Raşida Datinin mədəniyyət naziri təyin olunması hayları pəjmürdə edib
Fransa hökumətindəki ilk müsəlman qadın, 2007–2009-cu illərdə ədliyyə naziri vəzifəsində çalışmış Raşida Datinin yanvarın 11-də ölkənin mədəniyyət naziri təyin edilməsi dünya ermənilərinin hiddətinə səbəb olub. Ölkənin “Le Figaro” qəzetinin direktor müavini Jan-Kristof Byusson R.Datinin Fransanın mədəniyyət naziri təyin edilməsini şərh edərkən onun anti-erməni mövqeyini xatırladıb. Deyib ki, Fransa erməniləri bu gün kədər içərisindədirlər.
Byusson sosial şəbəkədəki paylaşımına Fransanın sabiq prezidenti Fransua Ollandın və Azərbaycan Prezidenti İlham Əliyevin təsvir olunduğu 2016-cı ilə aid bir fotoşəkili əlavə edib. Fotoşəkil 10 fransız deputat və senatorun Azərbaycan və Ermənistan arasındakı münaqişədə Azərbaycanın xeyrinə qərar qəbul etmək üçün prezident Ollandı BMT-də vasitəçiliyə çağırmasından sonra çəkilib. 2016-cı ildə Raşida Dati “Le Figaro”nun əməkdaşı ilə söhbətində bildirmişdi ki, yaxşı azərbaycanlılar pis ermənilərin qurbanı olub.
Qeyd edək ki, Mərakeş əsilli, 1965-ci il təvəllüdlü R.Dati Fransada Azərbaycana müsbət münasibət bəsləyən, nazir təyin edildikdən sonra ermənilərin narazılığına səbəb olan azsaylı siyasətçilərdən biridir. R.Dati ölkəmizin yaxın dostu olmaqdan qürur duyduğunu dəfələrlə bəyan edib. Bununla bağlı narahatlığını Fransanın Erməni Təşkilatlarının Koordinasiya Şurasının sədri Murada Papazyan, “Nouvelles d'Armenie” jurnalının baş redaktoru Ara Toranyan və İl-de-Frans şəhər şurasının üzvü Patrik Karam da bildiriblər.
Ötən ilin iyulunda Raşida Dati bildirmişdi ki, Azərbaycan dini və etnik qruplar arasında əlaqələr baxımından bütün dünya üçün nümunə ola bilər.
“Mədəniyyətlərarası və sivilizasiyalararası dialoqa böyük töhfə verən Azərbaycanın rolunu xüsusilə qeyd etmək istərdim. UNESCO bəyan edib ki, bu ölkədə təhsil səviyyəsi 95 faiz təşkil edir. Bu da əla göstəricidir. Azərbaycanın inkişafı çox böyük təəssürat yaradır”, – deyə əlavə etmişdi. R.Dati bildirmişdi ki, Azərbaycan dini və etnik qurumlar arasında əlaqələr, onların əsrlər boyu dinc yanaşı yaşaması baxımından bütün dünyaya nümunə ola bilər.
R.Dati qeyd etmişdi ki, o, hər il Bakıya gəlir və hər gəlişində yeni Azərbaycanı kəşf edir, gözəl adət-ənənələrlə tanış olur: “Azərbaycan, həqiqətən, zəngin mədəniyyətə malik ölkədir. Mən bunu siyasətçi kimi yox, bu ölkəni bütün qəlbi ilə sevən bir insan kimi deyirəm. Azərbaycan xalqı əsrlər boyu bu dəyərləri qoruyub saxlamış, öz mədəniyyəti ilə fəxr edir və dövlət siyasəti mədəniyyətin milli qürur subyekti kimi yerləşdirilməsinə yönəlib”.
R.Dati Azərbaycanın Dostları Assosiasiyasının İdarə Heyətinin üzvüdür. O, ölkəmizdə və regiondakı vəziyyəti yaxşı bilir. Hər zaman Azərbaycana qarşı ədalətli mövqeyi ilə seçilib, buna görə tez-tez erməni lobbisinin tənqid və təxribat hədəfinə çevrilib.
Ermənistanın “Armenian report” saytı R.Datinin nazir təyin olunmasından narahatlığını “Fransa səhv edir: Paris onu düzəltməlidir” məqaləsi ilə ifadə edib. Yazıda qeyd olunub ki, ermənilər bir çox yaxşılıqlara görə Fransaya minnətdardır, lakin bu Avropa ölkəsinin rəhbərliyi bəzən etməməli olduğu işlər görür: “Fransanın yeni təyin olunmuş xarici işlər naziri Stefan Sejurne bazar günü Almaniyaya, bazar ertəsi isə Polşaya səfər edəcək. Səfərdə məqsəd Ukraynanın problemlərini Avropa orqanlarında qaldırmaqdır. Sejurne Almaniyada ölkənin xarici işlər naziri Annalena Berbok, Polşada isə ölkənin xarici işlər naziri Radoslav Sikorski ilə görüşəcək. Bəli, biz Fransanın Rusiya–Ukrayna müharibəsində getdikcə daha fəal rol oynamağa necə can atdığını görürük. Stefan Sejurnenin XİN rəhbəri kimi ilk səfərini Kiyevə etməsi çox əlamətdardır. Bəli, Parisdə Böyük Britaniya ilə ayaqlaşmağa çalışırlar. London artıq Ukrayna ilə təhlükəsizlik sahəsində əməkdaşlıq haqqında saziş imzalayıb. Sənədə Ukrayna Prezidenti Vladimir Zelenski və Böyük Britaniyanın Baş naziri Rişi Sunak imza atıblar. Böyük Britaniya dünyada Ukrayna ilə əməkdaşlığa dair belə bir sənəd imzalayan ilk ölkə oldu. Müqavilə Ukraynanın təhlükəsizliyinə dəstək məqsədilə Britaniya və Ukrayna arasında hərbi və qeyri-hərbi əməkdaşlığı rəsmiləşdirir. Parisdə hamı bunu gördü və ildırım sürəti ilə cavab vermək qərarına gəldilər. Bəs Cənubi Qafqaz və niyə biz Fransadan Ermənistana eyni dərəcədə ildırım sürətli dəstək görmədik?!”
“Armenian report” yazır: “Bakıda Fransanın müttəfiqini onun ərazisinə hücumlarla hədələsələr də (?) Parisdən səs çıxmır. Sadə dillə desək, bizim Fransadan Ermənistana dəstək üçün güclü addımlar atacağını gözləməyə haqqımız var. Ancaq hələlik biz tamamilə fərqli mənzərə görürük. Raşida Datinin Fransanın yeni mədəniyyət naziri təyin edilməsi şokedici xəbərdir. Bu xanım çox bədnamdır”.
Sayt daha sonra qeyd edib ki, hər bir halda, Azərbaycanı, onun siyasətini açıq dəstəkləyən xanımın belə yüksək posta təyin olunması absurd və qəbuledilməz vəziyyətdir: “Bu, heç də Fransa rəhbərliyinin görməli olduğu iş deyil. Ancaq gördüyümüz kimi, bu, belədir. Raşida Datinin təyinatı Azərbaycanı sevindirməyə xidmət edir. Fransa bu addımı ilə bizim gözümüzdə nüfuzunu itirir. Parisin etdiyi səhvi düzəltməsi lazımdır. Və nə qədər tez düzəltsə, onun özü üçün bir o qədər yaxşıdır”.
Göründüyü kimi, ermənilər Fransa hökumətindəki yeni təyinatla bağlı xeyli pəjmürdə olublar. Onların belə halla üzləşməsi isə ilk dəfə deyil. Artıq dünyanın bir çox yerlərində hayların xislətinə bələddirlər. Fransadakı təyinat isə onlar üçün aydın səmada çaxan şimşək effekti yaradıb. Dünya ermənilərinin bundan sonra da oxşar hallarla üzləşməyəcəyi istisna deyil. Çünki bu, haqq-ədalətin təntənəsidir. Haqq isə gec-tez öz yerini tapır.
Səxavət HƏMİD
XQ