Gəncə 

“Müasir təbiət və iqtisad elmlərinin aktual problemləri” mövzusunda bey­nəlxalq elmi konfransa qatılmaq üçün Gəncə Dövlət Universitetində (GDU) çoxsaylı alim, politoloq və pedaqoqlar bir araya gəliblər. Konfrans ümummilli lider Heydər Əliyevin anadan olması­nın 100 illiyinə həsr olunub. 

Əvvəlcə unudulmaz dahi şəxsiy­yətin zəngin və çoxşaxəli siyasi fəaliy­yətinə həsr olunan videoçarx nümayiş etdirilib.

Gəncə Dövlət Universitetinin rekto­ru Yusif Yusibov ulu öndərin ölkəmizin hərtərəfli inkişafı, qüdrətlənməsi na­minə misilsiz xidmətlərindən və böyük xilaskarlıq missiyasından danışıb. Tür­kiyənin Gəncədəki Baş konsulu Recep Öztop, Milli Elmlər Akademiyasının Gəncə Bölməsinin akademik katibi Fuad Əliyev ümummilli lider Heydər Əliyevin rəhbərliyi altında Azərbaycan­da elmin inkişaf mərhələləri və uğurlu nəticələrindən bəhs ediblər. Akademik Yusif Məmmədəliyev adına Neft-Kim­ya Prosesləri İnstitutunun direktoru, akademik Vaqif Abbasov, İzmir Dokuz Eylül Universitetinin prorektoru Fatma Duyğu və Gəncə Dövlət Universitetinin Botanika kafedrasının müdiri, Əmək­dar elm xadimi, professor Vaqif Novru­zov müxtəlif məruzələrlə çıxış ediblər.

Beynəlxalq konfransda mövzu ilə bağlı təqdim edilən 616 məqalə 6 cild­də nəşr olunub. Konfrans 15 bölmədə işini davam etdirib.

Sumqayıt 

Gənclik şəhərindəki ali təhsil oca­ğında – Sumqayıt Dövlət Universitetin­də (SDU) “Heydər Əliyev İli” çərçivə­sində Sumqayıt Dövlət Universiteti və Azərbaycan Milli Konservatoriyasının nəzdində Sumqayıt Musiqi Kollecinin birgə təşkilatçılığı ilə ümummilli lider Heydər Əliyevin anadan olmasının 100 illik yubileyinə həsr olunmuş konsert proqramı keçirilib.

Konsert proqramı ulu öndərin mə­nalı həyat yolundan bəhs edən video­çarxın nümayiş olunması ilə başlayıb. Sonra universitetin əməkdaşı Xalidə Quliyevanın ifasında şair Ramiz Duy­ğunun müəllifi olduğu “Ulu öndər” şeiri təqdim edilib.

Daha sonra Üzeyir Hacıbəyli, Fik­rət Əmirov, Oqtay Rəcəbov, Sərdar Fərəcov, Rauf Məmmədov kimi bəstə­karların əsərləri və musiqisi Sevil Əli­yevaya məxsus “Ana” mahnısı SDU və Sumqayıt Musiqi Kolleci tələbələrinin ifalarında təqdim olunub.

Kollecinin kamera orkestri və xalq çalğı alətləri ansamblının üzvləri və digər musiqiçilər ümummilli liderimizə həsr olunan mahnı və simfoniya əsər­ləri ilə bərabər, Vətən, qəhrəmanlıqla bağlı nəğmələr təqdim ediblər.

Sonda Sumqayıt Dövlət Univer­sitetinin rektoru, professor Elxan Hü­seynov və Sumqayıt Musiqi Kollecinin direktoru, sənətşünaslıq üzrə fəlsəfə doktoru, dosent Səbinə Mehdiyeva iştirakçıları salamlayıb və tələbələrin uğurlu çıxışlarını yüksək dəyərləndi­riblər. Qeyd ediblər ki, tariximizə qızıl hərflərlə həkk olunmuş müstəqil Azər­baycan Heydər Əliyevin şah əsəridir. Şübhə yoxdur ki, xalqımız dahi rəhbəri özünün tarixində və qəlbində əbədi ya­şadacaq.

Masallı 

Yeni Azərbaycan Partiyası ra­yon təşkilatının, Regional Mədəniyyət İdarəsi və Masallı Dövlət Regional Kol­leci ərazi partiya təşkilatlarının birgə dəstəyi ilə Nizami Gəncəvi adına Mə­dəniyyət Mərkəzində “Heydər Əliyev İli” çərçivəsində “O, Heydər Əliyevdir!” mövzusunda tədbir keçirilib.

YAP fəallarının, kollecin müəllim və tələbə kollektivinin iştirak etdiyi tədbir­də əvvəlcə ümummilli lider Heydər Əli­yevin və şəhidlərin xatirəsi bir dəqiqəlik sükutla yad olunub.

Tədbiri açan YAP rayon təşkilatı­nın sədri Seyfəddin Əliyev ulu öndərin xalqımız qarşısındakı misilsiz xidmət­lərindən danışaraq dünya liderlərinin dahi şəxsiyyət haqqında fikirlərindən sitatlar səsləndirib. Qeyd olunub ki, öz tarixinin qızıl əsrini keçmişdə axtarma­ğa adət etmiş bir çox xalqlardan fərqli olaraq, Azərbaycanın həqiqi intibahı­nın müasirləri olduğumuz dövrə təsa­düf etdiyi ictimai düşüncənin birmənalı qəbul etdiyi həqiqətlərdəndir. Heç şübhəsiz, bütün bunların üzərinə vurulmuş müasirlik möhürü Heydər Əliyevin adı və titanik fəaliyyəti ilə bilavasitə əlaqə­dardır.

Masallı Regional Mədəniyyət İdarə­sinin rəisi Bəxtiyar Qılıncov Heydər Əliyev və müstəqil Azərbaycanın mə­dəniyyət siyasətindən söhbət açıb. Tədbirdə YAP rayon təşkilatı tərəfin­dən ümummilli lider Heydər Əliyevin 100 illiyi ilə əlaqədar siyasi və ictimai fəallara fəxri fərmanlar verilib. 

Yekunda Masallı Xalq Teatrı akt­yorlarının və Masallı Dövlət Regional Kolleci tələblərinin ifasında ulu öndərə həsr edilmiş “Möhtəşəm Qala” kompo­zisiyası nümayiş olunub.

Şəki 

Ulu öndər Heydər Əliyev hər zaman böyüyən nəslin hərtərəfli inkişafı, uşaq­ların istedad və qabiliyyətlərinin aşkara çıxarılması üçün zəruri tədbirlərin gö­rülməsinin qayğısına qalırdı. Mədəniy­yət, Elm və Təhsil nazirliklərinin birgə təşkil etdiyi Uşaq İncəsənət Festivalı da məhz ümummilli lider Heydər Əliye­vin 100 illik yubileyinə həsr olunub. 

Şəki Regional Mədəniyyət İdarəsi­nin əhatə etdiyi rayonlarda festivalın ilk mərhələsi uğurla başa çatıb. İyir­mi gün davam edən seçim turlarında Şəki, Oğuz, Qax, Zaqatala və Balakən rayonlarından 638 fərdi ifaçı və 25 xalq çalğı alətləri, rəqs və xor kollektivi müxtəlif nominasiyalar üzrə öz istedad və qabiliyyətlərini sərgiləyiblər. Seçim turlarında fərqlənən ifaçılar və kollek­tivlər festivalın ikinci mərhələsində işti­rak etmək hüququ qazanıblar.

Qeyd edək ki, 6-17 yaş arasında olan uşaqların iştirakı ilə 21 nomina­siya üzrə keçirilən Uşaq İncəsənət Festivalı ölkəmizdə milli mədəniyyətin və incəsənətin təbliği, uşaqlarda bə­dii-estetik zövqün formalaşdırılması, mədəniyyətin çeşidli sahələrinə mara­ğın artırılması və yeni istedadların üzə çıxarılması məqsədi daşıyır.

Yardımlı 

Rayon icra hakimiyyətinin, Yardım­lı rayon Təhsil Sektorunun, həmçinin Gənclər və İdman İdarəsinin birgə təş­kilatçılığı ilə ümummilli lider Heydər Əliyevin anadan olmasının 100 illiyi münasibətilə “Ulu öndər Heydər Əliye­vin irsi milli sərvətimizdir” mövzusunda tədbir keçirilib.

Tədbirdə əvvəlcə ulu öndərin və Azərbaycanın ərazi bütövlüyü uğrun­da canından keçən şəhidlərimizin əziz xatirəsi yad olunub. RİH başçısının müavini – İctimai-siyasi və humanitar məsələlər şöbəsinin müdiri Əfsanə Məmmədova çıxış edərək Heydər Əliyevin azərbaycançılıq, vətənpər­vərlik ideyalarına əsaslanan həyatın­dan və zəngin irsinin gələcək nəsillər üçün xəzinə olduğundan söhbət açıb, dünya şöhrətli dahi şəxsiyyətin irsinin daim öyrənilməsi və təbliğ edilməsinin vacibliyini xüsusi qeyd edib.

Təhsil sektorunun müdiri Ka­mal Təhməzov və Gənclər və İdman İdarəsinin rəisi Şəhriyar Şabiyev çıxış edərək bildiriblər ki, bu gün ölkəmizdə və onun hüdudlarından kənarda uğur­la həyata keçirilən layihələr, görülən nəhəng işlər Heydər Əliyev ideyalarını, onun azərbaycançılıq fəlsəfəsini, döv­lətçilik irsini yaşatmaqdadır. Müstəqil Azərbaycan var olduqca, onun quru­cusu – ulu öndər Heydər Əliyevin əziz xatirəsi də əbədi yaşayacaq.

Biləsuvar 

Rayon icra hakimiyyətinin təşki­latçılığı ilə “Azərbaycan Respublika­sında 2023-cü ilin “Heydər Əliyev İli” elan edilməsi haqqında” Azərbaycan Respublikası Prezidentinin imzaladığı Sərəncama uyğun olaraq “Azərbayca­nın müstəqilliyi əbədidir, sarsılmazdır və dönməzdir” mövzusunda keçirilən elmi-praktik konfrans maraqla qarşı­lanıb. 

Heydər Əliyev Mərkəzində keçi­rilən konfranda Azərbaycan Respubli­kasının Dövlət Himni səsləndirildikdən sonra ulu öndər Heydər Əliyevin, eləcə də ölkəmizin ərazi bütövlüyü və suve­renliyi uğrunda mübarizədə canlarını qurban vermiş şəhidlərimizin xatirəsi bir dəqiqəlik sükutla yad edilib. Ardınca ümummilli liderin həyat və fəaliyyətin­dən bəhs edən film nümayiş olunub.

Geniş məruzə edən rayon icra ha­kimiyyətinin başçısı Faiq Qürbətov bildirib ki, ümummilli lider çoxəsrlik dövlətçilik tariximizdə yeni parlaq sə­hifə açan nadir, bənzərsiz şəxsiyyətdir. Bütün həyatını xalqının xoşbəxt gələ­cəyinə, qüdrətli Azərbaycan dövlətinin yaradılmasına və inkişafına həsr etmiş bu dahi şəxsiyyətin Vətən və xalq qar­şısındakı xidmətləri misilsizdir. 

Konfransda Milli Məclisin deputatı Bəhruz Məhərrəmov, YAP Biləsuvar rayon təşkilatının sədri Kamil Qurbanlı və digərləri çıxış edərək Azərbaycan xalqının ümummilli lideri Heydər Əliye­vin həyat və fəaliyyəti, onun Azərbay­can tarixindəki rolu barədə geniş mə­lumat veriblər. 

Hazırladı: Ə.ƏLİYEV, “Xalq qəzeti”