Sosial şəbəkələrdə kifayət qədər fəal vətəndaşlıq mövqeyi ilə seçilən, tanınmış qazaxıstanlı yazıçı-publisist, şairə Nəsihə Qumarqızı dünən özünün “Facebook” səhifəsində Qazaxıstanda yaşayan azərbaycanlıların qardaş Türkiyədə zəlzələdən zərərçəkənlərə yardım məqsədilə təbii fəlakət bölgəsinə 100 qazax çadırı (qazaxlar “şanarak” deyirlər) göndərməyə hazırlaşdıqları barədə paylaşım edib. Orada yazılır:
“Qazaxıstandan Türkiyəyə yola salınacaq çadırlar bu ölkənin Çu, Jualı, Ust-Kameneqorsk, Kustanay, Çimkənd və Almatı vilayətlərində fəaliyyət göstərən Azərbaycan diasporunun üzvləri – iş adamları, alim və mütəxəssislər, ictimai fəallar tərəfindən toplanan maddi vəsait hesabına alınaraq ən yaxın günlərdə Tükiyəyə yola salınacaq.
Bu məsələ ilə bağlı dünən Alma-Atıda keçirilən tədbirdə Azərbaycanın bu şəhərdəki Baş konsulu Anar Hüseynzadə, Qazaxıstan Azərbaycanlıları Assosiasiyasının sədri Əbülfəz Həmidov, sədrin birinci müavini Allahverdi Məmmədov, assosiasiyanın üzvləri Ceyran Məmmədova və Nəsihə Qumarqızı Türkiyə Cümhuriyyətinin Alma-Atıdakı Baş Konsulluğunu ziyarət ediblər. Onlar qardaş ölkədə baş verən ağır zəlzələnin fəsadlarından, xüsusilə də çox sayda insan tələfatından qəlbən üzüldüklərini və bu çətin günlərdə sonadək türk xalqının yanında olacaqlarını bildiriblər. Həmçinin ümid etdiklərini vurğulayıblar ki, Türkiyə dövləti və xalqı hər zaman olduğu kimi, bu çətin sınaqdan da üzüağ çıxacaq və bütün dünyadakı dost və qardaşlarının köməyilə fəlakətin törətdiyi ağır yaraları tezliklə sağalda biləcək.
Paylaşımın müəllifi Nəsihə xanım sonra qeyd edib ki, çadırlarda 15-20 nəfərin qalması mümkündür. Onun sözlərinə görə, bu çadırlar insanları yağışdan, şaxtadan qoruyacaq ki, bununla da bu xeyirxah işə qol qoyanların ürəyi təskinlik tapacaq. Çadırların Türkiyənin Kahramanmaraş, Hatay və başqa şəhərlərinə yola salınması planlaşdırılıb.
Bu məqamda qeyd etmək yerinə düşər ki, Böyük Turan sevdalısı olan Nəsihə xanım Qarabağ həqiqətləri ilə bağlı bir neçə kitabın müəllifidir. O, bir müddət əvvəl Bakıya səfər edərək Birinci Qarabağ müharibəsində könüllü surətdə Azərbaycan xalqının tərəfindən erməni işğalçılarına qarşı fədakarcasına vuruşaraq şəhid olan qazax xalqının igid oğlu Yerbol Barımbekova həsr edəcəyi kitabı üçün məlumatlar toplayıb. Müəllif kitabın üzərində işi artıq başa çatdırdığını bildirdi.
P.S. Qəzetimiz çapa hazırlanarkən o da məlum oldu ki, çadırların ilk dəsti artıq Qazaxıstandan yük maşınları ilə Türkiyəyə yola salınıb.
Hazırladı: M.HACIXANLI, “Xalq qəzeti”