Şantaj, məkr və sülh prosesindən yayınma cəhdləri
Ermənistan Milli Təhlükəsizlik Xidməti (MTX) məlumat yayıb ki, Qarabağdan çıxmış hərbçilər arasında sorğu aparılıb və minalanmış ərazilərin xəritələri aşkarlanıb. Məlumatda o da bildirilib ki, Ermənistanın dövlət qurumları əlavə xəritələr tərtib etmirlər, minaların yerini sorğular nəticəsində hərbçilərdən alırlar.
Hər halda, bu iki cümlənin nə qədər məkrli səsləndiyinin fərqinə vardınız. Deməli, rəsmi İrəvan mina xəritələri məsələsindən siyasi alət kimi istifadəni davam etdirmək əzmindədir. Bəli, məhz davam etdirmək. Çünki, belə bir məkrli xəttin start götürdüyünün anonsu Ermənistan MTX-nin açıqlamasından əvvəl verilib. Anonsu kim verib, bu barədə də söz açacağıq.
Yeri gəlmişkən, Ermənistan MTX-nin açıqlaması Azərbaycanın Xarici İşlər Nazirliyinin açıqlaması ilə eyni vaxta təsadüf edir. Ölkəmizin ali diplomatiya idarəsi 2020-ci il müharibəsindən həm əvvəl, həm də sonra qarşı tərəfdən düzgün mina xəritələrinin verilməsinin dəfələrlə tələb olunduğunu vurğulayıb. Nədənsə, erməni siyasi dairələri bu mövqeni qeyri-konstruktiv yanaşma kimi dəyərləndirirlər. Nəyə görə? Buna da diqqət yetirəcəyik. Ancaq, ilk növbədə, başqa suala cavab axtaraq: Ermənistan MTX-nin açıqlaması konstruktivdir? Əlbəttə, yox! Qeyd edək ki, indiyədək İrəvandan Bakıya səkkiz mina xəritəsi təqdim olunub. Bunlarda dəqiqlik faizi olduqca aşağıdır. Nəzərə alaq ki, ölkəmizin yüzlərlə dinc sakini və hərbçisi mina terrorunun qurbanı olub...
Ermənistan MTX-nin indiki açıqlaması onu deməyə əsas verir ki, İrəvan dəqiq xəritələr vermək niyyətindən uzaqdır. Necə yəni ki, minaların yerləri hərbçilər arasında aparılmış sorğu ilə müəyyənləşir? Belə şey olar? Deməli, bir daha o qənaətə gəlirik ki, Ermənistan mina xəritələri məsələsindən siyasi alət kimi istifadədə maraqlıdır. Və burada haqqında söz açdığımız anonsa keçid ala bilərik.
Bəli, mina xəritələri mövzusunda aşkar manipulyasiya təsiri bağışlayan, qeyri-müəyyən mahiyyət daşıyan ilk açıqlamanın müəllifi Ermənistan MTX deyil, ölkənin xarici işlər naziri Ararat Mirzoyandır. Heç şübhəsiz, nazir mövcud istiqamətdə daha da “irəli getməsi” ilə diqqət çəkib. Yəni, Mirzoyanın ötən həftə bildirdikləri İrəvanın Bakıya düzgün mina xəritələri vermək istəmədiyinin təsdiqidir. O, faktiki olaraq, bunu etiraf edir.
Həm Mirzoyanın söylədiklərindən, həm də Ermənistan MTX-nin açıqlamasından gəlinən qənaət budur ki, mina terroru Ermənistanın Azərbaycana qarşı siyasətinin mühüm tərkib hissəsinə çevrilib. Diqqət yetirək: Mirzoyan deyirdi ki, əgər etimad mühiti yaranarsa, beynəlxalq ictimaiyyətin də iştirakı ilə Ermənistan Qarabağdakı mina sahələrinin yeni xəritələrini Azərbaycana verə bilər. “Beynəlxalq ictimaiyyətin iştirakı”, “etimad mühiti yaranarsa”. Erməni XİN rəhbəri, göründüyü kimi, şərt qoyur.
Azərbaycan nəinki bu məsələdə, ümumən, özünə münasibətdə sərt ritorikasının işə salınmasına birmənalı qaydada yol verməyəcək. Bunu qarşı tərəf də gözəl anlayır, ancaq kor inadından əl çəkmir. Nəticədə əvvəl Mirzoyan, indi isə Ermənistan MTX mina xəritələri kimi vacib məsələyə sərsəm münasibət bildirir. Elə bil, sıravi hərbçilər yerə minanı tarlada taxıl əkirlərmiş kimi basdırıblar... Bu qənaətə gəlirik ki, MTX-nin açıqlaması Ermənistan XİN tərəfindən müəyyənləşdirilmiş manipulyativ xəttin inkişaf etdiriləcəyinin təsdiqidir. Həqiqətən də, dəhşətli düşüncədir.
Mina xəritələri ilə bağlı Mirzoyanın baş vurduğu növbəti həyasızlıq da var. O demişdi ki, guya, Qarabağda minaları azərbaycanlıların özləri ötən əsrin 90-cı illərinin əvvəllərində ərazidən çıxarkən basdırıblar, Ermənistan isə tədqiqatlar yolu ilə yeni mina xəritələri hazırlamağa çalışır. Yəni, özünüz basdırmısınız, bizlik deyil. Hələ bir minnət də qoyulur. Sual yaranır: necə ola bilər ki, azərbaycanlılar 90-cı illərdə ərazidən çıxarkən, minalar basdırıblar və ötən otuz ilə yaxın müddətdə bir nəfər də olsun erməni həmin minaların qurbanı olmayıb?
Digər yandan, azərbaycanlılar doğma yurdlarına qayıtmağı düşündükləri üçün onların mina basdırmaları, əsla, mümkün deyil. Yəni, erməni XİN rəhbərinin ağlı özlərinə gedib. O, tipik erməni təfəkkürünü azərbaycanlılara şamil etmək kimi son dərəcə həyasız gedişə baş vurur. Daha bir məqam da var. Axı həmin vaxt azərbaycanlıların nəinki minaları, heç ov silahları belə yox idi...
Bəli, hazırda Ermənistanın siyasi dairələri Azərbaycan XİN-in dəqiq mina xəritələrinin verilməsi ilə bağlı tələbini Bakının qeyri-konstruktiv davranışı və sülh prosesini pozmağa yönəlmiş addımı kimi qiymətləndirirlər. Əslində, ən böyük manipulyasiya budur. Onlar ölkəmizin rəsmilərinin indiyədək verilmiş xəritələrin yararsızlığına dair açıqlamalarını da mövcud kontekstdə dəyərləndirmək yolunu tuturlar.
Digər tərəfdən, Mirzoyanın dilə gətirdiklərinə diqqət yetirsək, belə təəssürat yaranır ki, İrəvan mina xəritələri məsələsindən danışıqlar prosesində hansısa üstünlük qazanmaq naminə istifadədə də maraqlıdır. Heç şübhəsiz, bu, siyasi şantajdır. Üstəlik, Ermənistan şantajına beynəlxalq dairələri, iki ölkə arasında vasitəçilik missiyasını üzərinə götürmüş tərəfləri də daxil etmək istəyir. Daha doğrusu, İrəvan xəritə mövzusunu ortaya atmaqla əldə etmək istədikləri üçün beynəlxalq təminat amilinin mövcudluğunda maraqlıdır. Əlbəttə, buna təminat demək yerinə düşmür. Çünki, bu tamam cəfəngiyyatdır.
Hazırda erməni iqtidarına yaxın siyasi dairələrin mina xəritələri ilə əlaqədar qaldırdıqları bir məsələ də var. Söhbət ölkəmizdə saxlanıldığı iddia edilən erməni hərbi əsirlərdən gedir. Guya, həmin əsirlər geri qaytarılmasa, Azərbaycan dəqiq mina xəritələrini görməyəcək.
Nəhayət, bu mövzuda üzərində dayanılan növbəti məqam da diqqətdən yayınmır. Erməni siyasi dairələri vurğulayırlar ki, mina xəritələrinin, guya, dəqiq olmaması tam mümkündür. Onlar fikirlərini sübuta yetirmək üçün müxtəlif “arqumentlərə” baş vururlar. Ancaq, sən demə, bu “arqumentlərin” axtarılıb-tapılmasında da məqsəd var. “Məqsəd” isə aşağıdakı məqamı regionun və dünyanın ictimai rəyində möhkəmləndirməyə yönəlib: Bakı mina xəritələri tələb edirsə, Azərbaycan Ermənistanla sülh müqaviləsi imzalamaqdan yayınır. Belə çıxır ki, Ermənistan mina xəritələrini Azərbaycan tərəfindən sülh prosesi ilə bağlı səsləndirilmiş bütün fikirlərə əks arqument kimi istifadəni nəzərdə tutur. Əlbəttə, belə yanaşma da son dərəcə məkrlidir, reallıqlardan uzaqlaşmaq, onları qəbul etməmək cəhdidir.
Ə.CAHANGİROĞLU
XQ