Əsl dostluq üçün məsafənin önəmi yoxdur. Çin Azərbaycandan uzaqda yerləşməsinə baxmayaraq, iki ölkə arasında dost münasibətlər mövcuddur. Azərbaycan Prezidenti İlham Əliyevin və Çin Xalq Respublikasının Sədri Si Cinpinin strateji rəhbərliyi və şəxsi iştirakı sayəsində bugünkü ənənəvi dostluq münasibətlərimiz uğurla inkişaf edir. Əlaqələrin inkişaf dinamikasının ümumi mənzərəsi belə deməyə əsas verir ki, Azərbaycan-Çin münasibətləri tarixinin ən yaxşı dövrünü yaşayır. Təsadüfi deyil ki, Prezident İlham Əliyev ölkələrimizi strateji tərəfdaş adlandırır.
Azərbaycanın dövlətlərarası münasibətlərdə qarşılıqlı faydalı əlaqələrin inkişaf etdirilməsinə üstünlük verdiyini, Pekinin “Bir kəmər, bir yol” layihəsində iştirakını yüksək qiymətləndirən Çin Bakı ilə siyasi-iqtisadi əlaqələrinin inkişafına yönəlmiş addımları dəstəkləyir.
2013-cü ildə Çinin təşəbbüsü ilə həyata keçirilən “Bir kəmər, bir yol” layihəsi mövcud ikitərəfli və çoxtərəfli əlaqələri, birgə strukturları və onların Çinin iştirakı ilə qarşılıqlı fəaliyyətini gücləndirməklə Avrasiyada iqtisadi tərəfdaşlığın yeni mexanizmlərini formalaşdırmaq və təşviq etmək məqsədi daşıyır. Bu təşəbbüsün mahiyyəti nəqliyyat-logistika infrastrukturunun formalaşdırılması və eyni zamanda, Böyük İpək Yolu boyunca iqtisadi zolağın inkişafına nail olmaqdır. “Bir kəmər, bir yol” layihəsində iştirak edən bir çox ölkənin zəngin təbii ehtiyat ehtiyatlarına malik olması, planetin əhalisinin təxminən 63 faizinin burada yaşaması Çin təşəbbüsünün faydalılıq əmsalını göstərir. “Bir kəmər, bir yol” meqalayihəsinin iqtisadi potensialı da 21 trilyon dollar dəyərində qiymətləndirilir.
Unikal coğrafi mövqeyi sayəsində Azərbaycan Çinin “Bir kəmər, bir yol” layihəsinin inkişafında mühüm rol oynayır. Eyni zamanda, Çinin bu təşəbbüsü Azərbaycanın Avrasiya məkanında coğrafi və iqtisadi əlaqələrini genişləndirmək imkanına artırır. Azərbaycan mühüm ticarət dəhlizlərinin inkişafı çərçivəsində logistika infrastrukturunu yaxşılaşdırmaq üçün böyük investisiyalar cəlb edir. Hazırda Bakı limanının keçid qabiliyyəti ildə 15 milyon ton yük təşkil edir. Şübhəsiz ki, Bakı Beynəlxalq Dəniz Ticarət Limanını Şərqlə Qərbi birləşdirən mühüm nəqliyyat qovşağı adlandırmaq olar. Azərbaycanın həyata keçirdiyi və Avropa ilə Çin arasında ən qısa dəmir yolu əlaqəsini təmin edən Bakı-Tbilisi-Qars dəmir yolu, Bakı Beynəlxalq Dəniz Ticarət Limanı kimi mühüm infrastruktur layihələri “Bir kəmər, bir yol” təşəbbüsü və ümumilikdə regional əməkdaşlıq üçün böyük əhəmiyyət kəsb edir.
Təbii ki, Azərbaycan dəmir və avtomobil yollarının, hava limanlarının inkişafında da maraqlıdır. Ölkəmizin Dünya okeanına çıxışının olmamasına baxmayaraq, bu gün Azərbaycan “Bir kəmər, bir yol” təşəbbüsü sayəsində beynəlxalq logistika və nəqliyyat mərkəzinə çevrilir. Bu təşəbbüsün “Böyük İpək Yolunun Bərpası” və “Trans-Xəzər Beynəlxalq Nəqliyyat Marşrutu” milli Azərbaycan strategiyaları ilə çoxlu təmas nöqtələri var. Bu, artıq Çin və Azərbaycan arasında iqtisadi əlaqələr üçün möhkəm zəmin yaratmaqla bərabər, əməkdaşlıq üçün yeni perspektivlər açır. Təbii ki, Azərbaycanın nəqliyyat sektorunda əldə etdiyi nailiyyətlər və imkanlar “Bir kəmər, bir yol” layihəsinin iştirakçıları tərəfindən yüksək qiymətləndirilir. Bu meqalayihə Prezident İlham Əliyevin dediyi kimi, sənayeyə yeni nəqliyyat imkanları və investisiyalar təqdim etməklə yanaşı, həm də xalqlar arasında ticarət, turizm və humanitar əlaqələri təşviq edir, eyni zamanda, Avrasiyada sabitlik, təhlükəsizlik və sülhün bərqərar olmasına xidmət edir.
Azərbaycan və Çin arasında intensiv siyasi dialoq da aparılır. Ölkələrimiz arasında 88 dövlətlərarası müqavilə bağlanmışdır. Bir çox məsələlərdə ölkələrimiz eyni mövqedən çıxış edirlər. Yəni Pekin ilə mehriban və yaxşı tərəfdaşa xas olan əlaqələr spektri var. Bu, həm də ölkələrimizin liderləri, hakim partiyalar və xalqlarımız arasında gözəl münasibətdir. Hakim Çin Kommunist Partiyası ilə hakim Yeni Azərbaycan Partiyası arasında çox gözəl əlaqələr mövcuddur. Partiyalararası bu fəal dialoq iki xalq arasında dostluq əlaqələrinin möhkəmlənməsinə, çoxvektorlu əməkdaşlığın dərinləşməsinə və ümumilikdə Azərbaycan-Çin əlaqələrinin inkişafına böyük töhfə verir. Azərbaycanda Çin dili və mədəniyyətinin öyrənildiyi Konfutsi Mərkəzi də fəaliyyət göstərir. Yəni münasibətlər bütün sahələrdə inkişaf edir.
Bununla yanaşı, Bakı Çinlə siyasi dialoqunu dərinləşdirmək və gücləndirmək istəyini hər zaman nümayiş etdirir. Azərbaycan hesab edir ki, ikitərəfli dialoqun keyfiyyəti yüksək səviyyədədir. İki ölkə liderləri arasında münasibətlərin yaxşı olması əməkdaşlığın keyfiyyətinə daha da müsbət təsir göstərir. Beynəlxalq münasibətlərdə mühüm rol oynayan Çinin BMT Təhlükəsizlik Şurasının daimi üzvü və Azərbaycana dost ölkə olması Bakının diqqət yetirdiyi xüsusi məqamlardır. Buna görə də, Azərbaycanın xarici siyasətinin əsas prioritetlərindən biri olan və qədim tarixə və xoş ənənələrə əsaslanan ikitərəfli münasibətlər yüksələn xətlə inkişaf edir və etibarlı tərəfdaşlıq hər keçən gün yeni məzmunla zənginləşir.
S.ELAY
XQ
