Terrorçu təşkilatın Azərbaycanın ərazi bütövlüyünü təhdid edən bəyanatına sözardı
Azərbaycanla Ermənistan arasında sülhün əldə edilməsinə maneələr getdikcə artmaqdadır. İlk baxışdan, düşünmək olar ki, hansısa xarici baxışın rəsmi İrəvanın götürdüyü kursa aidiyyatı yoxdur. Ancaq bu, heç də belə deyil. Əksinə, kənardan gələn və faktiki olaraq sülhün “boykot” olunmasını nəzərdə tutan “təşəbbüslər” fonunda Ermənistan hakimiyyətində susqunluq var. Susqunluq isə razılıq əlamətidir. Deməli, baş nazir Nikol Paşinyan administrasiyası terrorçu Daşnaksütyun partiyasının bəyanatı ilə hesablaşır. Hər halda, erməni iqtidarının sülhün hazırkı prinsipləri ilə tamamilə zidd olduğu aşkar görünən sənədə münasibətdə heç bir müqaviməti yoxdur.
Digər tərəfdən, hazırda sülhü “boykot” etmək yönümlü bəyanat verənlər vaxtilə Ermənistanın hazırkı iqtidarının qəzəbinə tuş gəlmişdilər. Paşinyanın komandası onlara geriliyin əlaməti kimi yanaşırdı. İndi isə bu qüvvələr, sanki, əl-ayaq açmaqdadırlar. Məsələn, vaxtilə Paşinyan belələrinin ölkəyə girişinə qadağa qoyurdusa, hazırda, bu, aradan qaldırılır. Söhbət erməni lobbi və diaspor təşkilatlarının təmsilçilərinin üzləşdikləri yasaqlardan gedir. Yəqin, razılaşarsınız ki, xaricdəki erməniliyin ən öndə gedən qüvvəsi daşnaklardır. Deməli, onların yaydıqları bəyanat da adi bir sənəd kimi qarşılana bilməz.
Beləliklə, Ermənistan hakimiyyətinin susqunluğu fonunda Daşnaksütyun partiyası Azərbaycanla sülh gündəmi ilə bağlı bəyanat yayıb. Sənədi destruktivlik baxımından səciyyələndirən bir neçə cəhət var. Birincisi, daşnaklar Ermənistan hakimiyyətinin aylar, hətta, illər əvvəl irəli sürdüyü məsələləri yenidən gündəmə gətirirlər. Təəssürat yaranır ki, sanki, Qarabağda separatçı rejim fəaliyyətdədir, rəsmi İrəvan Qarabağ erməniləri üçün beynəlxalq təminat tələb edir.
Ümumən, “Daşnaksütyun”un bəyanatı erməni məkrinin növbəti təsdiqi, erməni avantürizminin təzahür formasıdır. Heç şübhəsiz, mərkəzi qərargahı Parisdə yerləşən qurumun bu sayaq açıq tekstə üstünlük verməsi səbəbsiz deyil. Fransanın tutduğu mövqe öz rolunu oynamaqdadır. Nəzərə alaq ki, terrorçu partiyanın təmsilçilərinin ölkənin rəsmiləri ilə sıx əlaqədə olduqları yalnız indinin reallığı deyil.
***
Əlqərəz, “Daşnaksütyun” partiyasının bəyanatındakı ilk cəfəng məqam budur: Qarabağa aralıq status verilməlidir. Deyəsən, daşnaklar, birbaşa, Paşinyandan əvvəlki dövrə gedib çıxırlar. O dövrə ki, Ermənistan hakimiyyəti Qarabağ danışıqları müstəvisində heç nəyə razı deyildi və ən müxtəlif vasitələrlə status-kvonu, yəni işğalı saxlamağa üstünlük verirdi. İndi isə terrorçu təşkilat bildirir ki, yaydığı bəyanat Azərbaycan və Ermənistan arasında gedən hazırkı danışıqlar prosesindən sonra hər iki ölkənin yüksək rütbəli rəsmilərinin açıqlamalarının təhlilinə əsasən hazırlanıb. Partiya, öz aləmində, ən optimal çıxış yolu tapır. Bəs daşnaklar daha nə istəyirlər?
Sən demə, Qarabağ məsələsinin yekun siyasi həllinə və “Artsax xalqının” fundamental hüquqlarının tam həyata keçirilməsinə qədər, bölgə ermənilərinin kollektiv, maneəsiz və təhlükəsiz öz vətənlərinə qayıtmaları təmin edilməlidir. Daşnakların fikrincə, haqqında söz açdığımız aralıq statusu geri qayıdışın faktoru rolunu oynamalıdır. Təminat isə beynəlxalq standartlara söykənməli, hələ Qarabağa sülhməramlı qüvvələr də yerləşdirilməlidir ki, “Artsax xalqı” effektiv təhlükəsizlik mühitinə sahiblənsin. Görəsən, daşnaklar başqa heç nə istəmirlər ki?...
Bəyanatda daha sonra bildirilir ki, Bakı və İrəvan arasında müzakirə olunan hazırkı sülh sazişi layihəsinin razılaşdırılması prosesində Azərbaycan Ermənistandan digər güzəştlər əldə etmək imkanını saxlamaqla, Qarabağın və Ermənistanın bəzi ərazilərinin güc tətbiqi və güc tətbiqi hədəsi ilə reallaşdırdığı işğalını de-yure möhkəmləndirməyə çalışır. Göründüyü kimi, daşnaklar Qarabağın işğalı məntiqini qabardırlar ki, əslində, bu, Ermənistan ərazilərinə qəsd ritorikası ilə paralel şəkildə dövriyyəyə buraxılır. Rəsmi İrəvan hazırda Qarabağ deyil, ikinci amil üzərində dayanır. Hərçənd, Paşinyan iqtidarının da Qarabağ ritorikasının olduğu məlumdur. Əlbəttə, bir qədər fərqli. Məsələn, Qarabağ ermənilərinin bölgəyə təhlükəsiz şəraitdə geri dönüşü. Təhlükəsizlik dedikdə nəzərdə tutulan isə erməni əhali üçün ayrıca beynəlxalq təminatlardır. Yəni, faktiki olaraq, indi daşnakların irəli sürdüyünü, aylar əvvəl, daha doğrusu, lokal xarakterli antiterror tədbirlərinədək, rəsmi İrəvanı da gündəmə gətirirdi. Bütün bunlar isə heç bir halda Azərbaycan tərəfindən məqbul qiymətləndirilə bilməz. Çünki məsələ ölkəmizin konstitusyon təminatlarının heçə sayılmasıdır.
***
Bəli, “Daşnaksütyun” hesab edir ki, Azərbaycan Qarabağ məsələsini bağlamağa çalışır və bu, Ermənistana qarşı təhdidləri artırır, onun təhlükəsizliyini, ərazi bütövlüyünü, suverenliyini şübhə altına alır və nəqliyyat yollarını təcrid duruma salır. Belə çıxır ki, daşnaklar sipər kimi Qarabağ amilinin üzərində dayanırlar. Deməli, bölgə Ermənistanın nəzarətində olmalıdır ki, digər ssenarilər reallaşmasın (?).
Ancaq daşnaklar şikayətlənirlər də. Bildirirlər ki, Bakının “növbəti düşmən hərəkətlərinin, o cümlədən, hərbi təcavüzün qarşısının alınması üçün effektiv mexanizmlər yaradılmır”. Ona görə də qurum mövcud reallıqların nəzərə alınmasını, “milli dövlət maraqlarının müdafiəsinə əsaslanan münasibətlərin tənzimlənməsi naminə “prinsiplər” irəli sürür.
İlk prinsip budur ki, guya, etimad mühitinin yaradılması üçün Azərbaycan qoşunları Ermənistan Respublikasının suveren ərazisindən çıxarılmalı, eləcə də bütün hərbi əsirlər, məhbuslar geri qaytarılmalı, mövcud humanitar problemlər həllini tapmalıdır. Yəqin, fikirlər tanış gəlir. Ermənistan hakimiyyəti də eyni məsələləri qabardır. Ancaq daşnaklar bir qədər də “irəli” gedirlər. Daha doğrusu, geri qayıdırlar. Onların bəyanatlarında “Ermənistan – Azərbaycan, Dağlıq Qarabağ münaqişəsi” fikri vurğulanır. Yəni, bu, o deməkdir ki, terrorçu partiya Azərbaycana qarşı ərazi iddiasından əl çəkmir.
Bəyanatdakı növbəti destruktiv məqama keçid alaq. Məlum olduğu kimi, Ermənistan hakimiyyəti sərhədlərin delimitasiyası və demarkasiyası prosesində SSRİ Baş Qərargahının 1974-cü ildən sonrakı xəritələrinin əsas götürülməsi üzərində dayanır. Eyni zamanda, 1991-ci ilin Alma-Ata Bəyannaməsini rəhbər tutur. O bəyannaməni ki, keçmiş müttəfiq respublikaların SSRİ-dən çıxdıqları zaman malik olduqları ərazilərin bir-biri tərəfindən tanınmasına əsaslanırdı. Əlbəttə, bu yanaşmanın özü də düzgün deyil. Ən əsası ona görə ki, əvvəla, Azərbaycan torpaqlarının otuz ilə yaxın müddətdə işğalda saxlamış Ermənistan ölkəmizin ərazi bütövlüyünə hörmət bəsləməyib. Yəni, Alma-Ata prinsiplərinə tam etinasız yanaşıb. İkincisi isə bir halda ki, Alma-Ata Bəyannaməsi SSRİ-dən çıxarkən mövcud olmuş ərazilər amilini əsas götürürsə, o zaman nə üçün Sovetlər Birliyinə qoşulma kənara qoyulmalıdır? Hansı səbəbdən Azərbaycan İttifaqa böyük ərazi ilə daxil olub, oradan kiçik ərazi ilə ayrılmalıdır? Yaxud, nəyə görə Ermənistanın Sovetlər Birliyindən ayrılması ona əlavə ərazi qazancı verməlidir?
Bütün bunların fonunda daşnaklar öz aləmlərində daha tədbirli davranırlar. Guya ki, diplomatikdirlər. Onlar bildirirlər ki, demarkasiya və delimitasiya üçün əsas Azərbaycanın MDB-yə üzv olduğu dövrdə qüvvədə olan faktiki sərhədləri olmalıdır. Yəni, 24 sentyabr 1993-cü ilə qədərki sərhədlər. Burada “faktiki sərhədlər” ifadəsinə diqqət yetirək. Belə çıxır ki, terrorçu partiya ölkəmizin MDB-yə qoşulmasınadək işğal olunmuş Xankəndini, Xocalını, Şuşanı, Laçını, Xocavəndi, Kəlbəcəri, Ağdərəni, Ağdamı, Cəbrayılı və Füzulini Azərbaycan kimi görmür. Deməli, “Daşnaksütyun” partiyası Paşinyanın səhvini belə “düzəldir”.
Nəhayət, sonda daşnaklar bildirirlər ki, yuxarıda sadalanan prinsiplərə əməl edilmədən imzalanacaq hansısa sənəd regionda sülhün və sabitliyin bərqərar olmasına töhfə verməyəcək, əksinə, problemlərin güc yolu ilə və ya güc təhdidi ilə həlli presedentini təsdiqləyəcək. Bu, nə deməkdir? O deməkdir ki, terrorçu partiya, əvvəla, sülhün real şərtlərinə münasibətdə təhdid yolu tutur. Əlbəttə, bu, həm Azərbaycanı hədələməkdir, həm də Ermənistan hakimiyyətini. Belə çıxır ki, “Daşnaksütyun”un istəklərinə zidd hansısa sülh sazişi imzalansa, dünya erməniliyi durumu qəbul etməyəcək. Qəbul etməyib nə edəcək? Bunu bilmək üçün çox da düşünməyə ehtiyac yoxdur. Çünki “Daşnaksütyun” vurğuladığımız kimi, terrorçu qurumdur.
Onu da bildiririk ki, “Daşnaksütyun” partiyası dünyanın anti-Azərbaycan, anti-türk mövqe tutan, Cənubi Qafqazda əlahiddə maraq və mənafelər gerçəkləşdirmək istəyən qüvvələrin əli ilə hərəkətə gətirilən terrorçu təşkilatdır. Qurumun hazırda Cənubi Qafqazda sülhün formalaşma şərtlərinə müdaxilə yönümlü sənəd yayması həm də həmin dairələrin “sifarişi”, daha doğrusu, “mesajıdır”. Mesajın birbaşa ünvanı isə Ermənistan iqtidarıdır. Deməli, baş nazir N.Paşinyan administrasiyasına təzyiqlər var və heç şübhəsiz, qarşıdakı müddətdə bu təzyiqlər bir qədər də güclənəcək. Vəziyyət belə davam etdikcə isə sülh yalnız üfüqdə közərəcək...
Ə.CAHANGİROĞLU
XQ