Bu gün Azərbaycanın idman ictimaiyyətinin bayramıdır. Ölkəmiz 5 mart Bədən Tərbiyəsi və İdman Gününü qeyd edir. Həyatımızda özünə gənclik, gözəllik və sağlamlıq bayramı kimi layiqli yer edərək, bütün idman adamlarımızın ürəyindən olmuş bu tarixi günə Prezident İlham Əliyevin 2005-ci il martın 4-də imzaladığı sərəncamla start verilmişdir. O vaxtdan Bədən Tərbiyəsi və İdman Gününü yüksək fəallıq şəraitində, sağlamlıq və gümrahlıq məşğələlərinə, eləcə də, böyük idmana sevgi və məhəbbətlə bayram edirik.

Bədən tərbiyəsi və idman məşğələlə­rinin asudə vaxtımızın təşkilində, gənc nəslin sağlam və gümrah böyüməsində, oğlan və qızların hərbi-vətənpərvərlik tərbiyəsində, fiziki hazırlığında, nəcib keyfiyyətlərə yiyələnməsində mühüm rol oynadığı indi heç kimə sirr deyil.

Xüsusilə əlamətdar haldır ki, id­man ictimaiyyətimizin, əslində uşaqdan tutmuş böyüyədək hər birimizin, hər ailənin daim sevinclə gözlədiyi 5 mart günü bu dəfə ulu öndər Heydər Əliyevin anadan olmasının 100-cü ildönümünun qeyd olunduğu ilə təsadüf edir.

İnsan həyatının ayrılmaz tərkib hissəsi kimi bədən tərbiyəsi və idman məşğələlərinə daim böyük əhəmiyyət vermiş bu dahi şəxsiyyət respublikamı­za rəhbərlik etdiyi uzun illər ərzində öz çıxışlarında onların faydası və qüdrəti haqqında yüksək fikirlər söyləmiş, sağ­lamlığımıza və gümrahlığımıza xidmət edən startların hər yerdə kütləvi hal al­ması zərurətini xüsusi qeyd etmişdi.

Belə qayğı və diqqətin nəticəsidir ki, Azərbaycanda inşa edilmiş yaraşıqlı id­man mərkəzlərində, əlliyə qədər Olimpi­ya İdman Kompleksində və digər idman qurğularında məşq və yarışlar üçün hər cür şərait yaradılmışdır, onlarda mö­təbər turnirlər yüksək səviyyədə təşkil olunur və hamı təşkilatçılara minnətdar­lığını bildirir.

Azərbaycan bədən tərbiyəçiləri və idmançılarının builki bayramı həm də Paris Olimpiadası–2024-ə lisenziya xarakterli yarışlarla əlamətdardır. Bu il güləş, cüdo, boks, taekvondo, gim­nastika və bir sıra başqa növlərdə ən yaxşı idmançılarımızı olimpiya "biletlə­ri" uğrunda gərgin mübarizə gözləyir. Ağır sınaqlardan şərəflə çıxanlar gələn il Fransa paytaxtında növbəti Olimpiya oyunlarında Vətənimizi təmsil etmək hüququ qazanacaqlar. Olimpiyaçı ol­maq, medal sevinci yaşamaq, fəxri kür­südə təbrikləri qəbul etmək isə böyük xoşbəxtlikdir.

Bu gün Azərbaycanın bütün guşələ­rində bayram sevinci yaşanır. Ölkəmizin hər yerində, o cümlədən Vətən müha­ribəsində erməni işğalçıları üzərində möhtəşəm qələbəmizdən sonra işğal­dan azad edilmiş ərazilərdə – Şuşada, Suqovuşanda artıq beynəlxalq yarışlar təşkil olunur. Olimpiyaqabağı 2023-cü ildə belə yarışların miqyası daha da ge­nişlənəcək.

Ölkəmizdə bədən tərbiyəsi və id­man məşğələləri dövlətin, şəxsən ölkə başçısı, Milli Olimpiya Komitəsinin pre­zidenti İlham Əliyevin daimi qayğısı ilə əhatə olunub. Bu istiqamətdə atılan inamlı addımlar, həyata keçirilən təxirə­salınmaz tədbirlər, görülən böyük işlər artıq çoxdandır Azərbaycanın dünyada qüdrətli idman dövləti kimi tanınmasın­da mühüm rol oynamışdır.

Ümummilli lider Heydər Əliyev çıxış­larından birində bu barədə fəxrlə demiş­di: “İdman elə bir sahədir ki, idmançıları­mız müxtəlif ölkələrdə yarışlarda iştirak edir, qələbələr qazanırlar və hər dəfə müstəqil Azərbaycanın adını ucaldırlar. Müstəqil Azərbaycanın himni çalınır, müstəqil Azərbaycanın bayrağı qaldı­rılır və müstəqil Azərbaycan dünyanın müxtəlif ölkələrində tanınır. Demək olar ki, idman kimi Azərbaycanın müstəqil­liyinin rəmzlərini nümayiş etdirən ikinci bir vasitə yoxdur ”. 

Həqiqətən, idmanımızın ən yaxşı nümayəndələri müstəqil komanda şək­lində çıxış etdikləri Olimpiya oyunların­da qazandıqları böyük uğurlarla ölkəmi­zi dünyaya daha yaxından tanıtmışlar. Dövlət müstəqilliyimizin bərpasından ötən müddət ərzində sərbəst güləş us­tası Namiq Abdullayevin və stend atı­cısı Zemfira Meftahətdinovanın Sidney Olimpiadası – 2000-də, bundan dörd il sonra yunan-Roma güləşçisi Fərid Mansurovun Afinada, Pekin–2008-də cüdoçu Elnur Məmmədlinin, 2012-ci ildə “sərbəstlər” Toğrul Əsgərovla Şə­rif Şərifovun Londonda XXXl Olimpiya Oyunlarında, Rio-de-Janeyro– 2016-da taekvondoçu Radik İsayevin qazandıq­ları qızıl medallar, eləcə də, digər olim­piyaçılarımızın gümüş və bürünc müka­fatları Azərbaycan idmanının qüdrətini nümayiş etdirmiş, ölkəmizin şöhrətini artırmışdır. İndi Azərbaycan ümumdün­ya olimpiyaçılar ailəsində nümunəvi ölkə kimi tanınır. Olimpiya oyunlarının qalib və mükafatçıları isə milli sərvəti­mizdir. 

Həyat və məişətimizdə, fəaliyyə­timizin bütün sahələrində ən yaxın köməkçimizə çevrilmiş bədən tərbiyəsi və idman məşğələləri sevinc, sağlamlıq və gözəllik mənbəyidir. Bu bayram gün­lərində təşkil edilən müxtəlif yarış və tədbirlərdə minlərlə insanın fəal iştirakı belə məşğələlərin əhəmiyyətinə verilən dəyərin yüksək təzahürüdür.

Respublikamızda növbəti dəfə Bə­dən Tərbiyəsi və İdman Günü qeyd olu­nur. Hamı xoş əhvaldadır, hər kəs start­lara həvəslə çıxır, qüvvə və bacarığını nümayiş etdirir.

Günün mübarək, Azərbaycan idma­nı!

Oqtay BAYRAMOV,
Əməkdar jurnalist