Bakı şəhərində marşrut xətləri üzrə fəaliyyət göstərən avtobusların əksəriyyəti yenilənib. Bakıətrafı kənd və qəsəsbələrə işləyən avtobusların isə bir çoxu köhnə, hətta acınacaqlı vəziyyətdədir. Bu da həmin qəsəbə və kəndlərdə yaşayanlar üçün problemlər yaradır.
Bu problemlə üzləşən yaşayış məntəqələrindən biri də Güzdək qəsəbəsidir. Bəlkə də Güzdək bu baxımdan vəziyyətin ən ağır olduğu qəsəbədir. Çünki buradan iki istiqamətə: Bakı Beynəlxalq Avtovağzalına 2 ədəd və Lökbatana 1 ədəd olmaqla cəmi 3 avtobus işləyir.
Bakı Beynəlxalq Avtovağzalına işləyən avtobusların intervalı saatda bir, Lökbatan istiqamətində isə iki saatda birdir. Avtobusların köhnə olması bu vəziyyəti daha da ağırlaşdırır. Köhnə avtobuslarda tez-tez nasazlıqlar yaranır və onlar sıradan çıxır. Belə olan halda isə intervallar daha da böyüyür. Bundan əlavə, şənbə və bazar günləri qəsəbədən hər iki istiqamətə işləyən avtobusların sayı azaldılır və interval 2 saat təyin edilir. Qəsəbə sakinlərinin də əsas şikayəti bununla bağlıdır.
Marşrutları işlədən sahibkar isə başqa cür işləməyin mümkün olmadığını deyir. O, kənd əhalisinin az olmasını əsas gətirərək deyir ki, bundan sıx intervalla və yaxud daha artıq avtobusla işləsə, ziyana düşər.
Məsələ ilə bağlı fikrini öyrəndiyimiz nəqliyyat eksperti Elməddin Muradlı bildirdi ki, bu kimi problemlər insanların ictimai nəqliyyata olan inamını azaldır və şəxsi avtomobillərdən, bahalı taksilərdən istifadəni artırır. İnsanları ictimai nəqliyatdan istifadəyə həvəsləndirmək üçün belə problemlər ən optimal yollarla həll edilməlidir.
Ekspert onu da vurğuladı ki, Rəqəmsal İnkişaf və Nəqliyyat Nazirliyinin tabeliyində olan, Azərbaycan Yerüstü Nəqliyyat Agentliyi tərəfindən plan hazırlanıb. Bu planda Bakıətrafı kənd və qəsəbələrdən ictimai nəqliyyatın hərəkətinin tənzimlənməsi və inkşaf etdirilməsi nəzərdə tutulur. Qarışıdaki illərdə bir çox Bakıətrafı kənd və qəsəbələrin ictimai nəqliyyatla bağlı problemi həll ediləcək.
“Qarşıdakı illər” ifadəsi uzun zaman vahidini ehtiva edir. Umid edirik ki, Güzdək qəsəbəsinin problemi daha tez bir zamanda həll olunacaq.
Rüfət MƏHƏRRƏMOV,
qəsəbə sakini
.jpeg)
.jpg)
