II məqalə
Gələcəyiniz sizin bu gün nə etdiyinizdən asılıdır.
Mahatma Qandi
“Böyük qəlb”in fəlsəfəsi
Mahatma Qandi XX əsrin nadir şəxsiyyətlərindəndir. Onu “Böyük qəlb” adlandırmışlar. Xeyirxah, nəcib, humanist, iradəli və qətiyyətli olduğuna görə dünyada hörməti çox olmuşdur. M.Qandinin fəlsəfəsini “qeyri-zorakı fəlsəfə” adlandırırlar. Çünki o, mübarizəsində, davranışında və siyasi fəaliyyətində heç vaxt zorakı üsullardan istifadə etməmişdir. Hətta, ilk çağlarda kütlə qarşısında çıxış etməkdən utanırmış.
M.Qandinin çox sayda müdrik kəlamları var. Onlar “Böyük qəlb”in yalnız xeyirxah, insanların fəzilətinə və rifahına yardımçı olan, barış xarakterli həyat tərzini ifadə edir. Mahatma Qandi bununla böyükdür! Onun dünya siyasətinə güclü təsiri olmuşdur. Hətta, amerikalı Qlenn Durland Peyc qlobal qeyri-zorakılıqla bağlı hərəkatı birbaşa M.Qandinin fəlsəfəsindən bəhrələnərək yaratmışdır. Onu da deyək ki, Q.D.Peyc əvvəlcə Harri Trumenin ideoloji məsləhətçisi və onu Koreya müharibəsinə təhrik edən adam olmuşdur. Lakin sonradan səhvini məhz M.Qandinin əsərlərini oxuduqdan sonra anlamış və mövqeyini tamam dəyişmişdir.
O, 1994-cü ildə ABŞ-nin Havaya ştatının Honolulu şəhərində Qlobal qeyri-zorakılıq mərkəzi adında qeyri-kommersiya təşkilatı yaratmışdır. 2007-ci ildə qeyri-zorakılıqla bağlı keçirilən beynəlxalq forumda qəbul edilən qərarlardan biri də öldürməkdən imtina əsasında Qlobal qeyri-zorakılıq mərkəzinin yaradılması ilə bağlı olmuşdur. 2008-ci ildə Q.D.Peycin əsasını qoyduğu və öldürmədən imtinaya əsaslanan təşkilat Qlobal qeyri-zorakılıq mərkəzinə çevrilmişdir.
Deməli, M.Qandinin fəlsəfi və siyasi baxışları hətta uzaq Amerikada belə politoloqların və siyasilərin mövqelərində humanizmə, qeyri-zorakı siyasət aparmağa doğru dəyişkiliklər etmişdir. Q.D.Peyc kimi Koreyada müharibə zərurətini H.Trumenə sübut etməyə çalışan bir ideoloq belə tamamilə dəyişmişdir.
Bunların işığında rəsmi Dehlinin Cənubi Qafqazla bağlı mövqeyinə baxdıqda, yumşaq desək, təəccüblənir və təəssüflənirsən. Niyə?
Siyasətdə Qandi humanizmindən imtina?
M.Qandi elə siyasi fəaliyyətə üstünlük verirdi ki, heç bir insana qarşı zorakılıq olmasın. Öldürməkdən söhbət belə gedə bilməzdi. Bunu M.Qandi heç bir səbəblə, o cümlədən, geosiyasi maraqlarla izah etməzdi. Buna görə də hind siyasəti üçün zorakılıq və onun tərkibində siyasi avantüra xarakterik hal olmamalıdır. Axı, Hindistan məhz M.Qandinin fəlsəfəsi, siyasi-ideoloji fəaliyyəti sayəsində müstəqil olmuşdur. Yəni ingilislərin tarixi zorakılıq və öldürmək siyasətindən yaxa qurtarmışdır. Buna görə də Hindistan cəmiyyəti üçün müharibə, silah işlətmək və ya başqasını silahlandırmaq qəbuledilən olmamalıdır. Rəsmi Dehlinin Cənubi Qafqaz məsələsində avantürist Fransanın yanında durmasını anlamaq çox çətindir. Yaxud, Fransa avantürstdirsə, Hindistana nə olmuşdur?
Lakin son illər Hindistanın siyasi səhnəsində də qəribə hadisələr baş verir. Məsələn, son iki ildə iki müsəlman siyasətçi küçənin ortasında güllələnmişdir. Onları qətlə yetirənlər dərhal həbs olunmuşlar. Ancaq fakt olduğu kimi qalır: nədənsə bu kimi hallar əsas olaraq müsəlman liderlərlə bağlı baş verir və sonra unudulur. Səbəbini bilmirik, Hindistanın daxili işlərinə də qarışmaq fikrində deyilik. Dehlinin siyasətində məsələlər Cənubi Qafqazla bağlı olduqda isə vəziyyət dəyişir.
Dehlinin geosiyasi “arqumenti”
Hindistan Uzaq Şərqdə və Cənubi Asiyada Çinlə geosiyasi rəqabətdə ola bilər. Pakistanla problemləri də çıxa bilər. Bunlar həmin dövlətlərin öz işləridir. Tarix var, onun konkret detalları mövcuddur. Məsələn, Hindistanda dövlətçiliyinin inkişafında türklərin rolu danılmazdır. Nadir şahın bu ölkəyə yürüşlərini kimsənin yaddaşından silə bilməzsən. Və yaxud Babur şahın “Tac Mahalı”nı necə inkar edərsən? və s.
Bunlarla yanaşı, müasir geosiyasi reallıqlar da mövcuddur. Cənubi Qafqazda həmin geosiyasi reallığın əsas faktoru Azərbaycan Respublikasının müstəqil dövlət kimi regionun ən ədalətlisi, sülhsevəri, əməkdaşlıq tərəfdarı və lideri olmasıdır. Azərbaycan 30 il işğal altında qalmış ərazisini azad etmiş və suvernliyinin tam təmininə nail olmuşdur.
Hindistan kimi işğaldan əziyyət çəkmiş böyük bir dövlət bunu daha dərindən anlamalı və qiymətini bilməlidir. Dehli qəbul etməlidir ki, dünya üzrə zorakılığa qarşı faydalı olmaq istəyirsə, Qafqazda, ilk növbədə, Azərbaycanla əməkdaşlıq etməlidir. Çünki məhz yalnız Azərbaycan Avrasiya məkanında zorakılığı aradan qaldıran mübarizə aparmış, mərdlik və qətiyyətlə şərlə savaşmış, onu məğlub etmişdir. Mahatma Qandi bunu alqışlayardı.
Azərbaycan bununla kifayətlənməmiş postmüharibə mərhələsində işğalçı və təcavüzkar Ermənistana barış və əməkdaşlıq əlini uzatmışdır. Bunu Qandi ruhunda etmişdir. Azərbaycan Prezidenti dəfələrlə İrəvanı danışıqlara səsləmişdir. Ona hər hansı hərbi təxribata uymamağı (yəni zorakı davranmamağı) məsləhət görmüşdür.
Bununla yanaşı, Azərbaycan qətiyyətlə zorakılığın qarşısını almış, insanları ölümə sürükləyən qüvvələri sərt cavabları ilə yerində oturtmuşdur! Təbii və məntiqi olaraq Hindistanın belə bir Qafqaz dövlətinə dəstək verməsi lazım gəlirdi. Həm də ona görə ki, Fransa kimi avantürsitlər və regionda sabitliyi qəbul etməyən bir sıra böyük “geosiyasi oyunçu”lar Azərbaycanın sülhsevər davranışlarından, möhtəşəm qələbəsindən doğru olmayan nəticələr çıxararaq dağıdıcı fəaliyyəti gücləndirməyə çalışırlar. M.Qandinin yaratdığı Hindistan siyasi dairələri belə vəziyyətdə düşünmədən “Azərbaycan” deməli idilər. Lakin, çox təəssüf ki, Dehli avantüristin yanında durdu və daha pisi - təcavüzkara, zorakılıq edənə, insanlara ölüm gətirənə müasir silahlar verməyə başladı.
Birbaşa silahdan istifadə edib insanları qətlə yetirən zorakı və təcavüzkar dövlətlə ona bu məqsədlə silah satan arasında geosiyasi və siyasi anlamda elə bir fərq yoxdur: hər ikisi zorakı və pozucudur, avantürisitdir. Bu anlamda Ermənistana “Bastion” verən Fransa ilə artilleriya qurğuları satan Hindistan arasında elə bir fərq yoxdur – eyni dərəcədə avantüristdirlər.
Bu davranışa bir sıra siyasilər və ekspertlər belə haqq qazandırmağa çalışırlar: Hindistan Çin və Pakistana alternativ ola biləcək geosiyasi xətt yaradır. Məsələ Azərbaycanın Çinin “Bir qurşaq, bir yol” layihəsində aktiv iştirakla bağlıdır? Yaxud Pakistanın Azərbaycanın haqq işinə ciddi dəstək verməsi Dehlidə kimlərisə qıcıqlandırmışdır? Əgər bunlar səbəb kimi rol oynayırlarsa, azərbaycanlıların bir məşhur deyimi yada düşür: “heç dəxli var”? İzah edək.
Gerçəklə bəhanənin fərqi
Hindistanın öz geosiyasi maraqlarını təmin etmək haqqına sahib olması bizi qətiyyən narahat etmir. Bu, onun təbii haqqıdır. Həm də Azərbaycan da kifayət qədər məna yükü və məqsədi olan geosiyasi marağa malikdir və onu reallaşdırmağı çox gözəl bilir. Bakının bununla bağlı heç bir psixoloji və ya diplomatik natamamlıq kompleksi yoxdur. Əksinə, təəccüblüdür ki, rəsmi Dehli geosiyasi maraq adı altında əsl arqumentlərlə bəhanələri səhv salır.
Doğrudan da, əgər Hindistan Çinin layihəsinə alternativ yaratmağı real arzulayırsa, onda Cənubi Qafqazda sabitliyin möhkəmlənməsində maraqlı olmaldır. Təcavüzkar və revanşist Ermənistanı Fransa ssenarisi üzrə silahlandırmaq bunun tamamilə əksinə işləyən faktordur. Çünki Hindistanın verdiyi silahlar vasitəsilə Azərbaycana zərbə endirmək, bütövlükdə, regionu yenidən xaosa sürükləmək deməkdir. İstənilən müharibə Cənubi Qafqazı qarışıqlığa sürükləyəcək. O halda hansı real alternativdən söhbət gedə bilər? Cənubi Qafqazda deyil, hətta ondan kənarda ola biləcək istənilən əməkdaşlıq marşrutu etibarlı olmayacaq. Xaos oranı da yandıracaq.
Belə çıxır ki, “alternativlik” adı altında ortaya atılan Hindistan–İran–Ermənistan-Qərb dövlətləri xəyali əməkdaşlıq marşrutu təxribatdan və baş aldatmaqdan başqa bir şey deyildir. Bu, arqument deyildir. Çinin real uğurlarının gizli etirafı əsasında bu prosesi əngəlləmək üçün Amerika və Avropa ilə birlikdə avantürist hərəkətlər etməyin əlamətidir. Yəni “arqument” adı altında, əslində, bəhanənin gətirilməsidir.
Bununla Hindistan Cənubi Qafqazda siyasi və geosiyasi avantüra vasitəsilə qarışıqlıq yaratmaq istəyən Fransa ilə bir mövqedə dayanır. Onların hər ikisi regional sabitlik və əməkdaşlığa töhfə verməkdən uzaqdır.
İran da bu oyunun içində görünür. Lakin Tehran bir qədər fərqlidir. Fəal surətdə Fransa və Hindistanla hərəkət etmir. Bir sıra məqamlarda Azərbaycana tərəf referanslar edir. Ancaq İranı hələlik konstruktiv mövqedə olan region dövləti kimi qiymətləndirmək çox çətindir. Rəsmi Tehran zaman-zaman müxtəlif üsullarla Azərbaycan–Türkiyə tandeminə qarşı oldğunu emosional ifadə edir. Paralel olaraq, Ermənistanla aktiv siyasi-diplomatik əlaqələri qabardır, bir sıra təkliflər verir və hətta İrəvanı təşviq etməyə çalışır. Hiss olunur ki, regional geosiyasətdə antitürk əhval-ruhiyyəsinin yaranması üçün canfəşanlıq edir. Bu kontekstdə hərdən İran tərəfdən azərbaycanlılarla regionun başqa xalqları arasında nifaq salmağa istiqamətlənmiş təbliğat xarakterli davranışlar gözdən qaçmır.
Ancaq region üçün İran nə Fransadır, nə də Hindistan. Onun Azərbaycan və Türkiyə ilə birgə fəaliyyət göstərməsi bütövlükdə bölgənin hər bir xalqı üçün faydalı olardı.
Bunların fonunda Ermənistanın geosiyasi və siyasi avantürasının ayrıca izaha ehtiyacı olduğu görünür. Birincisi, ona görə ki, Ermənistan tarixən avantürist olmuşdur. İkincisi, indiki dövrdə Ermənistan avantürist kimi birbaşa Qərbin maşası olaraq hərəkət edir. Bu iki faktorun kəsişməsində erməni avantürasının region üçün təhlükəsi və yaratdığı risklər də özəl məzmun alır.
(ardı var)
Füzuli QURBANOV,
XQ-nin analitiki, fəlsəfə elmləri doktoru