Planetimiz siyasi və hərbi cəhətdən olduqca təlatümlü bir dönəm yaşayır. Bu gün Yer kürəsində silahlar, raketlər, dronlar “danışır”. Üstəlik, terror və zorakılıqlar bitib-tükənmək bilmir. Bir çox regionlarda yeni münaqişə ocaqları körüklənir. Sülhdən isə söz açan yoxdur, danışanlar da bunu imitasiya xətrinə edirlər.
Qlobal mediada ara-sıra husilərin Qırmızı dənizdə “şıltaqlığı” diqqəti cəlb edir. Qəzza və Ukrayna isə od-alov içində yanaraq kül olur. Hər gün yeni dağıntılar və itkilər baş verir. Hər iki bölgədə bu gün təkcə hərbçilər deyil, uşaq, qadın və qocalar da həlak olurlar. Bu günahlar, təbii ki, böyük güclərin ayağına yazılır. Amma onlardan hesab soran olacaqmı?!
Ən ağrılı cəhət isə budur ki, bəşər övladı bütün bunlara ciddi reaksiya vermir. Bir vaxtlar planetin bir çox böyük şəhərlərində insanlar sülh tələb edərək müharibə əleyhinə nümayişlərə çıxardılar. Bu gün, demək olar ki, müharibə əleyhinə kütləvi etirazlar baş vermir. Bəşəriyyət sanki öz ağır taleyi ilə barışıb.
Bu biganəlik nədən qaynaqlanır? Əlacsızlıqdan, yoxsa laqeydlikdən, bunu birmənalı şəkildə demək çətindir. Böyük ehtimalla insanlar dünyanın gərdişini dəyişməkdə aciz və gücsüz olduqlarını dərk ediblər. Yırtıcı, imperialist maraqlara xidmət edən ideologiyaların fonunda bəşəri, humanist ideallar biçarə vəziyyətə düşüb.
Dünya elə bil qana susayıb. Görünən budur ki, super güclər dünya ağalığı iddialarından əl çəkmək istəmirlər. Rusiya-Ukrayna müharibəsi II cahan savaşından sonrakı dövrdə ən böyük silahlı qarşıdurmadır. Qərbdə bu münaqişəni qızışdıranlar hər birimizə yaxşı bəllidir. Amma onlar baş verən müsibətlərə görə niyə qınaq obyektinə çevrilmirlər?
Bu gün müharibə “qırğı”larının saxta sülh ritorikası acı istehza doğurur. Beynəlxalq konfranslar sülhün vacibliyindən söz açılır, amma bu istiqamətdə real işlər görülmür. Çünki dava “yorğan davası”dır. Dünyanı cənginə bürüyən vəkalət müharibələri yalnız və yalnız iqtisadi maraqlara xidmət göstərir.
Bəli, hər bir müharibə, ilk növbədə biznesdir. Bütün savaşlar pul qazanmaq üçündür. Adi, sadə insanların taleyi siyasətçiləri az maraqlandırır, bəlkə də zərrə qədər də narahat etmir. Dərin dövlətlərin isə öz hesabları var. Onlar üçün insan itkiləri faciə yox, adi statistikadır. Həyatın acı reallığı budur!
Rusiya ilə Ukrayna iki qonşu slavyan ölkəsidir. Artıq 26 aydır ki, aralarında qanlı döyüşlər gedir. Bu, hər iki tərəfin ancaq ziyanınadır. Bu, üzücü və tükətdirici bir müharibədir. Rəqiblər qarşı tərəfin davamlı itkilər hesabına gücdən və heydən düşəcəyinə ümid edirlər. Qədim Romada, Kolizeydə iki qulun ölümcül döyüşünə bənzəyir bu qarşıdurma!
Rusiya-Ukrayna müharibəsində qüvvələr nisbəti bərabər deyil. Rusiya insan, iqtisadi, hərbi və təbii ehtiyatlarına görə “kiçik qardaş”ından bir neçə dəfə böyükdür. Bu amilləri Kiyevdə nəzərə almayıblar. Siyasi ambisiyalar kobud səhvlərə səbəb olur. Bunun bədəlini isə sadə vətəndaşları ödəyir. Təkcə belə bir faktı qeyd edək ki, Ukrayna əhalisinin azı dörddə biri hazırda qaçqın və köçkünə çevrilib.
Qərb Ukraynanı aldadaraq tələyə salıb və indi arxasında durmaq istəmir. Vaşinqton ya Rusiyanın lokal nüvə hücumu ilə bağlı təhdidlərindən ehtiyat edir, ya da müharibəni gələcək münaqişələr naminə hələlik dondurmaq barədə düşünür. Gürcüstanda da 2008-ci ilin avqustunda buna bənzər vəziyyət yaranmışdı. O zaman qonşu ölkənin iki vilayəti əlindən çıxdı. İndi Tbilisi öz işini ehtiyatla görür və heç kimin vədlərinə inanmır..
Son günlərə qədər bir çox siyasi təhlilçilər qeyd edirdilər ki, Rusiya-Ukrayna müharibəsinin nəticələri yeni dünya düzəninə birbaşa təsir göstərəcək. Amma indi məlum olur ki, bu, heç də belə deyil. Ukrayna böhranı yeni dünya düzəninə aparan yolda bir vasilədir, yəni pilləkənin bir pilləsidir. Bu isə o deməkdir ki, dünya sülhün limanına çatana qədər yeni silahlı güc sınaqlarından keçməli olacaq.
Hesab olunur ki, qlobal nizamı ABŞ-Çin arasında sərt rəqabətin nəticələri müəyyən edəcək. Bu münaqişədən ən çox qazanan tərəf Çindir. Moskva Pekinin hərtərəfli dəstəyini əldə etmək üçün ona “su qiyməti”nə neft və təbii qaz satır. Bu, “səmavi dövlət” üçün göydəndüşmə bir fürsətdir. Pekin, təbii ki, belə şəraitdə müharibənin dayandırılmasında maraqlı deyil. Çin Rusiyanın məğlubiyyətini də arzulamır. O zaman artıq Qərbin zərbə qüvvəsini özü dəf etməli olacaq. Dəf edə biləcəkmi, bunu zaman göstərəcək.
ABŞ hökuməti də Rusiya-Ukrayna müharibəsindən sui-istifadə edərək Avropada siyasi, hərbi, iqtisadi mövqelərini gücləndirir. Vaşinqton hazırda müharibənin “yükü”nün çox hissəsini “Köhnə qitə”nin üzərinə atmağa cəhd edir. Avropanın ən güclü dövləti olan Almaniyanı müharibəyə cəlb etmək variantı da gündəmdədir. Məsələn, Fransa çoxdan arzulayır ki, Almaniyanı zəiflədib qitədə təkbaşına ağalıq etsin. Makron xəyallarında özünü Napoleona bənzətmək istərdi. Reallıq budur ki, onun iqtidarı dövründə dövlət siyasi nüfuzunu itirə-itirə gedir.
Okeanın o tayından Avropaya son bir əsrdə qalib ədası ilə baxan “Sem dayı”, eyni zamanda, NATO-nu rəqiblərindən daha çox “dost”larına qarşı təsir və təzyiq vasitəsi kimi əlində saxlayır. Bu missiyada ona ən çox Böyük Britaniya, eləcə də Skandinaviya və Baltikyanı dövlətlər yardımçı olurlar. Arada Fransa Ukraynaya “hərbi kontingent göndərəcəyəm” deyərək xoruzlanmaq niyyətinə düşür, lakin, bunun blef olduğu heç kimdə zərrə qədər şübhə doğurmur.
ABŞ Prezidenti Co Bayden bu ilin 4 noyabrında yenidən seçilmək üçün Rusiya-Ukrayna müharibəsini dayandırıb seçicilərdən əlavə dəstək alacağının düşünür. Ağ evin indiki sahibinin tapşırığı ilə bunun üçün gizli danışıqlar aparılır. Sülh müqaviləsi adətən zəif tərəfin hesabına imzalanır. Bu dəfə zəif bənd Ukraynadır. Kiyev isə bu barədə hələlik eşitmək belə istəmir.
Respublikaçıların namizədi, sabiq dövlət başçısı Donald Tramp dəfələrlə bəyan edib ki, seçkiləri udarsa, Ukrayna böhranı bir sutkaya həll edəcək. Lakin seçkiqabağı vədlər bir başqadır, real siyasət bir başqa. Super güclərə hər zaman “idarəolunan münaqişələr” lazım olur. Yeri gəlmişkən, Trampın başı hələ də məhkəmə çəkişmələrində ayılmır. Görək, bu işlərin axırı nə olur.
Şahbaz ŞAMIOĞLU,
Bakı Slavyan Universitetinin professoru, filologiya elmləri doktoru:
–Dünya heç vaxt ədalətli olmayıb. Bu gün də belədir. Planetimizdə baş verən “hibrid müharibələr”in arxasında böyük güclər dayanır. Onlar kiçik ölkələri və xalqları istismar etmək üçün min bir oyundan çıxırlar. Bu, reallıqdır.
Bir vaxtlar böyük güclər enerji ehtiyatlarını ələ keçirmək uğrunda mücadilə edirdilər. Hazırda planetimizdə iri kommunikasiya dəhlizlərinə nəzarət üstündə açıq və gizli yarış gedir. Bunun üçün hər cür vasitəyə əl atırlar. Humanist, bəşəri dəyərlər hər addımda gözardı edilir. İmperializmin mahiyyət budur.
Bu gün planetimizə yeni, daha ədalətli sivilizasiya lazımdır. Xoşbəxtlikdən, belə bir şans yaranıb. Belə ki, Türkiyə dövləti və xalqı çağdaş dünyada çox az dövlətlərdən biridir ki, təmsil olunduğu regiona və bütün dünyaya sülh, barış və rifah gətirməyə cəhd edir.
Ankaranın bu sahədəki gərgin səyləri beynəlxalq ictimaiyyət tərəfindən dərin rəğbətlə qarşılanır. Prezident Rəcəb Tayyib Ərdoğan israrla həm Qəzzada, həm də Ukraynada sülh danışıqlarına başlamağı təklif edir. Qərbdən fərqli olaraq Ankara öz təşəbbüslərində səmimi və qərəzsizdir.
Çox inanmaq istərdik ki, dünya Ankaranın təşəbbüslərinə qoşulub əmin-amanlıq dövrünə qayıtsın. Niyə də yox! Böyük Cavid deyirdi ki, hər bir savaşın, qan tökülməsinin qarşısını alan şəxs dahidir, xilaskardır. Bu missiyanı cənab Rəcəb Tayyib Ərdoğan yerinə yetirməyə tam qadirdir!
Türk dövlətləri və xalqları dünya nizamındakı ədalətsizlikdən uzun onilliklər boyu çox əziyyətlər çəkiblər. Xoşbəxtlikdən, böyük siyasətin üfüqlərində Türk Dövlətləri Birliyi boy göstərir. Böyük Turan hazırkı super güclərdən fərqli olaraq heç bir ölkənin haqqını pozmayacaq, əksinə, hər yerdə sülh və ədalətin bərqərar olunmasına çalışacaq.
Məsaim ABDULLAYEV
XQ