Ermənistanın Qərbi Azərbaycanda əsrlər boyu ata-baba torpaqlarında yaşamış soydaşlarımızın son nəsillərini soyqırımına və zorakı deportasiyaya məruz qoyması XX əsrin son dövrünün bəşəri cinayətlərindən biri kimi tarixə yazılıb. Bunun ardınca təcavüzkar dövlətin ölkəmizin 20 faiz ərazisini işğal edib yerli əhalini öz yurdunda məcburi köçkünə çevirməsi, şəhər və kəndlərimizi xarabazara döndərməsi isə tarixdə törədilmiş vandallıqların misilsiz nümunəsidir.
Hazırda urbisid, ekosid, mədəni irsi məhvetmə əməlləri transmilli cinayət hüququnun əsas mənbəyindən biri kimi tanınan Beynəlxalq Cinayət Məhkəməsinin Roma Statutunda, eləcə də milli cinayət qanunvericiliyimizdə qismən müharibə cinayətlərinin (CM-nin 116-cı maddəsi üzrə) tərkibləri kimi əksini tapıb. Ermənistanın Qərbi Azərbaycanda və ölkəmizə qarşı 35 il davam etdirdiyi cinayətlər dinc əhalinin məhv edilməsi, soyqırımı, deportasiya, etnik təmizləmə və s. beynəlxalq cinayətlərin törədilməsi ilə yanaşı, mədəni irsi məhvetmə kimi vandallığın baş verməsinə də səbəb olub.
Ermənistanın xalqımızın öz yurdunda yaşamaq hüququna təcavüzu bir milyona yaxın mülki əhalinin həyat, sağlamlıq, öz doğma evlərində yaşamaq və s. haqlarına qəsd edərək mədəni sərvətlərin məhv edilməsinə və talanmasına da səbəb olmuşdur. Ümumiyyətlə, azərbaycanlılar son 2 əsrdə ermənilər və onların havadarları tərəfindən deportasiyaya, soyqırımına məruz qalıb, nəticədə, indiki Ermənistan adlanan ərazidəki öz ata-baba yurdlarından didərgin düşüblər. XX əsrdə azərbaycanlılar 4 dəfə – 1905–1906, 1918–1920, 1948–1953, 1988–1991-ci illərdə tarixi-etnik torpaqlarından deportasiya olunublar. Bu zaman soydaşlarımız soyqırımına, işgəncələrə, qırğınlara məruz qalıblar, xalqımıza məxsus minlərlə tarixi-mədəni abidə və yaşayış məskəni məhv edilib.
Tarixçilərimizin araşdırmalarına görə, Qərbi Azərbaycanda vaxtilə azərbaycanlıların yaşadıqları 499 kənd zorla boşaldılıb və bu gün xaraba vəziyyətdədir. Azərbaycanlılara məxsus 702 toponim erməniləşdirilib. Təkcə Qərbi Zəngəzurda azərbaycanlılar 70-dən artıq kənddə yığcam şəkildə yaşayırdılar. Göyçə gölü hövzəsində də azərbaycanlılar əksəriyyət təşkil edirdilər. Qərbi Azərbaycanda soydaşlarımızın vaxtilə yaşadıqları 734 kənddə indi ermənilər məskunlaşıb.Vaxtilə Ermənistanın 170 kəndində ancaq azərbaycanlılar məskunlaşmışdılar. 90-a yaxın kənddə isə onlar çoxluq təşkil edirdilər. Qərbi azərbaycanlılar, ümumilikdə, 300-dən çox şəhər və kənddə yaşayırdılar. 1988-ci ildə onların hamısı Ermənistandan zorla qovuldular. Çox sayda dinc insan öldürüldü, işgəncələrə məruz qaldı. Son deportasiyaya isə 1991-ci ilin avqustunda Nüvədi kəndinin sakinləri məruz qaldılar.
Qərbi Azərbaycandan çıxarılmağımız və Qarabağın işğalı ümummilli faciəmizə çevrildi. Bütün bunlar barəsində xarici aləm məlumatlı olsa da, dünyaya hökm edən siyasi-dini mərkəzlərinin işarəsi ilə beynəlxalq qurumlar özlərinin yaratdıqları qaydaların açıq-aşkar tapdalanmasına göz yumdu. Ermənilərin mədəni irsin kimliyinin itirilməsi məqsədilə azərbaycanlılara məxsus tarixi sərvətləri məhv etməsi və ya erməniləşdirməsi Qərbi Azərbaycanda hələ XX əsrin əvvələrindən başlayıb və Qarabağın, eləcə də ətraf rayonların işğalı dövründə vəhşicəsinə davam etdirilib.
Millətçi və təcavüzkar Ermənistanın xalqımızın mədəni irsini məhv etməsi və ətraf mühitə sağalmaz yaralar vurması Cenevrə konvensiyalarının 1977-ci il I Əlavə protokolu ilə qadağan edilən “yandırılmış torpaq” müharibə taktikasından istifadə etməsi, ilk növbədə, onu göstərir ki, zəbt edilən həmin ərazilər heç vaxt onlara məxsus olmayıb. Qərbi Azərbaycanda, Qarabağ və ətraf rayonların işğal altında olan ərazilərində xalqımıza məxsus qədim mədəni irsin vəhşi bir ardıcılıqla illər boyu məhv etməsi kimi bəşəriyyət əleyhinə cinayətlər bugünədək cəzasını almayıb.
Qarabağ bölgəsi və ətraf rayonların işğalı nəticəsində Azərbaycanın 23 muzeyinin 86 min 307 eksponatı, 4 şəkil qalereyasının 371 rəsm əsəri, 927 kitabxananın 4,6 milyon nüsxə kitabı, 13 arxivin 260 min sənədi, 5 min 300 memarlıq və arxeologiya abidəsi, 50 min tarixi əhəmiyyətli şəxsi kolleksiya sərvəti Ermənistan tərəfindən talanıb və ya məhv edilib. Onlarca kurqanın, qədim insan məskənlərinin, qəbristanlıqların, inanc yerlərinin, müsəlman dini abidələrinin və digər arxeoloji abidələrin tamamilə məhv edilməsi Azərbaycan tarixinə və mədəniyyətinə ciddi zərbə vurub. İlkin hesablamalara görə, bu zərərin ümumi məbləği 177 milyard ABŞ dolları təşkil edir.
Azərbaycan Respublikasının Baş Prokurorluğu tərəfindən açılmış cinayət işinin materiallarında qeyd olunur ki, “Xocalı, Ağdam, Füzuli ərazisindəki kurqanlar və digər tarixi mədəniyyət abidələri, eləcə də arxeoloji qazıntılar zamanı aşkarlanmış ümumdünya əhəmiyyətli 100 mindən artıq qiymətli və nadir eksponat məhv edilib və talanıb. Beynəlxalq təşkilatlar arasında ilkin olaraq Ermənistanın Azərbaycana qarşı təcavüzünü tanıyan İslam Əməkdaşlıq Təşkilatı işğal olunmuş torpaqlarımızda dini və mədəniyyət abidələrinin məhv edilməsi haqqında bir neçə qətnamə qəbul edib.
BMT-nin “Mədəniyyət sərvətlərinin qanunsuz olaraq gətirilməsinin, çıxarılmasının və onların üzərində mülkiyyət hüququnun başqasına verilməsinin qadağan edilməsinə və qarşısının alınmasına yönəldilmiş tədbirlər haqqında” 14 noyabr 1970-ci il tarixli Konvensiyasına əsasən, hər bir dövlətin arxeologiya, qədim dövr, tarix, ədəbiyyat, incəsənət və elm üçün əhəmiyyətli hesab etdiyi dini və ya dünyəvi dəyərli irs mədəni sərvətləri sayılır (maddə 1). Bundan əlavə, bu konvensiyada qeyd edilir ki, hər bir xalqın mədəni irsi üçün böyük əhəmiyyət kəsb edən memarlıq ansamblları (dini abidələr), incəsənət əsərləri, bədii, tarixi və ya arxeoloji əhəmiyyətli əlyazmalar, kitablar və digər əşyalar, həmçinin elmi kolleksiyalar, kitab və arxiv materialları, onların saxlandığı və ya sərgiləndiyi muzeylər, kitabxanalar və s. binalar mədəni sərvətlər sayılır.
Bundan başqa, mədəni sərvətlərin beynəlxalq-hüquqi müdafiəsi ilə bağlı “Silahlı münaqişələr zamanı mədəni sərvətlərin qorunmasına dair” 1954-cü il tarixli Konvensiya, UNESCO-nun “Dünya mədəni və təbii irsinin qorunmasına dair” 1972 il tarixli Konvensiya, “Arxeoloji irsin qorunmasına dair” 1992-ci il tarixli Avropa Konvensiyası, UNESCO-nun “Mədəni mülkiyyətin qanunsuz olaraq ölkəyə gətirilməsi, ölkədən çıxarılması və mülkiyyət hüququnun qanunsuz şəkildə başqasına verilməsinin qadağan olunması və qarşısının alınmasına yönəlmiş tədbirlər haqqında” 1970-ci il tarixli Konvensiya və s. beynəlxalq aktlarla tənzimlənir.
Azərbaycan tarixinin istər keçmiş, istərsə də son 30 illik reallığı sübut edir ki, mədəni irsin məhv edilməsi yalnız silahlı münaqişə zamanı yox, sülh zamanı da məqsədli şəkildə törədildiyi üçün bu əməl beynəlxalq cinayətlərin müstəqil bir növü olaraq “mədəni irsi məhv etmə” kimi kriminallaşdırılmalıdır. Hər halda, bizim Ermənistan tərəfindən məqsədli şəkildə geniş miqyasda mədəni sərvətlərimizin məhv edilməsi, talanması və saxtakarlıqla “özününküləşdirilməsi” danılmazdır və real faktlarla sübut olunur.
Bizim təklif etdiyimiz “mədəni irsi məhvetmə” anlayışı “mədəni soyqırımı” terminindən daha dəqiq və genişdir. Bu ifadə nəinki Qarabağ və ətraf rayonların işğal olunan ərazilərində məhv edilən, talanan və erməniləşdirilən mədəni sərvətləri, eləcə də Qərbi Azərbaycanda – tarixi türk torpaqlarında yaradılan indiki Ermənistanda məhv edilən mədəni sərvətləri də əhatə edir. Bu xüsusda nəzərə almaq lazımdır ki, Ermənistan və onların havadarları yüz ildən artıq “erməni soyqırımı” təşviqatına son vaxtlar fəal şəkildə “kultorisid” yalanını da əlavə edərək bütün dünyaya əsassız haray salırlar.
II Qarabağ müharibəsində Azərbaycanın parlaq qələbəsini həzm edə bilməyən Avropa Parlament Assambleyası 10 mart 2022-ci il tarixdə qərəzli, həqiqətin tam əksini ifadə edən “qətnamə” qəbul edib. Bu qərəzli sənəd ikili standartların parlaq nümünəsi olaraq Ermənistan tərəfindən Qərbi Azərbaycanda, Qarabağda və ətraf rayonlarda “yandırılmış torpaq” taktikasından istifadə edərək yerli əhali olan azərbaycanlıların yaşayış məntəqələrinin, tarixi abidələrinin və islam dini məbədlərinin, qəbiristanlıqların və s. maddi-mədəni, təbii sərvətlərin məhv edilməsini görməzliyə vurub. Onlar anti-Azərbaycan və antimüsəlman isteriyası ilə 44 günlük II Qarabağ müharibəsində, guya, “məhv edilən erməni mədəni irs”inə yalandan göz yaşı tökürlər.
30 illik işğal dövründə zəngin və qədim tarixi olan Azərbaycan xalqının mədəni irsinin məhv edilməsi təkzibedilməz faktlarla dönə-dönə sübuta yetirilib. Beynəlxalq təşkilatların və xarici ölkələrin nümayəndələri işğaldan azad olunan ərazilərdə bu bəşəri cinayətləri şəxsən seyr ediblər. Bütün bunlar IV Cenevrə Konvensiyasının, “Silahlı münaqişə zamanı mədəni mülkiyyətin qorunması haqqında” 1954-cü il tarixli Haaqa Konvensiyasının, Avropa Şurasının “Arxeoloji irsin mühafizəsi haqqında” 1992-ci il tarixli Konvensiyasının, UNESCO-nun “Ümumdünya mədəni və təbii irsinin mühafizəsi haqqında” 1972-ci il tarixli Konvensiyasının müddəalarının pozulması kimi qiymətləndirilməli və bu cinayətlərin təşkilatçıları və icraçıları beynəlxalq hüquqi və mülki məsuliyyətə cəlb edilməlidirlər.
Ermənistanın işğalçılıq siyasəti, insan həyatına qarşı qəddarlığı, vandalizmi Qərbi Azərbaycanın mili-mədəni sərvətlərinin, tarixi abidələrinin tamamilə məhv edilməsinə və ya özününküləşdirilməsinə səbəb olub. Qərbi Azərbaycan bizim tarixi torpağımızdır. Bunu çoxsaylı tarixi sənədlər, xəritələr, bu icmanın yaddaşı və mövcudluğu qəti təsdiqləyir..
Bütün bunlar bir daha göstərir ki, Qərbi azərbaycanlıların hüquqları Cənubi qafqazda yaranmış reallıqlar müstəvisində bərpa olunmalı və onlar öz doğma torpaqlarına qayıtmalıdırlar. Prezident İlham Əliyev bu məsələni qarşıya ümummilli vəzifə olaraq qoyub. Dövlətimizin başçısı soydaşlarımızın ata-baba yurdlarına qayıtmasını dinc, sülh yolu ilə həllinə çalışır.
Şəhla SƏMƏDOVA,
BDU-nun kafedra müdiri, professor, Qərbi Azərbaycan İcması hüquq şöbəsinin üzvü