Dünən Milli Məclisdə Regional məsələlər komitəsinin təşkilatçılığı ilə “Qərbi Azərbaycan toponimləri: tarixin təhrif olunmasından ədalətin bərpa edilməsinədək” mövzusunda ictimai dinləmə keçirilib.
Tədbirdə Milli Məclisin deputatları, Prezident Administrasiyasının, AMEA-nın, Ədliyyə Nazirliyinin məsul işçiləri, Milli Məclis yanında Toponimiya Komissiyasının, Qərbi Azərbaycan İcmasının üzvləri, hüquqşünaslar və tədqiqatçılar, bələdiyyələrin, vətəndaş cəmiyyətinin təmsilçiləri və ekspertlər iştirak ediblər.
Müzakirəni giriş sözü ilə açan Regional məsələlər komitəsinin sədri Siyavuş Novruzov Vətən müharibəsində əldə edilmiş Qələbənin Qərbi Azərbaycandan olan soydaşlarımızın öz tarixi torpaqlarına qayıdışı üçün yaratdığı imkanlardan danışaraq qeyd edib ki, Ümummilli lider Heydər Əliyevin və Prezident İlham Əliyevin Ermənistan hökumətinin Qərbi Azərbaycan torpaqlarında milli irsimizə qarşı törətdiyi cinayətlərlə bağlı kəskin mövqe bizim üçün yol xəritəsidir.
AMEA-nın prezidenti, Milli Məclis yanında Toponimiya Komissiyasının sədri, deputat İsa Həbibbəyli “Qərbi Azərbaycan toponimlərinin Ermənistan tərəfindən saxta yollarla təhrif edilməsi və ədalətin bərpası yolları” mövzusunda məruzə ilə çıxış edib. Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərov “Qərbi Azərbaycana Qayıdış Konsepsiyası və müasir mərhələdə zorakılıqla dəyişdirilmiş toponimlərin bərpa edilməsi çalışmaları” mövzusunda məruzəsində doğma yurda qayıdış tələbinin insan hüquq və azadlıqlarına, beynəlxalq hüquqa tam uyğun olduğunu bildirib.
Çıxış edənlər Qərbi Azərbaycanda mədəni irsimizin planlı şəkildə məhv edilməsindən və mənimsənilməsindən söz açıblar. Onlar tarixi torpaqlarımızdakı toponimlərin və digər coğrafi adların, milli irsimizin bərpası, xalqımızın öz yurduna qayıdışının təmin edilməsi barədə qeyd və təkliflərini irəli sürüblər.
Əliqismət BƏDƏLOV
XQ