Artıq çəkidən qurtulmağın bir çox yolu var. Bəziləri yüksək kalorili qidaların istifadəsini məhdudlaşdırır, digərləri fiziki aktivliyi artırır, başqaları isə arıqlamaq üçün həblərə əl atırlar. Arıqlamaq arzusunda olan insanlar tərəfindən istifadə edilən dərman bitkilərinin üstünlükləri var. Onlar maddələr mübadiləsini yaxşılaşdırır, mədə-bağırsaq traktının işini normallaşdırır, sinir sistemini sakitləşdirir, fiziki dözümlülüyü və fiziki fəaliyyəti artırır.
Həkimlər aşağıdakı bitkilərə diqqət yetirməyi məsləhət görürlər:
Çəmən otu: – Müasir tibbdə bitkidən antioksidant və iltihab əleyhinə istifadə edilir. Maddələr mübadiləsini yaxşılaşdırır və arıqlamağa kömək edir. Liflə zəngin olan bitkinin toxumları bağırsaqlarda əmələ gələn lipidlərə və qlükozaya təsir edir.
Qırmızı bibər: – Piylənməyə qarşı profilaktik tədbir olaraq istifadə edilir. Müntəzəm olaraq ədviyyat kimi qəbulu arıqlamağa kömək edir. Çəmənotu kimi qırmızı acı bibər də toxluq hissi yaradır. Maddələr mübadiləsini sürətləndirir və termogenezi yaxşılaşdırır. Bədəndə yağ yandırma sürətini artırmağa kömək edir.
Zəncəfil: – Kökünün köməyi ilə arıqlamanın təsirini alimlər nadir kimyəvi maddələr olan gingerol və şoqalom ilə əlaqələndirirlər. Zəncəfil maddələr mübadiləsini sürətləndirir, iştahı azaldır və tez arıqlamağa kömək edir. Elmi təcrübələr göstərib ki, zəncəfilin içki şəklində qəbulu həm ümumi bədən çəkisini, həm də qarın yağını azaltmaq qabiliyyətinə malikdir.
Yaşıl çay: – Qədim zamanlarda ömrü uzadan bitki kimi qiymətləndirirdilər. Onun əsasında hazırlanan içkilər xərçəng, insult, infarkt və digər ciddi xəstəliklərin kompleks terapiyası və qarşısının alınmasında istifadə olunur. Yaşıl çay qanda “pis” xolesterinin səviyyəsini aşağı salır, yaddaşı stimullaşdırır, beyin fəaliyyətini yaxşılaşdırır, sümükləri bərkidir və qan damarlarını gücləndirir. Tərkibindəki antioksidant maddələr mübadiləsini yaxşılaşdırır və yağların yandırılmasına və arıqlamağa kömək edir.
Çobanyastığı: – Dəmləməsi sinir sistemini sakitləşdirir, soyuqdəyməni müalicə edir və bədəndən artıq mayenin çıxarılmasına səbəb olur. Həzm funksiyasını yaxşılaşdırır, maddələr mübadiləsini sürətləndirir, yağların daha sürətli yanmasına kömək edir.
Z.HÜSEYNOVA, “Xalq qəzeti”
