Naxçıvanda uşaq musiqi, incəsənət və bədii sənətkarlıq məktəbləri şagirdləri arasında ulu öndər Heydər Əliyevin 100 illik yubileyinə həsr olunmuş ifaçılıq, rəqs və rəsm müsabiqələrinə yekun vurulub.
Cəlil Məmmədquluzadə adına Naxçıvan Dövlət Milli Dram Teatrında Muxtar Respublika Mədəniyyət Nazirliyinin təşkil etdiyi sənət yarışmasının qaliblərinin mükafatlandırılması mərasimi keçirilib. Məclis müsabiqə iştirakçılarının əl işlərindən ibarət sərgiyə baxışla başlayıb.
Rəsmi hissədə Naxçıvan Muxtar Respublikası mədəniyyət nazirinin müavini Həsən Kərimov bildirib ki, müsabiqənin məqsədi, əsaslarını ulu öndər Heydər Əliyevin yaratdığı dövlət uşaq siyasətinə uyğun olaraq, istedadlı gənc və yeniyetmələri aşkar edib üzə çıxarmaq, onların yaradıcılıq potensialını inkişaf etdirməkdir. Ümumilikdə, 20 nominasiya üzrə keçirilən müsabiqəyə 26 uşaq musiqi, incəsənət və bədii sənətkarlıq məktəbinin 1000-ə yaxın şagirdi qoşulub.
Mərasimdə qaliblərlə yanaşı, onlara rəhbərlik etmişcvə müsabiqənin təşkilində fərqlənmiş müəllimləədə fəxri fərman və diplomlar təqdim edilib. Naxçıvan Şəhər Uşaq Musiqi və İncəsənət Məktəbi qalib iştirakçıların sayına görə fərqləndiyi üçün “İlin məktəbi” adına layiq görülüb.
Mərasimin bədii hissəsi müsabiqə qaliblərinin ifasında konsertlə davam edib.
Səbuhi HƏSƏNOV,
“Xalq qəzeti”