Ötən əsrin 70-ci illərində “Məşəl” ansamblı bütün Azərbaycanda məşhur idi. Bu bədii kollektiv Güney mühacirlərindən təşkil olunmuşdu. Rübabə, Mahrux və Tahirə Muradovalar, Novruz Feyzullayev, Rövşən Behcət, Ruhəngiz Musəvi və başqlarını dinləməkdən doymaq olmurdu.
Təbrizdən Milli Hökumətin vaxtilə Bakıya zabitlər məktəbində oxumağa göndərdiyi Məmməd Salmanov inqilabdan sonra silahını bir kənara ataraq müğənniliyə başlamışdı. Respublikanın Əməkdar artisi adına layiq görülən sənətçi hər çıxışında “Səriyyə dayqızı laylay” mahnısını mühacir insanların önündə göz yaşı ilə oxuyurdu. Faciəli taleyi kövrək bir nəğməyə dönən “Şahsevən qızı” ləqəbli Səriyyə Milli Hökumətin yolunda sonadək mübarizə aparmış Ərdəbil fədailərindən biri olmuşdu.
Sonradan Səriyyənin kimliyi ilə ətraflı maraqlandım. Səmərində (Ərdəbil) xalq azadlığının keşiyində mərdliklə dayanmış, öz inadçılığı ilə Məhəmməd Rza Pəhləvi qoşunlarını heyrətə salan azərbaycanlı qızın tarixçəsini öyrəndim. O, həyat yoldaşı Əli və Səmərin fədailəri düşmən önünə çıxmışdılar, çiyin-çiyinə səngərdən atəş açmışdılar. Mühasirəyə alınmışdılar, güllələri qurtarsa da, təslim olmaq niyyətində olmamışdılar.
Xain düşmən fədailərin, eləcə də Səriyyənin qarşısına Quran gətirib, əl basıb and içmişdi ki, şərəfimizə and olsun ki, sizə toxunmayacağıq. Bu, hakim təbəqənin yüz dəfələrlə əl atdığı hiylə və aldatma metodlarından biri olmuşdu. Az sonra Qurana basılmış əllər Səmərin fədailərinin, o cümlədən Səriyyənin qanına batmışdı. Qəhrəman qız öldürülməzdən əvvəl barmaqlarını əks-inqilabçıların gözünün içinə silkələyərək demişdi: “Bu sizin üçün hünər deyil, tarix əhd-peymanı pozanları nifrətlə yad edəcəkdir. Azərbaycanın mərd oğulları mənim qanımı yerdə qoymayacaqlar”.
Həmin söz indiyədək gəncliyin, azadlıq uğrunda döyüşənlərin andına çevrilib. Şahsevən qızı Səriyyənin (1890 – 1946) məzarı bu gün də Güneydə and yerlərimizdən biridir. 22 Bəhmən (1979) inqilabından sonra bir qanlı rejimi digəri – molla libaslı zalımlar əvəzləyib. Səriyyənin ruhu hələ ki, narahatdır.
Hüseyn RƏHİMZADƏ