Məşhur fransız alimi Lui Pasterin belə bir aforizmi var: “Elmin Vətəni yoxdur, lakin alimin Vətəni olmalıdır”. Füzuli rayonunda dünyaya göz açan Hətəm Quliyev ADU-nun (BDU) mexanika-riyaziyyat fakültəsini bitirmişdir. AMEA-nın Riyaziyyat və Mexanika İnstitutunda könül verdiyi geologiya və geofizika elminin sirlərinə mükəmməl yiyələnmişdir. Elmi fəaliyyətini bir müddət Kiyev şəhərində davam etdirəndən sonra ötən əsrin 80-ci illərində akademik Midhət Abbasovun dəvəti ilə Vətənə qayıtmışdır. Elmi fəaliyyətini AMEA-nın Dərin Neft Quyuları İnstitutunda çalışarkən dünyanın əksər ölkələrində elmi məruzələrlə çıxışlar etmişdir. Hətəm müəllim həm respublikamızın, həm də xarici ölkələrin nüfuzlu elmi qurumlarında təmsil olunmuşdur.
Akademik Hətəm Quliyevin üzərində yaşayıb, yaratdığımız yer kürəsinin və kainatın geofizik strukturlarının proqnozlaşdırılması, qanunauyğunluqların aşkarlanması sahəsində xüsusi xidmətləri olmuşdur. Vaxtilə onun elmi naliyyətləri haqqında Ukrayna Elmlər Akademiyasının Geofizika İnstitutunun direktoru, akademik B.Starostenko, Rusiya Elmlər Akademiyasının həqiqi üzvü, həmin akademiyanın Geosferlərin Geodinamikası İnstitutunun elmi rəhbəri B.Aduşkin, Norveçin Bergen Universitetinin geofizika üzrə fəxri professoru Karsten M.Stortbedet, Beynəlxalq Geofizika Cəmiyyətinin prezidenti, BP şirkətinin baş geofiziki Leon Tomsen və başqa dünyaşöhrətli elm xadimləri və mütəxəssisləri dəyərli fikir söyləmişlər.
Hətəm müəllimin adının mənası“qanun verən, qət edən, əliaçıq, səxavətli” deməkdir. O, ilk dəfə ümumdünya geofizika nəzəriyyələr sisteminin yenillənmiş modellərinin xətti xüsusiyyətlərini ixtira etmiş dahi şəxsiyyət, görkəmli elm xadimi olduğu qədər də dərin ədəbiyyat, incəsənət, musiqi, folklor bilicisi idi. Haqqında yazılan xatirələrdən görünür ki, Hətəm müəllim zamanında heç vaxt insanlardan öz isti, doğma münasibətini, səxavətini əsirgəməyib, hər zaman onların qeydinə qalıb. Qələm dostum, şair-publisist Əbülfət Mədətoğlu “İç dünyamın adamları” kitabında yazır: “…Hətəm müəllim kimi insanları Allah doğulduğu elə, obaya, yurda, məmləkətə böyük sevgiylə hədiyyə edir. Onların timsalında həmin el-obaya, məmləkətə, millətə sayğısını büruzə verir. Hətəm müəllim kimi insanlar dünyanın dayanıqlığını, tarazlığını qorumaq üçün doğulanlar sırasında da yer tutmağa haqq ediblər...”
Əməkdar jurnalist Əflatun Amaşovun təbirincə desək, Hətəm müəllim həm də “Göylərin alimi” idi. Onun düşüncəsi, yanaşması, baxışı son dərəcə fərqliydi. O, hər bir yaşanmış hadisəyə ailə, iş yeri, ölkə, Yer kürəsi, Günəş sistemi, milyonlarla qalaktikalar prizmasından deyil, daha geniş baxırdı. Çünki o, varlıqla yoxluğun, sonsuzluğun astanasınadək gedib çıxmışdı. Sonsuzluq divarının o tərəfindəki paralel dünyada da nələrin baş verəcəyi barədə elmi mühakimə yürüdə bilmək zənginliyinə malik idi...
İxtisasca jurnalist olan ömür-gün yoldaşı Kəmalə xanım Hətəm müəllim barədə yazır: “O, inadkar, mərd idi. Möhkəm iradə sahibi idi. Qərar verməkdə tələsməzdi. İnsanları sevirdi. Qohumluqda, yoldaşlıqda sədaqətliliyi ilə fərqlənirdi. Etibarlı dostları vardı. Bir sözlə, sözün əsil mənasında, mükəmməl idi. Zamanın gətirdiyi sel özülündən zərrə qədər də olsun qopara bilməmişdi. Dünyaya vergi idi, dünya onu saxlaya bilmədi, itirdi!”
Əməkdar elm xadimi, akademik Hətəm Quliyev 2021-ci il aprelin 21-də haqqın dərgahına qovuşub. Allah rəhmət eləsin!
Nurəddin ƏDİLOĞLU,
yazıçı-jurnalist