Son 3 ildə bu qoruyucu şəbəkəyə qoşulanlar 70 faiz artıb
Bu gün ölkəmizin sığorta bazarında dinamik inkişaf nəzərə çarpır. Bu uğuru maliyyə sistemi qarşısında qoyulan çeviklik, rəqabətqabiliyyətlilik və innovativlik kimi vəzifələrin davamlı şəkildə həyata keçirilməsi şərtləndirir. Başqa sözlə, sığorta bazarı iştirakçıları üçün əlverişli mühitin yaradılması, şirkətlərin kapitallaşması, aktivlərin sağlamlaşdırılması, məlumatların mübadiləsi qaydasının təkmilləşdirilməsi, müştərilərin hüquqlarının müdafiəsi üzrə etibarlı mexanizmlərin yaradılması kimi istiqamətlərdə tədbirlərin görülməsi sözügedən sahədə tədricən yüksək göstəricilərin əldə edilməsinə zəmin yaradır.
Hazırda sığorta bazarının orta dövr (2025-ci ilədək) üçün inkişafı məqsədilə qarşıda bir sıra vəzifələr durur. Həmin vəzifələr sırasında mövcud bazarın ümumi biznes həcminin artırılması, bunun üçün mövcud könüllü sığorta məhsullarının təkmilləşdirilməsi və yeni məhsulların yaradılması tədbirlərinin gerçəkləşdirilməsi xüsusi diqqət çəkir. Bütün bunlarla yanaşı, sözügedən sistemdə hüquqi bazanın genişləndirilməsi və təkmilləşdirilməsi, icbari sığorta növlərinin artırılması üzrə fəaliyyətin sürətləndirilməsi də əsas hədəflərdən biridir.
Xatırladaq ki, Azərbaycan yenidən müstəqillik əldə etdikdən sonra sığorta sistemində müəyyən layihələrin icrasına başlanıb. Bu istiqamətdə yeni şirkətlər yaradılıb, onların bir qismi formalaşma dövründə zamanın tələblərinə cavab vermədiyindən bazarı tərk edib, digərləri isə beynəlxalq səviyyəyə uyğunlaşaraq bugünümüzə gəlib çatıb.
Mövcud sığorta strukturlarında bazarda sabit mövqeyə malik olmaq üçün idarəetmənin təkmilləşdirilməsi, müasir informasiya texnologiyası proqram təminatının reallaşdırılması, risklərin idarəedilməsi kimi məsələlər diqqətdə saxlanılır. Eyni zamanda, biznesin müasir təşkili və idarəedilməsi, xidmət keyfiyyəti, marketinq araşdırmaları ilə bağlı layihələrin icrası da daim önə çəkilir. Sığorta şirkətlərində maliyyə-investisiya fəaliyyətini genişləndirmək, kapitalı artırmaq və dayanıqlılığı gücləndirmək, qanunvericilik tələblərinə ciddi yanaşmaq, habelə elektron uçot və hesabat sistemlərini müasirləşdirmək, şəffaflıq və ədalətlilik kimi məsələlər də prioritet istiqamətlərdir.
Həyata keçirilən tədbirlərin nəticəsidir ki, son 3 il ərzində yerli sığorta bazarında 70 faizlik artım qeydə alınıb. Yerli sığorta bazarında artım dinamikası hədəf minimumunu üstələyərək 2021-ci ildə 16 faiz, 2022-ci ildə 18 faiz, 2023-cü ildə isə 26 faiz həcmində olub. Bu barədə bəhs edən Azərbaycan Sığortaçılar Assosiasiyasının (ASA) icraçı direktoru Elmar Mirsalayev mediaya müsahibəsində bildirib ki, bu uğurun əsası milli iqtisadiyyatımız üçün mühüm strateji önəm daşıyan və nəzərdə tutulan illər ərzində sığorta bazarının həcminin hər il 10 faiz artmasını başlıca hədəf indikatoru olaraq müəyyənləşdirən “Azərbaycan 2030: sosial-iqtisadi inkişafa dair Milli Prioritetlər” sənədinin qəbul edilməsi ilə qoyulub.
İcraçı direktor onu da vurğulayıb ki, ötən ilin ümumi sığorta icmalına əsasən, yerli bazarda hesabat dövrü ərzində 2022-ci illə müqayisədə 25,9 faiz çox olmaqla 1 milyard 222 milyon 537 min manat sığorta haqqı təmin edilib. Elmar Mirsalayev, həmçinin bildirib ki, 2023-cü il ərzində baş vermiş sığorta hadisələrinə görə həyata keçirilən ödənişlər 2022-ci illə müqayisədə 35,6 faiz artaraq 587 milyon 325 min manata yüksəlib.
Maliyyə bazarlarına, o cümlədən sığorta sektoruna nəzarətedici orqan olan Mərkəzi Bankın uğurlu və məqsədyönlü tənzimləmə siyasəti, o cümlədən peşəkar sığorta bazarı iştirakçılarının aktual çağırışlara adekvat operativ yanaşması nəticəsində əldə olunan bu uğur növbəti illər üzrə irəli sürüləcək proqnozlar üçün əminlik göstəricisidir.
Yeri gəlmişkən, Azərbaycanda aqrar sığortanın inkişafı barədə də qısa bəhs etmək istərdik. Bu sahə yeni sahə olsa da, onun tətbiqi kənd təsərrüfatına bir dinamizm, inkişaf gətirib. Prezident İlham Əliyevin rəhbərliyi ilə ölkədə həyata keçirilən iqtisadi islahatların tərkib hissəsi olan aqrar sığorta ötən müddətdə özünü fermerlərin və fərdi təsərrüfat sahiblərinin əsl dayağı, himayədarı kimi təqdim etməyi bacarıb. Bütövlükdə isə, bu mexanizmin işə düşməsi ötən müddətdə Azərbaycanda dövlət-özəl sektor tərəfdaşlığına mühüm töhfələr verib.
Xatırladaq ki, Azərbaycanda aqrar sığortanın tətbiqi Prezident İlham Əliyevin “Aqrar Sığorta Fondunun yaradılması barədə” 19 avqust 2019-cu il tarixli Fərmanı və “Aqrar sığorta haqqında” Azərbaycan Respublikasının Qanunu ilə tənzimlənir. Belə ki, həmin sənədlər kənd təsərrüfatında risklərin sığortalanması ilə bağlı münasibətləri tənzimləyir, aqrar sığortanın hüquqi, iqtisadi və təşkilati əsaslarını müəyyən edir.
Dövlət başçısının imzaladığı məlum fərmana əsasən, ölkəmizdə aqrar sığorta sisteminin təşkilini, inkişafını və dayanıqlılığını, eləcə də idarəedici qurumun formalaşdırılmasını təmin edən və onun fəaliyyətinə nəzarəti həyata keçirən Aqrar Sığorta Fondu qeyri-kommersiya hüquqi şəxs yaradılıb. Aqrar sığorta mexanizminin tətbiqinin əsas məqsədi isə təsərrüfat sahiblərini və fermerləri gözlənilməz təbiət hadisələrindən müdafiə etmək üçün işlək bir mexanizmin yaradılmasından ibarətdir.
Ötən müddətdə ölkə ərazisində baş verən leysan yağışları, sel-subasma da daxil olmaqla, demək olar ki, bütün təbii fəlakət riskləri–fırtına, sel, qasırğa, tufan, dolu və digər hadisələr sığorta təminatına daxil edilib. Ən çox sığortalanan əkinlər – buğda, arpa, pambıq, qarğıdalı, fındıq, şəkər çuğunduru, çəltik və üzüm sahələri, eləcə də meyvə bağlarıdır. Bütövlükdə isə, ötən dövrdə ölkəmizdə sığortalanan bitkilərin sayı 14-dən 41-ə çatdırılıb.
Vaqif BAYRAMOV
XQ