Keçmiş sovet ordusunun Xankəndidə dislokasiya olunmuş 366-cı motoatıcı alayının ikinci motoatıcı taborunun komandiri kimi mayor rütbəsində 1992-ci ilin fevralında Xocalı soyqırımının aktiv iştirakçısı, daha sonra – may ayında Şuşaya dörd istiqamətdən hücuma keçən dəstələrdən birinə rəhbərlik etmiş, 2008–2016-cı illərdə Ermənistanın müdafiə naziri olmuş Seyran Ohanyan yenə öz ampluasındadır. Hazırda Ermənistan parlamentindəki müxalifətçi “Hayastan” fraksiyasına rəhbərlik edən Ohanyan vaxtaşırı jurnalistlərə müsahibələr verir. Bu müsahibələri oxuyanda onun normal düşüncə sahibi olduğuna inanmırsan.
İkinci Qarabağ müharibəsində əvvəlcə birbaşa ordu sıralarında könüllü, sonra isə “dqr qlavarı” Arayik Arutyunyanın “müşaviri” kimi iştirak edən, 2020-ci il noyabrın əvvəlində Şuşa uğrunda gedən döyüşlərdə ordu komandirlərindən biri olan, Azərbaycan Ordusunun yaxınlaşdığını görən kimi qaçıb aradan çıxan Ohanyan bugünlərdə iddia edib ki, məğlub olan ordu deyil, bu hakimiyyətin rəhbərlik etdiyi dövlətdir: “Ermənistan ordusu son dərəcə ağır məcburi müharibə (?) və “Artsax”ın mühasirəsi (?), eləcə də 1988-ci ilin dekabrında baş vermiş zəlzələ şəraitində qurulub. Amma biz bu şəraitdə də fədai dəstələrindən (könüllülərdən-S.H.) ibarət nizami ordu qurub qələbələr qazana bildik. Bu illər ərzində biz ordumuzu silahlandıra və onu nəinki qalib, həm də rəqabətədavamlı orduya çevirə bilmişdik. Ordunun və xalqın birliyi sayəsində güclü, təhlükəsiz, iqtisadi inkişafa və digər imkanlara malik vahid, inteqrasiya olunmuş Ermənistan-“Artsax” strukturu mövcud idi. İndiki hakimiyyətin zamanında bu birlik məhv edilib. Birlik və mənəvi-psixoloji ruh isə bizim qələbəmizi təmin edən əsas amillər idi”.
Sabiq nazirin sözlərinə görə, indiki hakimiyyətin sayəsində nizami ordu yenidən müxtəlif könüllü birləşmələrə çevrilib: “İndiki hakimiyyət inkar etsə də, deməliyik ki, keçmişdə ordu məğlubedilməz idi, bölgəmizdə rəqabətqabiliyyətli ordu idi. Bu gün hakimiyyətdə olanlar isə dövlətin potensialından tam istifadə etmədilər, əksinə, xalqımızı parçaladılar. Məhz bu parçalanmaya görə məğlub olduq. Lakin məğlubiyyətə uğrayan ordu deyildi. İndiki hakimiyyətin idarə etdiyi dövlət məğlubiyyətə uğradı”.
Qeyd etdiyimiz kimi, S.Ohanyan 8 il müdafiə naziri vəzifəsini tutub. Ondan öncə isə keçmiş qondarma rejimin və Ermənistanın işğalçı ordusunda müxtəlif vəzifələrdə işləyib. O cümlədən, 1997–1999-cu illərdə Ermənistan ordusunun korpus komandiri, 1999–2007-ci illərdə separatçı rejim ordusunun başçısı, 2007-ci ildən etibarən Hayastan silahlı qüvvələrinin baş qərargah rəisi və müdafiə nazirinin 1-ci müavini olub. Vətən müharibəsi başlayanda Ohanyan 4 il idi ki, vəzifəsindən uzaqlaşdırılmışdı. Onun mənsub olduğu düşərgə, yəni Qarabağ klanı isə cəmi 2 il idi ki, siyasi səhnədən, necə deyərlər, süpürülüb atılmışdı. Yəni, Azərbaycanın məğlub etdiyi, əslində, Serj Sarkisyanın, Robert Koçaryanın və həmin Seyran Ohanyanın ordusu idi.
Ohanyanın soyadı bizə həm də “Ohanyan səddi” adlanan müdafiə istehkamları sistemini xatırladır. Həmin sədd işğal dövründə S.Ohanyanın birbaşa rəhbərliyi altında qurulub və sonradan daha da möhkəmləndirilib. Azərbaycan və Ermənistan arasındakı təmas xətti eynilə “Ohanyan səddi” ilə üst-üstə düşürdü. Haylar hər zaman həmin müdafiə xətti ilə öyünürdülər. Onun uzunluğu 180 kilometrdən 200 kilometrə qədər idi. Murovdağ silsiləsi təmas xəttinin şimal hissəsi sayılır və mahiyyət etibarilə iki qüvvə arasında təbii sərhəd rolunu oynayırdı. Şərq istiqaməti isə “Ohanyan səddi”nin əsas seqmentini təşkil edirdi. Hələ 2016-cı ilin Aprel döyüşləri zamanı – Ohanyanın nazir olduğu dövrdə ordumuz həmin səddi yarmağa müvəffəq oldu. Hektarlarla ərazi düşməndən geri alındı. Əsas uğur Lələtəpə yüksəkliyinin ələ keçirilməsində qazanıldı. Gələcək böyük zəfərimizin ilk “qaranquşu” olan Aprel döyüşləri Ermənistan ordusuna və şəxsən S.Ohanyana ağır zərbə oldu. Məhz həmin döyüşlər Ohanyanın nazir vəzifəsindən çıxarılmasında mühüm rol oynadı. Bütövlükdə, Serj Sarkisyanın siyasi hakimiyyəti isə laxladı. Azərbaycan Ordusunun şanlı Aprel qələbəsi ilə əsası qoyulan Ermənistan cəmiyyətindəki narazılıq 2 il sonra – 2018-ci ilin yazında kulminasiya nöqtəsinə çatdı və Sarkisyan vəzifəsi ilə vidalaşmalı oldu.
Bütün bunları qeyd etməkdə məqsədimiz Azərbaycanın məğlub etdiyi ordunun, əslində, Sarkisyan–Koçaryan ordusu olduğunu göstərməkdir. Həmin ordunun başında isə Ohanyan dayanırdı. Bu xüsusda fikirlərini Prezident İlham Əliyev də zaman-zaman bildirib. Dövlətimizin başçısı 2021-ci il avqustun 16-da Kəlbəcər şəhərində Dövlət Bayrağını ucaltdıqdan sonra etdiyi çıxışı zamanı dedi: “Bu müharibə, eyni zamanda, erməni mifologiyasının tamamilə məhv olması deməkdir. Çünki uzun illər ərzində, 30 il ərzində ermənilər “hərbi qələbə” ilə öyünürdülər. Ermənilər bir neçə mif uydurmuşdular ki, onların ordusu “yenilməz ordu”dur və onların ordusu bu torpaqları əbədi işğal altında saxlaya bilər. Biz bu mifi dağıtdıq. Erməni ordusu yoxdur bu gün. Erməni ordusu tamamilə məhv edildi. Erməni ordusunun silah-sursatlarının mütləq əksəriyyəti məhv edildi, ya da ki, qənimət kimi götürüldü və indi Hərbi Qənimətlər Parkında nümayiş etdirilir. Biz erməni ordusunu “yenilməz ordu” kimi təqdim edən mifologiyaya son qoyduq”.
Prezident qeyd etdi ki, növbəti mif onların “sərkərdələri” ilə bağlı idi: “Guya, Ermənistanda elə görkəmli generallar, sərkərdələr var ki, onlar istənilən hərbi vəzifəni yerinə yetirə bilərlər. Biz gördük ki, onların generalları oğrudurlar, “tuşenka” satandırlar. Onların sərkərdələri də qorxaqdırlar, fəraridirlər. Xocalı cəlladları Koçaryan, Sarkisyan, Ohanyan müharibə zamanı Qarabağa soxulmuşdular, orada idilər. Amma görəndə ki, müzəffər Azərbaycan Ordusu öz torpaqlarını qəhrəmancasına azad edir, qaçdılar gizləndilər. Soruşmaq lazımdır onlardan, oradan nəyə görə çıxdılar? Onlar Xankəndidə idilər, üçü də. Niyə qaçmısınız? Niyə gizlənmisiniz? Mən demişəm, bir daha deyirəm, o dəmir-dümürləri çıxarın, onları atın zibil yeşiyinə! Siz fərarisiniz, qorxaqsınız! Biz sizi məhv etmişik! Xocalı soyqırımında ən fəal rollardan birini oynayan keçmiş müdafiə naziri Şuşadan güclə canını qurtardı, son anda canını qurtardı”.
Bəli, Prezident İlham Əliyev Ermənistanın keçmiş müdafiə naziri deyərkən S.Ohanyanı nəzərdə tutur. Ohanyan isə, necə deyərlər, ayıbına kor olmaqdansa, sağa-sola “müsahibələr paylamaqla” məşğuldur.
Ancaq onun cavabı elə Ermənistanın media mənsubları tərəfindən verilir. Bu günlərdə “Armenian Report” saytında yerləşdirilən məqalədə bildirilir ki, postsovet dövründə Ermənistanın müdafiə nazirləri sarıdan bəxti gətirməyib: “1990-cı illərin qanlı müharibəsi müharibədən sonrakı illərdə müdafiə nazirliyində ən mühüm postlara cəsur və bacarıqlı komandirləri gətirməli idi. Təəssüf ki, bizim ölkədə Vazgen Sarkisyan istisna olmaqla, hər şey tamam tərsinə getdi. Bütün digər müdafiə nazirləri kürsüyə yalnız zənginləşmə fürsəti kimi baxırdılar. Burada Koçaryana və xüsusən də Sarkisyana yaxınlığına görə nazir kürsüsündə ən uzun müddət oturmuş general-polkovnik Seyran Ohanyan xüsusilə fərqlənir. Ohanyanın dövründə nazirlik tamamilə korrupsiya bataqlığında idi və ordu sürətlə parçalanmağa başladı. Hazırda parlamentdəki “Hayastan” fraksiyasının rəhbərinin indiki hakimiyyətin ünvanına ittiham xarakterli çıxışlar edərək, özünü vətənin maraqlarının qoruyucusu kimi göstərmək cəhdləri indi daha gülüncdür. Eyni zamanda, Seyran Muşeqoviç hələ də Ermənistanın gələcəyi ilə bağlı qorxulu hekayələr səsləndirməyi bacarır. Onlar hesab edirlər ki, ölkə üçün nə qədər pis olarsa, Paşinyanı devirmək və hakimiyyətə qayıtmaq şansları bir o qədər çox olacaq. Ancaq xalq sizi ona görə devirməyib ki, yenidən hakimiyyətə qaytarsın. Siz bizim dövlətin başında görmək istədiklərimizin uzun siyahısında sonuncusunuz”.
Məqalədə deyilir ki, ordunun vəziyyəti haqqında Ohanyan yox, başqaları danışmalıdır. Çünki ordunu məhv edən elə Ohanyan və generalları olub: “Müdafiə nazirliyinin binalarını, torpaq sahələrini güzəştli qiymətlərlə özgəninkiləşdirən, sonradan on qat baha qiymətə satan o və generalları idi. Məhz Ohanyan və onun generalları öz xidməti vəzifələrini yerinə yetirmədilər və bu, ağır nəticələrə gətirib çıxardı. Xüsusilə 2016-cı ilin aprelində Azərbaycanın müharibəyə hazırlığı dövründə bizim hərbçilər yatırdılar. Məhz Ohanyan və onun generalları qeyri-döyüş şəraitində çoxlu hərbi qulluqçunun ölümünə görə məsuliyyət daşıyırlar, onların heç biri cəzalandırılmayıb. Nizamnamədən kənar hərəkətlər, oğru düşüncəsi, zabitlərin özbaşınalığı, əsgərlərin vəhşicəsinə döyülməsi və öldürülməsi, irimiqyaslı korrupsiya – bütün bunlar Ohanyanın müdafiə naziri olduğu dövrdə inanılmaz dərəcədə “çiçəklənib”.
Bildirilib ki, həmin vaxt heç kim Seyranın məsuliyyətə cəlb olunmasını tələb etməyə cürət etmirdi, çünki Serj Sarkisyan şəxsən Ohanyanın arxasında dayanırdı: “Serj yalnız 2016-cı ilin aprel uğursuzluğundan, ərazi və insan itkilərimizdən sonra ondan ayrılmaq məcburiyyətində qaldı. Ancaq Sarkisyanın dövründə onlar məsuliyyətə cəlb olunmadılar. Yalnız “məxməri inqilab”dan sonra generallar və nazir varlananda, milyonlarla sərvət toplayanda, sıravi əsgərlərin alt paltarının belə olmadığı acınacaqlı durum ictimaiyyətə açıqlanmağa başladı. Onda Ohanyan ilan kimi qıvrıldı... Məlum oldu ki, Seyran Muşeqoviçin və generallarının zolaqlı şalvarlarının ciblərinə pullar göydən tökülübmüş. Siz milyonlarla dollar qazandınız, mövqelərdəki əsgərlərin isə normal çəkmələri, hətta gecə görmə cihazları da yox idi”.
“Armenian Report” qeyd edir ki, bütün bunlara görə, ilk növbədə, Seyran Ohanyan məsuliyyət daşıyır.
Azərbaycan Ordusunun sabiq korpus komandiri, ehtiyatda olan polkovnik Şair Ramaldanov “XQ”yə bildirdi ki, Ohanyanın gündəmə gəlmək istəyində və belə fikirlər söyləməsində təəccüblü hal yoxdur. Qeyd etdi ki, “Qarabağ klanı” yenidən hakimiyyətə gəlməyə can atır: “Paşinyan İkinci Qarabağ müharibəsi başlananda hakimiyyətə yeni gəlmişdi. Onun dövründə orduda hansısa islahatlar aparmaq vaxt baxımından mümkünsüz idi. Bu elə Ohanyanın ordusu idi. “Ohanyan səddi”nin keçilməz olduğu barədə mifin müəllifi də Seyran özü idi. Azərbaycan Ordusu həmin xəttin keçilməz və Ermənistan ordusunun məğlubedilməz olmadığını 2016-cı ilin Aprel döyüşlərinin ilk saatlarında sübut etmişdi. Yəni, bu, həmin Ohanyanın qurub-yaratdığı sədd və ordu idi”.
Şair Ramaldanov qeyd etdi ki, Ohanyanın rəhbərlik etdiyi ordu barədə mənfi fikirlər söyləyəcəyini gözləmək olmaz: “Ohanyanın dövründə orduda korrupsiya, hərbçilər arasında nizamnamədən kənar münasibətlər, çoxlu özünəqəsd faktları, hətta, müəyyən hərbi bölüklərin əmrə tabe olmaqdan imtina etməsi kimi hallar mövcud idi”.
Müsahibimiz vurğuladı ki, İkinci Qarabağ müharibəsi zamanı Şuşanın müdafiəsinə cavabdeh olan da Ohanyan idi və o, şəhər işğaldan azad edilərkən güclə qaçıb canını qurtarmışdı. Bu mənada Ohanyanın hansısa başqa fikirlər söyləyəcəyini gözləmək də düzgün olmazdı.
Siyasi ekspert Zaur Məmmədov isə dedi ki, Ohanyanın bu çıxışı siyasi gündəmdə qalmaq üçün edilən cəhdlərdən biridir. Onun sözlərinə görə, hazırda müxalifət Paşinyandan sonrakı dövrə hazırlaşır: “Hətta, vəziyyət gərginləşərsə və Paşinyanın hakimiyyətdən getməsi qarşısıalınmaz proses olarsa, bununla bağlı iqtidar komandasında da müəyyən ssenarilər mövcuddur. Yəqin ki, xarici qüvvələrin də vəziyyətin dəyişəcəyi təqdirdə müəyyən planları var. Bu kontekstdə Ohanyanın ordu ilə bağlı dedikləri təsadüfi sayıla bilməz. Çünki ordunun hansı vəziyyətdə olması Ermənistanda hər kəsə məlumdur”.
Z.Məmmədov qeyd etdi ki, Ermənistanda ordu ilə bağlı strateji planlaşdırma mövcud deyil. Hərbçi kadrlar yeni alınan hərbi texnikaları mənimsəməkdə problem yaşayırlar. Ölkə ətrafında geosiyasi mübarizə gedir. Belə olan vəziyyətdə Paşinyan ordunun gücləndirilməsinə çalışsa da, mövcud kadrlarla, maddi və siyasi resurslarla bunu etmək müşküldür.
Siyasi şərhçi onu da bildirdi ki, Paşinyanın orduda islahatlar həyata keçirmək üçün 3-5 il, Koçaryan–Sarkisyan–Ohanyan üçlüyünün isə 20 ildən çox vaxtı olub. Ancaq onlar bu zamanı ordu quruculuğuna yox, korrupsiya və rüşvətə, siyasi rəqibləri ilə haqq-hesab çəkməyə, ambisiyalarının təmin olunması həsr ediblər. Nəticə isə göz önündədir.
Səxavət HƏMİD
XQ