Siz bu yaşıllıqlara, ağaclara, kollara, çəmənliklərə bir baxın. Gözəl deyilmi?
Bəri başdan deyim ki, çoxunun düşündüyü kimi, xarici ölkə mənzərələri deyil, Göygöl rayonunda çəkilmiş şəkillərdir. Bilirsiniz niyə göz oxşayır, hamısı bir ölçüdə-biçidədir? Çünki bu rayonda yaşıllıqlara xüsusi aqrotexniki qulluq var.
“Göygölün özü necədirsə, onun adını daşıyan rayonun yaşıllığı da o cür olmalıdır...”.
Rayon icra hakimiyyətinin başçısı Elvin Paşayevin hələ Göygöl ictimaiyyəti ilə yaxından tanış olduğu ilk günlərdə tez-tez dediyi bu sözlər sanki ayrı-ayrı təsərrüfat rəhbərlərini, bu işə məsul şəxsləri bir növ səfərbərliyə aldı. Xüsusilə aqrotexniki qulluğun müasir, daha səmərəli forma və üsullarının ön plana çəkilməsi özünü büruzə verdi və nəticə də göz qabağındadır.
–Bilirsiniz, yaşıllıq çox yerdə var, lakin hamısı eyni deyil, – deyə Göygöl Dövlət Aqrar İnkişaf Mərkəzinin rəhbəri Elməddin Əhmədov söhbət zamanı ona qulluğun nə qədər vacib olduğunu bildirdi, – gərək hər bir ağacın, kolun başına pərvanə kimi dolanasan, onlara xüsusi forma verəsən, hər gün nəzarət edəsən, suvarasan. Yoxsa “mən yaşıllığı sevirəm” deməklə məsələ bitmir. Elə gün olmaz ki, Elvin müəllim yaşıllıqlarla, onlara aqrotexniki qaydada qulluq göstərilməsi ilə maraqlanmasın. Özü də gözəl zövqü var...
Qeyd edək ki, Göygöl Dövlət Aqrar İnkişaf Mərkəzinin əməkdaşları tərəfindən rayonun istirahət guşələrində bitki mühafizə tədbirləri aparılıb. Mərkəzin bitki mühafizəsi və fumiqasiya xidmətinin əməkdaşları yaşıllıqlara bioorqanik yemləmə gübrəsi, xəstəlik və zərərvericilərə qarşı müxtəlif növ pestisidləri tətbiq ediblər. Xüsusi çiləyici texnika və aqreqatlardan istifadə olunmaqla həmişəyaşıl və dekorativ ağaclara aqrotexniki qulluq tətbiqləri aparılıb. Özü də bu iş artıq rayonda elə bir sistem şəklinə salınıb ki, artıq heç kəs təbiətin qorunmasına, yaşıllıqların artırılmasına və ona qulluq göstərilməsinə laqeyd deyil. Novruz bayramı ərəfəsində Yeni Zod kəndinin ətrafında ağacəkmə aksiyası keçirmək barədə təşəbbüs irəli sürüləndə, az qala, bütün kənd camaatı o tədbirə axışmışdı.
…Göygöl rayonu qısa vaxt ərzində öz görkəmini çox dəyişib. Hər bir istirahət guşəsi, park və xiyabanlar öz gözəlliyi və orijinallığı ilə bura gələnlərin diqqətini cəlb edir. Bu kiçik yazıda həmin gözəlliyi sözlə və şəkillərlə göstərməyə çalışdıq.
Hamlet QASIMOV,
“Xalq qəzeti”nin bölgə müxbiri