Gürcüstan parlamenti “Xarici təsirin şəffaflığı haqqında” qanunu qəbul etdikdən sonra paytaxt Tbilisidə vəziyyət yenidən gərginləşib. Qanunun əleyhinə olan qüvvələr parlamentin qarşısında etiraz aksiyası keçirirlər. Onlar parlamentin binasına daxil olmağa çalışırlar.
Bununla bağlı Gürcüstanın Daxili İşlər Nazirliyi etirazçılara xəbərdarlıq edib. DİN-in bəyanatında deyilir ki, parlament binasının ətrafında keçirilən aksiya zorakı xarakter alıb. Polis qanunla müəyyən edilmiş xüsusi vasitələrdən istifadə etmək məcburiyyətində qalıb.
DİN mitinq iştirakçılarını polisin qanuni tələbinə tabe olmağa çağırıb.
Qeyd edək ki, hazırda Rustaveli prospektində vəziyyət gərgin olaraq qalır. Polisin tələbinə baxmayaraq, etirazçılar ərazini tərk etmirlər. Prospektdə avtomobillərin hərəkəti tam dayandırılıb.
