Şəkidə özünüməşğulluq proqramı əsasında yaradılan təsərrüfatlara baxış keçirilib. Əmək və əhalinin sosial müdafiəsi naziri Sahil Babayev və Şəki Şəhər İcra Hakimiyyətinin başçısı Elxan Usubov öncə rayonun Qoxmuq kənd sakini Lalə Məmmədsalahovanın təsərrüfatında olublar.
Qeyd edək ki, təsərrüfatın rəhbəri 44 günlük Vətən müharibəsində şəhid olmuş Kazım Məmmədsalahovun həyat yoldaşıdır. Müraciətinə uyğun olaraq o, 2021-ci ildə maldarlıq zərfi üzrə aktivlərlə təmin edilərək fermasını yaradıb.
Sonra Oxud kənd sakini Samirə Salamovanın özünüməşğulluq proqramı çərçivəsində qurduğu dərzixanaya baş çəkilib. S.Salamova keçən il dərzilik zərfi üzrə avadanlıqlarla təmin edilərək öz kiçik biznesini qurub.
Hər iki proqram iştirakçısı onlara göstərilən sosial dəstəyə görə Prezident İlham Əliyevə minnətdarlıqlarını bildiriblər. Onlar qurduqları təsərrüfatlarını inkişaf etdirməyə səy göstərdiklərini vurğulayıblar.
Daha sonra S.Babayev və E.Usubov Şəki Reabilitasiya Mərkəzində əlilliyi olan şəxslərə göstərilən xidmətlərlə tanış olublar. Son illərdə müasir standartlara uyğun şərait yaradılan mərkəzdə Şəki və ətraf rayonlar üzrə əlilliyi olan şəxslər effektiv fizioterapevtik üsulların tətbiqi əsasında tibbi-sosial reabilitasiya xidmətləri ilə təmin olunur.
Z.BƏŞİRQIZI, “Xalq qəzeti”