İki gün idi ki, ölkənin ünlü qələm sahibləri Şahdağın ətəklərində – Qubada əsrarəngiz təbiətin qoynunda toplaşmışdılar. Orada Azərbaycan Yazıçılar Birliyi (AYB) Ədəbiyyat Fondunun təşkilatçılığı ilə "Heydər Əliyev və Azərbaycan ədəbiyyatı" mövzusunda forum keçirilirdi. Konfrans dünya şöhrətli dahi şəxsiyyət Heydər Əliyevin anadan olmasının 100 illik yubileyinə həsr edilib. 

Ədəbiyyat Fondunun direktoru Varis Yolçuyevin təqdimatından sonra Azər­baycan Yazıçılar Birliyinin sədri Anar ulu öndər haqında özəl xatirələrini danışıb. Qeyd edib ki, Heydər Əliyevin sayəsində Azərbaycan ədəbiyyatı mükəmməl tarixi yol keçərək bugünkü səviyəsinə gəlib çatıb. “2023-cü il tariximizdə “Heydər Əliyev İli” kimi qalacaq. Heydər Əliyev şəxsiyyətinin Azərbaycanın dövlətçilik tarixində müstəsna yeri var. Azərbay­cançılıq məfkurəsinin parlaq daşıyıcısı kimi Heydər Əliyev öz müdrik siyasəti, dönməz əqidəsi və tarixi uzaqgörənli­yi sayəsində milli dövlətçilik ideyasının gerçəkləşdirilməsinə, müasir Azərbay­can dövlətinin qurulmasına və xalqımı­zın müstəqillik arzusuna çatmasına nail olub”.

Xalq yazıçısı bildirib ki, ulu öndər Azərbaycan xalqının misilsiz sərvəti olan klassik irsə, mədəniyyətin bütün sahələrinə məhz dövlətçilik mənafeləri prizmasından yanaşırdı. Bu baxımdan Heydər Əliyevin Azərbaycan ədəbi mü­hitinin inkişafında xidmətləri misilsizdir.

Tədbirdə Quba Rayon İcra Haki­miyyətinin başçısı Ziyəddin Əliyev çıxış edərək Heydər Əliyevin Azərbaycan ədəbiyyatının inkişafında göstərdiyi xid­mətlərdən danışıb. Millət vəkilləri – Xalq şairi Sabir Rüstəmxanlı, Aqil Abbas, Jalə Əliyeva, həmçinin Xalq yazıçısı Elmira Axundova, AYB sədrinin müavini Rəşad Məcid, AYB katibi Elçin Hüseynbəyli və başqaları ümummilli liderin ədəbiyyatı­mıza verdiyi töhfələrdən konkret faktlar əsasında söhbət açıblar. 

Yazarlar Səyyad Aran, Firuz Mus­tafa, Əkbər Qoşalı, Orxan Fikrətoğlu, Qəşəm Nəcəfzadə, Sayman Aruz, İbra­him İlyaslı, Ramiz Qusarçaylı və başqa­ları ətraflı məruzələr ediblər.

İki günlük konfrans zamanı həm də AYB-nin Heydər Əliyevə həsr etdiyi "Əbədi ömrün 100 ili" kitabının təqdi­matı olub. Qeyd edək ki, daha öncə ki­tab AYB-nin Natəvan klubunda təqdim olunmişdu və nəşrin bir çox bölgələrdə təqdimatının keçirilməsi nəzərdə tutulur. Kitab Mədəniyyət Nazirliyinin dəstəyi ilə işıq üzü görüb.

Əli NƏCƏFXANLI, “Xalq qəzeti”