Azərbaycan ermənilərin mina “əkinləri”ni ölüm “toxum”larından təmizləyir

Torpaqlarımızı işğalda saxladı­ğı müddətdə, eləcə də 44 günlük Vətən müharibəsindən sonra Er­mənistan, onun Xankəndidəki se­paratçı-xunta rejimi, demək olar ki, Qarabağın hər qarışına mina döşəyib. Bəli, doğma yurdumuzu işğaldan azad etdikdən sonra biz Ermənistanın mina terroru ilə üz­ləşmişik. Az qala, hər ay, hər həftə hansısa vətəndaşımız mina ter­rorunun qurbanı olur. Bu barədə Azərbaycan Respublikası Minatə­mizləmə Agentliyinin (ANAMA) məlumatlarını ürək ağrısı ilə oxu­yur və dinləyirik. 

İşğaldan azad edilmiş əraziləri­mizdə Ermənistanın basdırdığı mina sahələrinin miqyası və kütləviliyi bir­başa mina terrorunun təzahürüdür. Məhz mina terroru, mina müharibəsi! Əslində, separatçılar, erməni vandalla­rı buna üç il əvvəl deyil, on il əvvəldən hazırlıq görüblər. Bir gün torpağımız­dan rədd olub gedəcəklərinə əmin ol­duqları üçün. 

* * * 

“Azərbaycanın Qarabağ bölgəsin­də əraziyə baxış zamanı içərisində xeyli sayda müxtəlif təyinatlı mina və kustar üsullarla hazırlanmış əldəqayır­ma partlayıcı qurğularla dolu anbarlar Azərbaycan Ordusunun mühəndis-is­tehkam bölmələri tərəfindən aşkar edi­lib”. Bu, Müdafiə Nazirliyinin üç gün əv­vəl yaydığı məlumatdır. Aşkar edilmiş anbarlarda mövcud minaların bir qis­minin 2021-ci ildə Ermənistanda isteh­sal olunduğu, əldəqayırma partlayıcı qurğuların isə artilleriya mərmilərindən kustar üsullarla hazırlandığı müəyyən edilib.

Hamıya məlumdur ki, lokal xarakter­li antiterror tədbirlərindən öncə Ermə­nistandan Qarabağ bölgəsinə dəfələrlə qanunsuz hərbi daşımaların həyata ke­çirilməsi barədə Müdafiə Nazirliyi tərə­findən rəsmi məlumatlar verilib. Həmin məlumatlarda erməni quldurlarının Er­mənistandan Azərbaycanın Qarabağ iqtisadi rayonuna silah-sursat, eləcə də mina daşıyan hərbi yük maşınların böl­gədə müvəqqəti yerləşdirilmiş Rusiya sülhməramlı kontingent tərəfindən mü­şayiət olunduğu da danılmaz faktdır. Azərbaycan Müdafiə Nazirliyi həmin “səyyar əməliyyatların” foto və video görüntülərini dəfələrlə nümayiş etdirib. 

Rəsmi Bakının dəfələrlə çağırışlar etməsinə baxmayaraq, İrəvan hələ də Azərbaycana mina xəritələrini vermə­yib. Mülki vətəndaşlarımız həmin mi­naların ya qurbanı olur, ya da xəsarət alır, şikəst qalırlar. Buna dünya da su­sur, beynəlxalq təşkilatlar da. Fransa isə mina terrorçusunu dəstəkləməkdən əl çəkmir. 

“Ermənistan işğal etdiyi Azərbay­can ərazilərində basdırdığı minalar nəticəsində təkcə son 3 ildə 340 azər­baycanlı mina qurbanı olub. Onların arasında mülki şəxslər də var. Bu iki ölkəni bir-birinə belə sıx bağlayan sə­bəblərdən biri də hər iksinin mina terro­ru ilə məşğul olmaq təcrübəsidir”.

Bu sözlər Azərbaycan Prezidenti İl­ham Əliyevin dünən Bakıda “Neokolo­nializm: İnsan hüquqlarının pozulması və ədalətsizlik” mövzusunda keçirilən beynəlxalq konfransın iştirakçılarına ünvanladığı müraciətində əksini tapıb.

Həmin müraciətdə cənab Prezident bunları da qeyd edib: “Parisin İnsan Muzeyində müstəmləkə müharibələ­rində XIX əsrdə qətlə yetirilən döyüş­çülərin 18 min ədəd kəllə sümüyü sax­lanılır və nümayiş etdirilir. Həmin kəllə sümükləri arasında əlcəzairli döyüş­çülərin də kəllə sümükləri var. Əlcəza­irin həmin sümükləri geriyə qaytarmaq tələbi Fransa tərəfindən hələ də tam yerinə yetirilmir. XXI əsrdə dünyanın çox az dövlətində bu cür təfəkkürə rast gəlmək mümkündür”.

Fransanın həm də dünyada ən çox minadan istifadə edən ölkələrdən biri olduğunu konfrans iştirakçılarının nəzərinə çatdıran Prezident İlham Əli­yev bu ölkənin ancaq Əlcəzair ərazi­sində 5 milyondan artıq mina basdırdı­ğını söyləyib.

“Nəticədə Azərbaycan kimi Əlcəzair də dünyada mina partlayışından ən çox əziyyət çəkən ölkələr sırasında ön yer­lərdən birini tutur”,– deyən dövlətimizin başçısı mina terorçularının siyahısında Fransadan sonra onun yaxın müttəfiqi Ermənistanın gəldiyini qeyd edib. 

* * *

Təqdirəlayiq haldır ki, mina terroru­na məruz qalmış Azərbaycanın səsinə Avropada səs verənlər tapılır. Britaniya parlamentinin üzvü, Partlayıcı Qurğu­lardan Qaynaqlanan Təhdidlər üzrə parlament qrupunun sədri Metyu Of­ford London hökumətini Azərbaycanın minatəmizləmə ilə bağlı təşəbbüsünə dəstək verməyə çağırıb. Parlamentdə “Dayanıqlı İnkişaf məqsədlərinə dair müzakirələr”də çıxış edən deputat ötən ilin mayında Azərbaycanda hə­yata keçirilən minatəmizləmə fəaliy­yəti ilə yerində tanış olduğunu bildirib. Cənab M.Offord ərazilərin minalardan təmizlənməsi nəticəsində insanların öz evlərinə qayıda bilməsi üçün imkanın yaradılmasının vacibliyini qeyd edib. Deputat ərazilərin minadan təmizlən­məsinin təkcə mövcud Dayanıqlı İnki­şaf Məqsədlərinə nail olunması deyil, təhsil və məşğulluq kimi sahələrdə də müsbət nəticələrin əldə edilməsinə göstərdiyi təsiri vurğulayıb. Deputat Britaniya hökumətini Azərbaycanın hu­manitar minatəmizləmənin BMT tərə­findən 18-ci Dayanıqlı İnkişaf Məqsədi elan edilməsi ilə bağlı təşəbbüsünə dəstək verməyə çağırıb. Düşünürük ki, Birləşmiş Krallığın hökuməti parla­ment üzvünün çağırışına biganə qal­mayacaq və Azərbaycanın təşəbbüsü­nü dəstəkləyəcək. 

* * *

Torpaqlarımızı işğalçılardan azad etsək də, Qarabağın hər tərəfinə mi­naların basdırılması keçmiş məcburi köçkünlərin təhlükəsiz şəkildə doğma yurdlarına qayıtması üçün ciddi əngəl olaraq qalmaqdadır. ANAMA ilə yana­şı, bir çox qurumlar, eləcə də qeyri-hö­kumət təşkilatları baş verə biləcək xo­şagəlməz halların aradan qaldırılması - minaların aşkar edilərək zərərsizləş­dirilməsi üçün gecə-gündüz çalışırlar. Amma, təəssüf ki, həyata keçirilən irimiqyaslı tədbirlərə baxmayaraq, Er­mənistan tərəfinin basdırdığı minaların partlaması nəticəsində zərərçəkənlər barədə məlumatlar eşidirik.

Britaniya kimi digər ölkələr, bey­nəlxalq təşkilatlar, insan hüquqları mü­dafiəçiləri də Azərbaycana qarşı mina terroruna biganə qalmamalı, mina xə­ritələrini verməsini İrəvandan tələb et­məlidirlər. 

İmran BƏDİRXANLI
XQ