Filologiya üzrə fəlsəfə doktoru Aynur Familqızı dünən özünün “Facebook” səhifəsində yeni bir maraqlı paylaşım edib:
“Bir alimdən sormuşlar ki, zəhər nədir? Alim demişdir: “Ehtiyacınızdan artıq olan hər şey zəhərdir. Artıq dərəcədə güc, dincəlmək, yemək-içmək, qorxu, sakitlik, hətta aşırı nifrət, sevgi, nəşə, ehtiras da zəhər olmaqla yanaşı, həddindən çox yaxşılıq özü də zərərdir…”
Bu məqamda dahi Nizaminin məşhur misralarını xatırlamamaq olmur:
Sözün də su kimi lətafəti var,
Hər sözü az demək daha xoş olar.
Bir inci saflığı varsa da suda,
Artıq içiləndə dərd verir o da…
Hörmətli Aynur xanımın bu paylaşımına bircə onu əlavə etmək istərdik ki, həqiqətən, dinimiz də, əxlaqımız da hər zaman artıq olan hər bir şeyin, xüsusilə tamah və israfın əleyhinə olmuşdur. Atalarımız əbəs yerə deməyiblər ki, hər şey qədərində gözəldir!
M.HACIXANLI, “Xalq qəzeti”