Ermənistan iqtidarının ekofəallara cavabı təhqiramizdir
Ermənistanın müdafiə naziri Suren Papikyan bildirib ki, son iki ildə ölkədəki hərbi sənaye kompleksində yerli şirkətlərdən satınalmaların həcmi 20 dəfə artıb. S.Papikyan, eyni zamanda, xaricdən silah alınmasına da toxunub. O, mövcud xüsusda Ermənistan baxımından, kifayət qədər fantastik rəqəmlər açıqlayıb. Məlum olub ki, ölkə ötən il özünün hərbi arsenalını Fransa və Hindistan silahları hesabına xeyli zənginləşdirib. Üstəlik, Ermənistanın dövlət büdcəsindən hərbi məqsədlər üçün ayırmaların həcmi də artıb. Əslində, bununla bağlı diskussiyalar indinin söhbəti deyil. Bəs, nəyə görə bu yazıda məsələnin üzərində dayanmaq qərarına gəldik?
Ondan başlayaq ki, Ermənistandakı bəzi ekoloji qurumlar, eləcə də ətraf mühitin mühafizəsi ilə bağlı təşkilatlar “həyəcan təbili” çalırlar. Onlar dağ-mədən sanayesi üzrə görülən işlərin ölkənin ekoloji mühitinə ağır zərbə vurduğunu qabardırlar. Həmçinin, Azərbaycanın eyni sahədə fəaliyyət göstərən təşkilatları ilə həmrəylik nümayiş etdirirlər. Bu həmrəyliyin nəticəsi olaraq Ermənistanın baş naziri Nikol Paşinyana müraciətin ünvanlandığı da məlumdur. Paşinyan sözügedən müraciətə cavab verib. Əlbəttə, buna cavab demək mümkünsə…
Nikol ölkənin ekologiyasının pozulduğuna dair iddiaları qəbul edib. Mövcud istiqamətdəki narahatlıqları başa düşdüyünü bildirib. Lakin, erməni baş nazir deyib ki, hazırda Ermənistan dövlətinin ekoloji vəziyyəti yaxşılaşdırmaq üçün yetərincə vəsaiti yoxdur. Elə əsas məsələ də bu deyimdədir.
Əlbəttə, N.Paşinyanın cavabı absurddur. Ancaq nəzərə alsaq ki, Nikol ümumən absurd fikirlər gündəmə gətirməklə məşğuldur, o zaman onun söylədiklərində təəccüblü heç nə yoxdur. Əlbəttə, təəccübümüzün olmaması erməni baş nazirin fikirlərinin paradoksallığını 2-ci plana keçirmir. Ona görə ki, ortada S.Papikyanın diqqətə çatdırdığımız açıqlaması var.
Bəli, deməli, hər şey aydındır. Ermənistan silaha pul xərcləməyi düşünür, ancaq ekologiyanı qorumaq məsələsi gələndə vəsait tapılmır. Bu məqam erməni iqtidarının daxili ictimai rəyi nəzərə almaq istəməməsi, onunla hesablaşmaqdan boyun qaçırmasıdır.
Əslində, Ermənistana silah yox, ekologiya, sağlam ətraf mühit daha çox lazımdır. Ölkənin Qərb dəyərləri, insan hüquq və azadlıqları ilə “silahlanmış” hakimiyyəti isə utanıb-qızarmadan pulunun olmadığını bildirirsə, ortada son dərəcə böyük həyasızlıq var. Yada salaq ki, Paşinyandan əvvəlki erməni iqtidarı da eyni yolu tuturdu. Həmin iqtidarın dövründə işğal altındakı Azərbaycan ərazilərində əsl ekosid törədilirdi. Gözləmək olardı ki, Nikol və komandası hakimiyyətə gələndə, ilk növbədə insanlığın həssas yanaşdığı problemlərin aradan qaldırılmasına çalışacaq. Ancaq Qərbpərəst hakimiyyət tam fərqli yol tutdu və bu gün də həmin “kursa” sadiqdir.
Cənubi Qafqazın rüsvayçılığına, dövlət adına parodiyaya çevrilmiş Ermənistan özünə indiyədək malik olmadığı imic formalaşdırmaq üçün, ilk növbədə, silahlanmağa deyil, məhz ekoloji müstəvidəki problemləri aradan qaldırmağa üstünlük verməlidir. Paşinyanın “pul yoxdur” açıqlaması isə təkcə onun deyil, bütövlükdə onu hakimiyyətə gətirən Qərb dünyasının faciəsidir. Bir daha aydın olur ki, Qərbə Ermənistan Cənubi Qafqazdakı maraqlarını gerçəkləşdirmək naminə lazımdır. Sadə ermənilərin nələr çəkdiyi Paşinyanı və tərəfdarlarını düşündürmədiyi kimi, Qərbin ermənipərəst dairələrini də əsla maraqlandırmır.
Sonda bir məqamı da diqqətə çatdıraq. Ermənistan hakimiyyəti ölkəni bürümüş ekoloji etiraz mühitini boğmağa çalışır. Bu “məqsədlə” formul da fikirləşilib. Məsələn, erməni nəşri olan “Hraparak” bir müddət əvvəl Ermənistanın Milli Təhlükəsizlik Xidmətinə çağırış etmişdi. Çağırışda ölkənin ekologiya sahəsindəki təşkilatların, guya, Azərbaycan hakimiyyətinə işlədiklərinə dair motivlər yer almışdı. Qəzet onların fəaliyyətini şübhələndirmək yolu tutmuşdu. Bu, subliminal mesaj idi.
Paşinyan və komandası “Hraparak”ın dili ilə ekofəalları şantaj etmişdi. Yəni, faktiki olaraq, belə demişdi: əgər kampaniyanızı dayandırmasanız, Azərbaycana işləməkdə günahlandırılıb həbsxanaya atılacaqsınız. Paşinyançılar “səbəb” də tapıblar: guya ki, Azərbaycan Ermənistanın dağ-mədən sanayesinin inkişafına, ümumən ölkənin iqtisadi cəhətdən güclənməsinə maneçilik törədir, ona görə də Ermənistandakı ekoloji təşkilatları işə salıb. Hər halda, bundan sərsəm iddia ola bilməz.
Ə.CAHANGİROĞLU
XQ