyən mütəxəssis” anlayışı əlavə olunub. Bu anlayışa peşə, orta ixtisas və ali təhsil müəssisəsini bitirmiş və son 5 il ərzində azı 2 il əmək stajı olan və ölkəmizin işğaldan azad edilmiş ərazilərində əmək müqaviləsi əsasında çalışan işçilər aid edilib. Stimullaşdırıcı tədbir kimi həmin mütəxəssislərə birdəfəlik müavinət ödənilir, aylıq vəzifə maaşlarına əlavələr hesablanır və hər il 5 gün əlavə məzuniyyət verilir.
Eyni zamanda, qərarda nəzərdə tutulub ki, işəgötürənlər tərəfindən işçilər üçün ödənilən sosial sığorta haqları subsidiya formasında geri qaytarılsın və həmin ərazilərdə işləməyə cəlb olunan əcnəbi mütəxəssislərə stimullaşdırıcı dəstək kimi əmək miqrasiyası kvotası tətbiq edilməsin.
Zərifə BƏŞİRQIZI, “Xalq qəzeti”