Hər gün yeni hadisələrin və yeniliklərin baş verdiyi dünyamızda hər şeydən xəbərdar olmaq çətindir. Məlumat almaq üçün isə vasitələr çoxdur. Xəbər saytları sırasına “WhatsApp” da qoşulmağa hazırlaşır.
Dünyanın ən məşhur mesajlaşma platforması olan “WhatsApp” hər zaman etdiyi yeniliklərlə gündəmdə qalıb. Bu yeniləmələr və yeniliklər əsasən mesajlaşmanı daha səmərəli etmək məqsədi daşıyıb. İndi isə “WhatsApp” xüsusi “xəbər bülleteni” üzərində işləyir. Məlumatı “WaBetaInfo.com” saytı yayıb.
“WhatsApp” artıq birdən çox kontakta mesaj göndərmək imkanına malikdir. Bülletenlə bağlı məram isə bu istifadə sahəsini daha da genişləndirməkdir.
Proqramın gündəlik 2 milyard aktiv istifadəçisi var. Bu halda, istifadəçi bazasının çox kiçik bir hissəsi xəbər bülleteni ilə maraqlansa, platforma bir ay ərzində ən böyük xəbər bülleteni ola bilər. Bütün bunlara əlavə olaraq, bülletenlər sayəsində istifadəçilərin tətbiqdə daha çox vaxt keçirmələri mümkün olacaq.
Sözügedən yenilik haqqında geniş təfərrüatlar yoxdur. Ancaq proqramın hazırda inkişaf mərhələsində olduğu bildirilir. “WhatsApp”dan isə rəsmi heç bir açıqlama verilməyib.
Əfsanə ƏHƏDLİ, “Xalq qəzeti”