Prezident İlham Əliyevin rəhbərliyi ilə Azərbaycanın enerji təhlükəsizliyi sahəsində görülmüş işlər mühüm əhəmiyyəti ilə seçilir. Vətən müharibəsində qazandığımız qələbədən sonra ölkəmizdə “yaşıl enerji” layihələrində yeni mərhələnin başlanması isə bu sahədə qarşıya qoyulmuş hədəfləri daha da aktuallaşdırıb. 

Ötən dövrdə paytaxt Bakı şəhəri ilə yanaşı, ölkəmizin digər bölgələrində də bərpaolunan enerji layihələri üçün poten­sial ehtiyat bir daha nəzərdən keçirilib, bu istiqamətdə müvafiq addımlar atılıb. “Yaşıl enerji” konsepsiyasının Naxçıvan Muxtar Respublikasında geniş tətbiqi üzrə yara­dılan işçi qrupunun bölgəyə səfəri də bu baxımdan önəmli oldu. 

Qeyd edək ki, bu il fevralın 3-də Ba­kıda Cənub Qaz Dəhlizi Məşvərət Şurası çərçivəsində keçirilən nazirlərin 9-cu və Yaşıl Enerji Məşvərət Şurası çərçivə­sində nazirlərin 1-ci iclasında Prezident İlham Əliyev bildirmişdi ki, Azərbaycan hökuməti Naxçıvan Muxtar Respubli­kasında ən azı 500 meqavatlıq günəş elektrik stansiyasının tikintisinin müm­künlüyünü nəzərdən keçirir. Dövlətimizin başçısı mövcud potensialın bundan da artıq olduğunu diqqətə çatdırmışdı. Elə bu istiqamətdə həyata keçirlən tədbir­lərin davamı kimi energetika nazirinin müavini Elnur Soltanovun rəhbərlik etdi­yi işçi qrupunun Naxçıvana səfərində bir sıra istiqamətlərdə müzakirələr aparıldı, həyata keçiriləcək pilot layihələrlə bağlı müəyyən olunmuş ərazilərə baxış keçi­rildi. 

Energetika nazirinin müavini səfərin sonunda qəzetimiz üçün açıqlamasın­da bildirdi: “Hazırda ölkə Prezidentinin tapşırığı ilə Naxçıvanda “yaşıl enerji” zonasının tələblərinə uyğun olaraq ener­getika sisteminin yenidən qurulması gün­dəmdədir. Naxçıvanın Türkiyəyə sərbəst çıxışının olması burada istehsal ediləcək enerjini digər bazarlara da yönəltməyə im­kan verəcək”. 

Energetika Nazirliyi yanında Bərpa Olunan Enerji Mənbələri Dövlət Agent­liyinin direktoru Cavid Abdullayev isə görüləcək işlər barədə dedi: “Naxçı­vanda çox böyük günəş potensialı var. Həmçinin hazırda müəyyən ərazilər var ki, küləyin potensialı orada külək elektrik stansiyalarının qurulması üçün yetərlidir. Bu baxımdan çox ciddi şəkildə işlərə baş­lanılıb. Müsahibimiz onu da vurguladı ki, təxminən 8 min hektardan çox ərazi var ki, onlar bərpa olunan enerji mənbələri stansiyalarının tikilməsi üçün tam şəkildə yararlı vəziyyətdədir”. 

Öyrəndik ki, Naxçıvanda “yaşıl enerji” konsepsiyasını reallaşdıracaq işçi qrupun işi iki istiqamətdə müəyyənləşdirilib. Birin­cisi, uzunmüddətli strateji planda Naxçı­vanın “yaşıl enerji” zonasına çevrilməsi, ikincisi isə, uzunmüddətli plan başlanana­dək görüləcək hazırlıq işləridir. Xatırladaq ki, hazırda Babək rayonunda 22 meqavat, Kəngərli və Şərur rayonlarının hər birində 5 meqavat gücündə günəş, Culfa rayo­nunda isə külək elektrik stansiyası fəaliy­yət göstərir. 

İşçi qrupla aparılan müzakirələrdə də qeyd olundu ki, ötən dövrdə muxtar respublikada bərpaolunan enerji mən­bələrində enerji istehsalının həcmi bəzi illərdə ənənəvi enerji istehsalının 60 fai­zinə bərabər olub. Bu da onun göstərir ki, Naxçıvanın çox böyük enerji potensialı var. Bunu da nəzərə alaq ki, artıq muxtar respublika uzun illərdir onunla qonşu olan ölkələrin energetika sisteminə inteqrasi­ya olunub, həmçinin bu ölkələrin ildən-ilə enerjiyə tələbatı artır. 

Beləliklə, gələcəkdə muxtar respubli­kada enerji istehsalının həcminin artma­sı ixrac üçün daha böyük imkan yaradır. Digər tərəfdən, Naxçıvanı Azərbaycanın əsas hissəsi ilə birləşdirəcək Zəngəzur dəhlizinin açılması təbii iqlim şəraiti yaşıl enerji istehsalı üçün münasib olan Qərb bölgələrimizdə istehsal ediləcək elektrik enerjisinin muxtar respublika vasitəsilə ixracına yaşıl işıq yandırır. Buradan isə o nəticəyə gəlmək mümkündür ki, Naxçıvan gələcəkdə həm də “yaşıl enerji” dəhlizinə çevriləcək.

Səbuhi Həsənov,
“Xalq qəzeti”