Mayın 10-da Nizami Kino Mərkəzində Nəsimi Rayon İcra Hakimiyyətinin təşkilatçılığı ilə ulu öndər Heydər Əliyevin anadan olmasının 100 illiyinə həsr olunmuş tədbir keçirildi.

Tədbirdə Nəsimi Rayon İcra Haki­miyyətinin, YAP Nəsimi rayon təşkilatı­nın rəhbərliyi, rayondan seçilmiş depu­tatlar, səhiyyə, təhsil müəssisələrinin, rayonun idarə və təşkilatların rəhbər­ləri, şəhid ailələri, müharibə əlilləri, QHT-lərin rəhbərləri, rayon ictimaiyyə­tinin nümayəndələri və rayon gəncləri iştirak edirdilər.

Nəsimi Rayon İcra Hakimiyyətinin başçısı Asif Əsgərov məruzə ilə çıxış etdi. O diqqətə çatdırdı ki, xalqımız Azərbaycanın XX əsrin son 30 ilinə və XXI əsrin əvvəlinə təsadüf edən tarixi və taleyi dahi şəxsiyyət Heydər Əliye­vin adı və yaratdığı ideyalarla birbaşa bağlılığından qürur hissi keçirir. Vətə­nimiz üçün kifayət qədər mürəkkəb və keşməkeşli bir dönəmdə xalqına arxa olan ulu öndər Heydər Əliyev Azərbay­canın inkişaf tarixində silinməz izlər qoymuşdur: ”Heydər Əliyevin Azərbay­canın siyasi səhnəsinin birinci şəxsi kimi fəaliyyətə başlaması və onun ölkə həyatına gətirdiyi əzəmətli inkişaf ten­densiyası dahi şəxsiyyətlərin tarixin gedişində həlledici rol oynadıqlarını sübuta yetirmək üçün ən tutarlı nü­munədir. Azərbaycanın və Azərbaycan xalqının taleyində Heydər Əliyevin xi­laskarlıq və quruculuq missiyası özü­nün ifadəsini təkcə onun respublikamı­za uzun müddət rəhbərlik etməsində deyil, bəlkə də bundan daha çox bu rəhbərliyin kifayət qədər zəngin və dol­ğun məzmuna malik olmasında tapır”.

A.Əsgərov dedi ki, Heydər Əliyevin missiyası yalnız Azərbaycan dövləti­nin dayaqlarının möhkəmləndirilməsi, müstəqilliyin inkişafı və dövlətçilik ta­riximizin müasir mərhələsinin sürək­liliyinin təmin edilməsi kimi şərəfli bir vəzifəni yerinə yetirməklə məhdudlaş­madı. O, müstəqil Azərbaycan dövləti­nin yaradılması konsepsiyasını həyata keçirdi, eyni zamanda, Azərbaycan vətəndaşlarını birləşdirən, xalqımızı beynəlxalq aləmdə vahid amal, əqidə, məqsəd və məram uğrunda səfər­bər edən milli təlim – azərbaycançılıq ideologiyasını da yaratdı. 

Hazırda Azərbaycanın dünyanın inkişaf etmiş dövlətləri sırasına qoşul­masına münasibət bildirən A.Əsgərov bunu ulu öndərin siyasi kursunun la­yiqincə davam etdirilməsi ilə əlaqələn­dirdi. 

“Bu gün Prezident İlham Əliyevin gördüyü işlərin zirvəsində ərazi bütöv­lüyümüzü bərpa etməklə Ata vəsiyyə­tini yerinə yetirməsi dayanır. Prezident İlham Əliyev bu müddət ərzində tor­paqlarımızın işğaldan azad edilməsinə hazırlıq işləri çərçivəsində bütün zəruri addımların atılmasına nail oldu. Dövlə­timizin qətiyyəti, Prezident İlham Əliye­vin rəhbərliyi ilə rəşadətli ordumuzun gücü, qüdrəti, xalqımızın birliyi sayə­sində ulu öndərin şah əsəri olan güclü Azərbaycan dövləti öz suverenliyini, müstəqilliyini qorumağa qadir oldu”.

Qeyd edildi ki, ölkəmizin inkişafın­da, eləcə də Vətən müharibəsi dönə­mində Birinci vitse-prezident Mehriban xanım Əliyevanın müstəsna rolu, həmçinin, Heydər Əliyev Fondunun fəaliyyətinin əhəmiyyəti danılmazdır: “Xalqımız tam əmindir ki, möhtərəm Prezidentimizin dərin zəkası, xalqımı­za olan sevgisi və ordumuzun gücü, möhkəm hüquqi bazaya əsaslanan diplomatik qələbəmiz nəticəsində soy­daşlarımız doğma yurd-yuvalarına qa­yıdacaq, Azərbaycanın həyatında yeni dövr başlayacaqdır. Böyük Qayıdışın Prezident İlham Əliyevin və Birinci vit­se-prezident Mehriban xanım Əliyeva­nın səyləri nəticəsində möhtəşəm, par­laq olacağına əminik”. 

Sonra ulu öndərin həyat və fəaliy­yətindən bəhs edən video-çarx nüma­yiş etdirildi. 

Tədbir şair Zahid Əzizin ulu öndər Heydər Əliyevə həsr etdiyi şeir və Xalq artisti İlqar Muradovun ifa etdiyi mahnı­larla başa çatdı.

Ə.BƏDƏLOV, “Xalq qəzeti”