Meyitlərlə alver edən İrəvanın Bakıya qarşı körüklədiyi “səlib yürüşü” də faydasız olacaq 

Baş verənlər təbii qəbul olunmalıdır. Hərbi gücdən və bölgədəki vəziyyətə təsir imkanından məhrum olan İrəvanın siyasi təxribatlara əl atması çoxdan bizi təəccübləndirmir. Onun özünü saldığı burulğandan qurtulması üçün saman çöpündən yapışması da normal qəbul olunmalıdır. Amma bu zaman beynəlxalq hüquq və diplomatik etiketlə bir araya sığmayan üsul və gedişlərdən yararlanmaqla Azərbaycana qarşı başlatdığı “beynəlxalq yürüşün” heç bir nəticə verməyəcəyini də unutmasın.

Ölkəmizə qarşı belə “feyk” gediş­lərdən birini də Ermənistanın ombuds­manı Anait Manasyan quraşdırmağa çalışır. Paşinyanın təbliğat maşınının dünya ictimaiyyətinə Azərbaycanın Qa­rabağ ermənilərini “etnik təmizləməyə” və “soyqırımı”na məruz qoymasını sı­rımaq üçün təsdiqləyici sübutlar üzə çıxıbmış. Hayastanın baş nazirinin bu günlərdə Strasburqda Avroparlamentin iclasında “fitilini yandırdığı” dezinforma­siyanı ombudsman gerçəklik donuna bürüməyə cəhd edir: “Azərbaycanın 19-20 sentyabr hərbi təcavüzündən sonra aşkar edilən və Ermənistana gətirilən onlarca Qarabağ sakininin cəsədində işgəncə əlamətləri və bədən xəsarətləri var”. Bunu jurnalistlərə bəyan edən Ma­nasyan bu yolla Azərbaycanın Qarabağ ermənilərini “etnik təmizləməyə” məruz qoymasını “sübut etməyə” çalışır. Belə məqamda deyirlər, adımı sənə qoyum, səni də yana-yana. Axı həmin antiter­ror tədbirlərindən bir gün sonra Ermə­nistan baş naziri “Qarabağın erməni sakinlərinə qarşı təhdid və təhlükəni görmədiyini” özü bəyan etmişdi. Amma üstündən bir ay keçməmiş Ermənis­tanın “ictimai-siyasi xadimləri” sanki yuxudan ayılıb Bakıya qarşı yalan və saxtakarlıqla dolu növbəti dezinforma­siyanı üfürməyə başladılar. Elə həmin məqamda kimlər tərəfindən öldürüldü­yü hələ bilinməyən Qarabağ ermənilə­rinin “işgəncə izləri tapılmış cəsədlə­ri” ortaya çıxdı. Heç şübhə yoxdur ki, İrəvanın bu uydurma və ittihamları ən çirkin üsulla Bakının beynəlxalq imicinə zərbə vurmaq, dünya birliyinin gözün­də Azərbaycanı ləkələmək məqsədini daşıyır. Bu çirkin kampaniyada erməni KİV-i fəal iştirak edir. Ombudsmanın havadan qapdığı, konkret adama və fakta söykənməyən açıqlaması ictimai rəylə manipulyasiyadan başqa bir şey deyil.

Bəs o cəsədlər kimindir?

Müvəkkil Anait Manasyanın açıq­lamasında cəsədlərin konkret kimlərə məxsus olduğu, hansı şəraitdə və ha­rada tapıldığı barədə heç nə deməməsi diqqəti cəlb edən məqamdır. Yəni bu­rada söhbətin heç kim və heç nə barə­də getdiyi üzə çıxır. Həlak olan qadın və uşaqlarla bağlı deyilənlərin də nəyə söykəndiyi qətiyyən aydın deyil. Bəli, İrəvanın yeni “feyk” partiyası göz önün­dədir. Axı, ən düzgün variantda bura­da söhbət Azərbaycanın Qarabağdakı silahlı quldurları suveren ərazimizdən təmizləmək üçün həyata keçirdiyi 23 saatlıq antiterror tədbirləri zamanı öl­dürülən erməni əsgərlərin meyitlərin­dən gedə bilər. Ombudsman təkidlə o tarixi göstərsə də, yalnız mülki şəxslə­rin ölümündənn danışır. Bəlkə həmin cəsədlər sentyabrın 25-də Xankəndidə yanacaqdoldurma stansiyasında baş vermiş dəhşətli patrtlayış və yanğında ölənlərə məxsusdur? Bu, Qarabağın çoxsaylı dinc erməni sakininin həlak olduğu yeganə faciəvi hadisədir. İrə­van, çox güman ki, həmin dəhşətli ha­disə nəticəsində ölənlərin meyitlərini “etnik təmizləmə qurbanlarının” cəsəd­ləri kimi təqdim etməklə, Bakıya qarşı yeni və “səs-küylü” təxribatın baş tuta­cağına ümid edir. Deməli, Ermənistan hakimiyyəti meyitlər üzərində “siyasi alveri” özünə sığışdıracaq qədər aşağı yuvarlanıb. 

Yaxın günlərdə zəruri qrimdən, fo­toşopdan istifadə etməklə “tələb olu­nan” vəziyyətə gətiriləcək cəsədlərin fotoşəkilləri yerli və xarici KİV-də ya­yımlansa qətiyyən təəccüblənməyəcə­yik. Əsas məsələ beynəlxalq miqyasda ajiotaj yaratmaqdır. Amma bu “qurama səhnənin” bir “əmması” da var. Əgər bu “siyasi tamaşada” partlayışda ölən­lərin meyitlərindən istifadə ediləcəksə, onda hayların “ideoloji işbazları” ciddi səhvə yol veriblər – yanacaqdoldur­ma məntəqəsində partlayışın baş ver­diyi gün Azərbaycan hərbçiləri hələ Xankəndidə yox idi! 

Bir versiya da var. Əgər sabah-bi­risigün üzə çıxsa ki, cəsədlərini “etnik təmizləmənin əşyayi-dəlili” kimi dünya­ya nümayiş etdirəcəkləri həmin Qara­bağ ermənilərini özləri işgəncə verərək qətlə yetiriblər, yenə təəccüblənməyə dəyməz. Çünki hayların, yeri gələndə, “milli maraqları naminə” soydaşlarını da qurban vermələrinin “tarixi ənənə­si” mövcuddur. 1918-ci ilin martında daşnaklar Bakıda Azərbaycan türklə­rinə qarşı etnik təmizləməni, soyqırımı məhz özlərinin qətlə yetirdiyi bir ermə­ninin cəsədini müsəlman məhəlləsinə atmaqla başlamışdılar. 

Mövsümi tərəfdaşların hay “canfəşanlığı”

Cənubi Qafqazda, Azərbaycan və Ermənistan arasında yaranmış son və­ziyyətə, sentyabrın 20-də həyata keçi­rilən antiterror tədbirlərinin mahiyyətinə və nəticəsinə ədalətlə yanaşmayan Qərbin haypərəst dairələri Azərbayca­nı “etnik təmizləmə”də ittiham etməyə girişiblər. Bizi dünya ictimaiyyətinə “işğalçı”, “anti-humanist” ölkə kimi təq­dim etmək cəhdləri özünü açıq şəkildə büruzə verir. Bir mərkəzdən təşkil və idarə olunduğu şübhə doğurmayan bu “siyasi şou” Avropa Parlamenti, Avro­pa İttifaqı, Fransa, Niderland, Kanada, Almaniya və digər ölkələrin sərgilədi­yi mövqelərdə aydın görünür. İndi bu “siyasi şou”ya Çexiya parlamenti qo­şulub. Bu ölkənin qanunverici orqanı Bakını “Qarabağda yerli əhali ilə davra­nışı müşahidə etmək üçün beynəlxalq müşahidəçilərin bölgəyə girişinə im­kan verməyə, tarixi və dini abidələri qorumağa” çağırır. Mesaj aydındır. İrəvanın və onun xaricdəkı havadar­larının düzənlədiyi “Qarabağda etnik təmizləmə” şousuna BMT-dən qəti və birmənalı cavab verilib: bölgəni tərk edən etnik ermənilərə qarşı təzyiq və zorakılıq faktı mövcud deyil. Yəni, BMT Azərbaycanın Qarabağ bölgəsini öz istəkləri ilə tərk edib Ermənistana köçənlərin pis rəftara məruz qalmadı­ğını açıqlayıb. Həm də bu açıqlamanı BMT-nin Qaçqınlar üzrə Ali Komissar­lığının İrəvandakı nümayəndəsi Kavita Belani oktyabrın 2-də qurumun Cenev­rə ofisinin həftəlik mətbuat konfransın­da çıxışı zamanı verib: “Bizə məlumdur ki, indiyədək ermənilərə qarşı bir pis rəftar halı, hər hansı insident qeydə alınmayıb. Düzdür, bu, uzun yoldur, həmin vaxt tıxac insanları çətin vəziy­yətə salır. Amma azərbaycanlılar tərə­findən pis rəftar faktı qeydə alınmayıb”.

Azərbaycan hakimiyyəti nəinki Qa­rabağ ermənilərini köçməyə vadar etdi, əksinə, onların reinteqrasiyasını istədi­yini bildirdi. Sakinlərə ərzaq paylandı, tibbi yardım göstərildi. Dövlətimizin bu tolerant və humanist mövqeyini hət­ta bizi istəməyən qüvvələr də rəsmən etiraf etdilər. Fəqət ABŞ və Avropa İttifaqının BMT missiyası və ya bey­nəlxalq müşahidıçilərin Qarabağa yer­ləşdirilməsi ilə bağlı təklifinə rəsmi Ba­kının dolayısı ilə yox deməsi, əlbəttə, Qərbi məyus edib. Bu səbəbdən “etnik təmizləmə” ittihamları, “Qarabağ er­mənilərinin təhlükəsiz qayıdışına təmi­nat” tələbi kimi “ssenarilər” dövriyyəyə buraxılıb. Amma Azərbaycana ədalət prinsipindən və beynəlxalq hüquqdan kənar münasibət sərgilədikcə Qərbin bölgədəki mövqeyinin zəifləyəcəyi şəksizdir. Ermənipərəst və fürsətgir xarici aktorları narahat edən Prezi­dent İlham Əliyevin xalqa müraciətində yerli problemləri region dövlətlərinin öz aralarında həll etmək təklifi oldu. Rəsmi Bakının “3+3” formatlı regional əməkdaşlığın tərəfdarı olması, Rusiya, Türkiyə və İranın da buna müsbət ya­naşması Cənubi Qafqazın siyasi coğ­rafiyasını dəyişir. Bu yeni reallıq böl­gədən öz paylarını umanların kürkünə birə salıb. 

İnformasiya məkanı çirkləndirilir

Ətraf mühiti zərərli istehsal sahələ­rinin tullantıları çirkləndirdiyi kimi, hay­ların ideoloji təxribat və siyasi şantaj “kombaynı” da hazırda Qərbin və dün­yanın informasiya məkanını mümkün qədər çox zibilləməklə məşğuldur. 

Ümumiyyətlə, ortada aşkar gö­rünən fakt ondan ibarətdir ki, Paşinyan və onun komandası “Qarabağ uğrun­da” mübarizənin yeni mərhələsinə keçməyə qərar verib. Hər şeydən gö­ründüyü kimi, bu utopik məsdəqlərinə çatmaqdan ötrü onların əlləri çatan bütün vasitələrdən – saxtakarlıqdan, yalan və böhtandan gen-bol yararla­nacağı şübhəsizdir. Bu məqsədə çat­mağın yolunda Azərbaycana qarşı pərdələnmiş “səlib yürüşünü” təşkil etməkdən belə çəkinməyən İrəvan və onun himayədarları beynəlxalq səh­nəyə çıxara biləcəkləri bütün “arsenalı” işə salıblar. Bu “siyasi hücümün” təşki­lində hayların “harayına züy tutan” av­ropalı siyasətbazlarla yanaşı, müxtəlif beynəlxalq təkilatlarda və ölkələrdəki lobbilər də yaxından iştirak edirlər. Kol­lektiv təşkilatçılığa informasiya dəstəyi verən ermənipərəst media resursları isə dünyanın xəbər məkanını müxtəlif “tullantılarla zibilləməklə” məşğuldur­lar. Bu zaman “feyk” yaratmağın ən müasir, modern üsullarından yararlan­mağı da unutmurlar. 

Bakıdan Parisə “çələng” hədiyyəsi 

Bu günlərdə dünyanın dörd tərə­findən Bakıya toplaşmış keçmiş müstəmləkə sakinləri maraqlı çıxışlar etdilər. Müxtəlif dövrlərdə Fransanın müstəmləkəçiliyindən əziyyət çəkmiş Əlcəzair, Korsika, Mali, Keniya, Mə­rakeş, Qvadelupa, Yeni Koledoniya, Polineziya, Fransa Qvineyası və digər ölkələrin rəsmi təmsilçiləri milli tarixlə­rində ədalətsizlik və haqsızlıq ucbatın­dan çəkdikləri əzab və məşəqqətləri dilə gətirdilər. Onların hamısı bir ağız­dan Parisin xüsusilə Afrika qitəsində yürütdüyü neokolonalizm siyasətinin bu gün tamamilə iflasa uğradığını, bir daha müstəmləkə istibdadının qitədə meydan sulamasına yol verilməyəcə­yini dedi. 

İlk baxışda Bakıda keçirilən neo­kolonalizmə dair beynəlxalq konfrans mövzumuza aid görünməyə bilər. Amma bu tədbirin indi haylara quca­ğını açıb, Azərbaycana qarşı hər cür təxribatlara rəvac verən Parisdə necə qarşılanacağı bizi çox maraqlandırır. Ehtimal edə bilərik ki, Bakı konfransına təşrif buyurmuş qonaqların siyahısı ilə tanış olandan sonra Yelisey sarayında­kı rəsmilərdən kimsə huşunu itirə bilər. Yoxsa Emmanuel Makron haylara xid­mətinə görə Bakıdan “minnətdarlıq çələngi” gözləyirdi? 

İ.HƏSƏNQALA
XQ