Avropa İttifaqının (Aİ) maliyyələşdirdiyi “Vaksinasiyaya Dəstək” layihəsi çərçivəsində Ümumdünya Səhiyyə Təşkilatı (ÜST) BMT-nin Uşaq Fondu (UNICEF) ilə birlikdə aprelin 24-dən 29-dək Azərbaycanda Avropa immunlaşdırma həftəsi ilə bağlı silsilə tədbirlərə başlayıb.
ÜST-ün tövsiyəsinə əsasən, 6 aprel 2023-cü il tarixində Səhiyyə Nazirliyi tərəfindən respublikanın bütün şəhər və rayonlarında “İmmunlaşdırma həftəsi” keçirilməsi ilə bağlı əmr imzalanıb. Bu əmrə uyğun olaraq, ÜST-ün texniki dəstəyi ilə 2022-ci ilin göstəricilərinə görə peyvəndlərlə əhatə səviyyəsi nisbətən aşağı olan 11 rayonda monitorinqlər keçiriləcək. Eyni zamanda, bu rayonların 4-də – Göygöl, Mingəçevir, Yevlax və Qobustanda ÜST və UNICEF Azərbaycan Respublikası Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB) və İcbari Tibbi Sığorta üzrə Dövlət Agentliyinin təşkilatçılığı ilə “Peyvəndin vaxtını gecikdirmə! Hər doza vacibdir!” – şüarı altında valideyn konfransları təşkil edəcək.
Ümumdünya Səhiyyə Təşkilatının Azərbaycandakı nümayəndəliyindən aldığımız məlumatda bildirilir ki, kampaniya müddəti boyunca əhaliyə ÜST tərəfindən hazırlanmış rutin immunlaşdırma ilə bağlı maarifləndirici materiallar, o cümlədən rutin peyvəndlərə bağlı miflər haqqında sual-cavab şəklində hazırlanmış broşür və peyvəndlə qarşısı alına bilən xəstəliklər haqqında yenilənmiş kitabça təqdim ediləcəkdir. Həmçinin bu il ÜST-ün Avropa regionunda qızılca və məxmərək infeksiyasına yoluxma hallarının artmasını nəzərə alaraq, bu xəstəliklər haqqında məlumatların əks olunduğu posterlər əhali arasında paylanılacaqdır. Bundan başqa, bu kampaniyadan kənarda qalan uşaqların peyvənd olunmağa dəvət edilməsi istiqamətində iş aparılacaqdır.
Azərbaycanda COVID–19 pandemiyasına qarşı mübarizə və rutin immunlaşdırma proqramlarının gücləndirilməsi məqsədilə ÜST-ün Azərbaycandakı ofisi 2021-ci ilin iyun ayından etibarən, Avropa İttifaqının maliyyə dəstəyi ilə üç illik “COVID–19 əleyhinə Vaksinasiyaya Dəstək” layihəsini həyata keçirməyə başlayıb. Layihə Avropa İttifaqı və Ümumdünya Səhiyyə Təşkilatının Azərbaycana davamlı dəstəyinin tərkib hissəsidir.
Z.HÜSEYNOVA, “Xalq qəzeti”