Orqanizmdə baş verən dəyişik­liklər müxtəlif xəstəliklərin xəbərçisi ola bilər. Adi vaxtdan fərqli olaraq bəzən hiss etdiyiniz beş siqnal sağlı­ğınızdakı problemlərdən xəbər verə bilər. Buna görə də hər dəyişiklik barədə düşünmək lazımdır. Həmin 5 dəyişikliyi diqqətinizə çatdıraq.

Başgicəllənmə – çox sürətlə ye­riməyin, qəflətən ayağa qalxmağın və ya bir qədər susuzluğun nəticəsi ola bilər. Ancaq başgicəllənmə beyin, qan damarları, ürək və ya mədə-bağırsaq sistemində problemin siqnalı da ola bilər. Digər mümkün səbəb anemiya­nı xarakterizə edən aşağı hemoqlobin tərkibidir.

Başgicəllənməyə səbəb olan digər problemlər də var. Bunlar daxili qula­ğın viral infeksiyası, hipertoniya, çox aşağı qan təzyiqi, yüksək və ya həd­dindən artıq aşağı qan şəkəri və qalxa­nabənzər vəzinin xəstəlikləri. 

Tərləmə – və ya hiperhidroz meno­poz, piylənmə, normadan artıq məşq nəticəsində yaranır. Həddindən artıq tərləməyə tiroid vəzi ilə bağlı problem­lər, diabet, ürəyin işində pozuntular, infeksiyalar və xərçəng də səbəb olar.

Soyuqluq – başqa sözlə, davamlı üşümə hissi hipotiroidizm, anemiya, zəif qan dövranı, hipoqlikemiya (aşağı qan şəkəri), dəmir və ya müəyyən vita­min çatışmazlığı kimi sağlamlıq prob­lemləri haqqında bədəndən gələn bir siqnaldır.

Səbəbsiz arıqlama – nəzarətsiz çəki itkisi tez-tez stress, depressiya və­ziyyətində baş verir və ya dərmanların, eləcə də parazitlərin infestasiyasının yan təsiri kimi baş verir. Səbəbsiz çəki itkisi qalxanabənzər vəzinin xəstəliklə­ri, mədə-bağırsaq traktının patologiya­ları, ürək-damar xəstəlikləri, QİÇS, de­mans, xərçəng kimi xəstəliklər zamanı da müşahidə edilir.

Dəridə ləkələr – qeyri-adi xal və ya ləkələr dəri xərçənginin əlaməti də ola bilər. Dəri Xərçəngi Fondunun məlumatına görə, əgər xal və ya çillər yuvarlaq, simmetrikdirsə və forması dəyişmirsə, narahat olmağa dəyməz. Lakin böyüyərsə, asimmetrik görünür­sə və ya sərhədləri aydın deyilsə, onlar melanoma – dəri xərçənginin əlaməti ola bilər.

Z.HÜSEYNOVA, “Xalq qəzeti”