Amerikalı alimlər insan orqanizmində olan mikrobların əhval-ruhiyyəyə təsir etmək qabiliyyətini, əsasən də aqressiya yaradan səbəbi aşkar ediblər. Öyrəniblər ki, ac olduqda aqressivliyi yaradan Clostridium perfringens bakteriyasıdır. Aqressiya növlərinə görə beş yerə bölünür:
1. Fiziki aqressiya–fiziki təsir göstərməklə;
2. Dolayısı aqressiya–gizli yolla konkret şəxsə yönləndirilməyən;
3. Qıcıqlanma– xarici qıcıqlandırıcılara qarşı yüksək həssaslıq, sərt emosional reaksiya;
4. Şifahi (verbal) aqressiya–neqativ hisslərin söz üsulu ilə büruzə verilməsi;
5. Neqativizm – qoyulmuş qaydalara qarşı passiv və ya aktiv əks- reaksiya.
Torpaqda yaşayan çubuqşəkilli bakteriya olan Clostridium perfringen qida maddələri olmadıqda insanı qıcıqlandıran zərərli toksinlər istehsal edir. Həmin toksinlər əsəb sistemini oyadır və bu zaman insan həddindən artıq aqressivlik nümayiş etdirir. Bununla belə, elm adamları apardıqları tədqiqatlarla prosesi ləngitməyi öyrəniblər. Bu kəşfin antibiotiklərsiz heyvanlar və insanlar üçün yeni müalicə üsullarının tapılmasına kömək etdiyi güman edilir.
Z.BƏŞİRQIZI, “Xalq qəzeti”