Fransa liderinin bu dəvətindən Ağ ev bərk qəzəblənib
Fransa prezidenti Emmanuel Makronun diplomatik məntiqlə bir ayara sığmayan hərəkətləri indi də rəsmi Vaşinqtonun əsəblərini tarıma çəkib. Belə görünür ki, Makron okeanın o tayındakı strateji tərəfdaşında qıcıq yaradacaq son addımı ilə eyni vaxtda iki stulda əyləşmək sevdasına düşüb.
Söhbət İkinci Dünya müharibəsində ABŞ və Böyük Britaniya qüvvələrinin Fransanın Normandiya sahillərinə çıxmalarının 80 illiyinə həsr olunan yubiley mərasiminə Rusiya Federasiyasından da rəsmi qonaqların dəvət edilməsindən gedir. Bu isə rəsmi Vaşinqtonda ciddi narazılıq yaradıb.
Yetişən yeni diplomatik qalmaqalla bağlı “Politiko” nəşrinə açıqlama verən Ağ ev administrasiyasının rəsmiləri Fransa rəhbərinin yubiley tədbirinə Rusiyanı dəvət etməsini anlamadıqlarını bildiriblər. Buna bənzər reaksiya Böyük Britaniyanın hökumət mənbələrindən də verilib. Olaya münasibətdə ortaq nöqtələrə malik açıqlamalarda hər iki dövlətin üst qatdakı rəsmiləri Emmanuel Makronun ikbaşlı siyasi oyununa belə şərh veriblər: “Belə görünür ki, Makron özünü Rusiya ilə qarşıdurmanın fövqündə görür və sülhməramlı tərəf olacağına ümid bəsləyir”.
Çin lideri Si Cinpinin bu yaxınlarda Qərbi Avopa ölkələri arasında yalnız Fransaya səfərə üstünlük verməsi də Vaşinqton və Londonun diqqətindən yayınmayıb və onlarda ciddi suallar yaradıb. Mövzu ilə bağlı XQ-yə açıqlama verən “Atlas” Araşdırmalar Mərkəzinin rəhbəri, politoloq Elxan Şahinoğlu bildirdi ki, Makron İkinci dünya müharibəsində Qərb cəbhəsinin açılmasının ildönümü tədbirlərinə Rusiya nümayəndə heyətini dəvət etməyə də bilərdi: “Əslində, Rusiyanın bu tədbirə birbaşa aidiyyəti yoxdur. Bu hərəkətin özü göstərir ki, Emmanuel Makron ikibaşlı oyun oynayır”.
Politoloqun fikrincə, ABŞ və Avropa İtifaqına üzv digər ölkələr Fransa polisinin Yeni Kaledoniyada tökdüyü qanlara göz yumsalar da, Emmanuel Makronun Çin və Rusiyaya yönəlik siyasətindən narahat olduqlarını gizlətməyiblər: “Deməli, Emmanuel Makron bir tərəfdən Rusiyaya qarşı sanksiyaların sərtləşməsinə çağırır, Ukraynaya xüsusi qoşun növünü göndərməyə hazır olduğunu bəyan edir, o biri tərəfdən isə Moskva və Pekinlə münasibətlərini davam etdirir”.
Oxuculara xatırladaq ki, İkinci dünya müharibəsində SSRİ faşist Almaniyası ilə vuruşurdu. 1944-cü il iyunun 6-da ABŞ və İngiltərə müttəfiqlər kimi ona yardım əlaməti olaraq, Hitlerə qarşı Normandiya sahillərinə birləşmiş qoşunlarını yeritmişdilər.
İ.HƏSƏNQALA
XQ
