İndi Xankəndidə həyat Günəşə, sülhə və əməkdaşlığa açıqdır
Tarixin şahidlik etdiyi müharibələrin bir–birinə bənzəyən səhnələri, mənzərələri az deyil. Qalib tərəfin qürur və sevinci, məğlubun peşmançılığı ilə yanaşı, əli dinc insanların qanına bulaşmış müharibə cinayətkarlarının ittiham olunması, təslim və sülh müqavilələrinin imzalanması kimi hadisələr yetərincə olub. Amma bunların arasında ən yaddaqalanı Azərbaycanın Dövlət Bayrağını işğaldan azad etdiyi məkanda ucaltması məqamıdır. Bu, həm də Qələbənin rəmzi kimi qəbul olunan hadisədir. Adətən, bu tarixi missiyanı döyüşən əsgər və zabitlər yerinə yetirirlər.
Separatçılığın ruporu eyni ölkədir
Oktyabrın 15-də Azərbaycan xalqı Xankəndidə möhtəşəm mərasimi böyük fəxarət və sevinc hissi ilə seyr etdi. Amma bu dəfə üçrəngli bayrağımızı ucaltmaq kimi müqəddəs missiyanı Azərbaycan Prezidenti, Ali Baş Komandan İlham Əliyev yerinə yetirdi. Əslində, bu, sadəcə Qarabağdan süpürülüb atılmış separatçı-daşnak ünsürlərinə deyil, daha çox xaricdə Azərbaycanı bəyənməyənlərə, ermənipərəst müsyölərə, sem dayılara ünvanlanmış diplomatik jest idi.
“Əfsuslar olsun ki, bu məsələ ilə məşğul olmuş vasitəçilər faktiki olaraq münaqişəni dondurmaq istəyirdilər, münaqişəni əbədi etmək istəyirdilər. İstəyirdilər ki, bu yara heç vaxt sağalmasın”. Bu sözləri Azərbaycan Prezidenti İlham Əliyev Xankəndidə bayraqqaldırma mərasimindən sonrakı çıxışında söylədi. Prezident çıxışında həmçinin, Qarabağda separatçılığın nə zaman və hansı şəraitdə baş qaldırdığına da aydınlıq gətirib: “1987-ci ildə Heydər Əliyev öz vəzifəsindən kənarlaşdırıldı... Üstündən iki həftə keçməmiş erməni millətçiləri məsələ qaldırdılar ki, Dağlıq Qarabağ Muxtar Vilayəti Azərbaycandan Ermənistana verilsin. Məsələni qaldıran Kremldə oturan erməni millətçisi idi. Bəs bu məsələ barədə ilk dəfə harada yazıldı? Fransanın bir qəzetində. Yenə həmin Fransa. Yəni, bu gün o tarixə qayıdarkən və o hadisələri təhlil edərkən bir daha görürsən ki, heç bir şey təsadüfi olmayıb”.
Daha Qarabağda separatizmin yuva salmasına imkan verilməyəcək. Bunu daşnak-separatçı hay ünsürləri kimi, onlara hələ də dəstəyini davam etdirən bəzi ölkələr, dairələr və institutlar da unutmamalıdır. Dünya təcrübəsinə nəzər salsaq, görərik ki, daxilində separatizm meyilləri baş qaldırmış heç də bütün ölkələr bu zərərli təmayüllə mübarizədən qalib ayrılmayıblar. Onların arasında geri çəkiləni də olub, məğlub olanı da. Bu kontekstdən yanaşanda, Xankəndidə bayrağımızın ucaldılması Azərbaycan tarixinin ən yaddaqalan hadisələrindən biri olmaqla yanaşı, həm də Cənubi Qafqazda, həmçinin ondan kənarda geosiyasi reallıqları, qüvvələrin konfiqurasiyasını dəyişən məqamdır.
Beynəlxalq rezonans doğuran hadisə
Gürcüstan Strateji Planlaşdırma Mərkəzinin rəhbəri Levan Mamaladze hesab edir ki, baş verənlər region üçün tarixi bir hadisədir. “Report”a açıqlamasında gürcü ekspert deyib ki, 2003-cü ildə İlham Əliyev inauqurasiyası zamanı Azərbaycanın ərazi bütövlüyünü bərpa edəcəyini söyləmişdi: “Prezident İlham Əliyev bunu dedi və sözünü tutdu. Azərbaycan Bayrağı Azərbaycan ərazisi olan Xankəndidə qaldırıldı. Bu, bir daha sübut etdi ki, doğru və əzmkar çalışaraq bütün maneələri aşıb, ərazi bütövlüyünü bərpa edib, bütöv və güclü dövlət qurmaq mümkündür. Azərbaycan xalqı itkilərlə, qanla özünün suverenliyini, ərazi bütövlüyünü bərpa etdi. Bu, bizim üçün də bir nümunədir. Biz Azərbaycan nümunəsi üzərində düşmənlə necə mübarizə aparmaq lazım olduğunu öyrənməliyik. İnanıram ki, vaxt gələcək, biz də ərazi bütövlüyümüzü bərpa edəcəyik”.
Politoloq Simon Kapadze isə bildirib ki, Azərbaycan Prezidenti İlham Əliyev 20 illik hakimiyyəti dövründə çox uğurlara imzasını atıb: “Ən əsası isə o, Azərbaycanın ərazi bütövlüyünü bərpa edib. Arzu edirəm ki, Azərbaycanda baş verənlər tezliklə Gürcüstanda da olsun. Gürcüstan da öz ərazi bütövlüyünü bərpa etsin. Azərbaycan Bayrağı Xankəndidə dalğalandığı kimi, Gürcüstan bayrağı da Suxumidə dalğalansın”.
Tehrandan gözlənilən reaksiya
Dünyanın nüfuzlu media qurumları cənab Prezidentin Xankəndiyə səfərini və oradakı çıxışında verdiyi mesajlara geniş yer ayırıblar. İlham Əliyevin Qarabağa səfəri İranın müxtəlif media orqanlarında geniş işıqlandırılır. Səfərlə bağlı xəbərlər, zarisovkalar, fotolar və videolar paylaşılır. Amma bu xəbərlərin bəzilərində diqqəti çəkən məqamlar da var. Misal üçün, bir sıra xəbərlərdə Qarabağda yaşamış ermənilərin sayının 150 minə yaxın olduğunu iddia edən sayt və portalların yazdığına görə, “Azərbaycan Ordusunun keçən ay “sürətli hücumundan” sonra ermənilər Qarabağdan Ermənistana qaçmağa məcbur olublar. Ardınca oxuyuruq: “Xankəndidə Azərbaycan Bayrağının qaldırılmasının rəsmi mərasimi Bakının Qarabağ üzərində tam suverenliyinin bərqərar olması, bölgədə “müstəqil Artsax erməni dövlətinin” rəsmi sonu deməkdir”.
Yeri gəlmişkən, Ermənistan hakimiyyətinə yaxın media portalları Qarabağdan köçən ermənilərin sayını şişirdərək 120 min göstərdiyi halda, Tehran rejiminin maliyyələşdirdiyi medianın 150 min rəqəmini hardan götürdüyü sual doğurur. Bölgədə 30 il ərzində cərəyan edən hadisələrin xronoloji mənzərəsinə baxanda nəyi görürük? Bu gün Azərbaycana qarşı dezinformasiya cəbhəsi açan, onu siyasi şantajla hədələyən, açıq düşmənçilik edən ölkələr 1992-1993-cü illərdə Ermənistanın yanında duranlardı. Məhz bu xarici qüvvələr hayları işğala təhrik edirdi, bu yolda onları dəstəkləyirdi və yeri gələndə, beynəlxalq arenada İrəvana bəraət qazandırırdı. Bəli, təəssüflə qeyd etrməliyik ki, 30 il ərzində o cəbhədə heç nə dəyişməyib.
Doğru sözə nə deyəsən?
“Bəli, Ermənistan zəif, Azərbaycan isə güclüdür. Biz fərsiz liderlərin sayəsində məğlub olduq və bu vəziyyətə düşdük. İndi bu reallığı nəzərə almalıyıq. Aydındır ki, danışıqlar prosesində üstünlük daha çox güclüyə verilir”. Bu sözləri erməni hərbi ekspert, ehtiyatda olan polkovnik Ayk Nahapetyan deyib.
Nahapetyan daha sonra bölgədə yaranmış reallığa şərhini verir: “Paşinyanın ziddiyyətli fikir və bəyanatlarına baxmayaraq, ona kifayət qədər ciddi baxırıq. Odur ki, Paşinyanın açıqlamalarını əsas götürməməliyik. Etiraf edək ki, Cənubi Qafqazdakı 3 əsas oyunçu (Türkiyə-Rusiya-İran - red.) arasında regionda sabitliyin qorunub saxlanması məsələsində fikir birliyi əldə edilib. Bu üç regional gücün formalaşdırmağa çalışdığı “3+3” formatı, ilk növbədə, bölgədə sabitliyin və tərəqqinin təminatıdır.
Doğrudur, bu ölkələr arasında müəyyən ziddiyyətlər var, amma həmin ziddiyyətlər danışıqlar yolu ilə həll olunur. Yeri gəlmişkən, Azərbaycan və Gürcüstan da “3+3” formatının tərəfdarıdır, Ermənistan isə əleyhinədir. İndi təsəvvür edək ki, regional proseslərə ciddi təsir göstərən beş dövlət öz aralarında razılaşır, amma Ermənistan bunun əleyhinədir. Belə olan vəziyyətdə, sizcə, Ermənistan udacaq, yoxsa uduzacaq?
Əlbəttə ki, uduzacaq. Bu, aydındır. Horadiz–Mehri–Ordubad–Arazdəyən dəmir yolunun bərpası üçün yollar açılsa, Ermənistanın çox sərfəli mövqedə qalacağını düşünürəm. Ermənistan tranzit ölkəyə çevrilə bilər. Açılmalı və ya yeni tikilməli olan kommunikasiyalarda Ermənistan iştirak etməlidir”. Bu, sağlam düşüncəli erməninin fikirləridir.
Azərbaycan sülhə, əməkdaşlığa hazır olduğunu dəfələrlə bəyan edib. İndi söz və iş qalır İrəvanın boynunda. Çox gümün ki, Ermənistan iqtidarı doğru seçim edəcək.
İlham Əliyev erməni separatçıların özlərinə yuva qurduqları binadakı pəncərələri açdı və otağın havasını dəyişdi. O, bunu səbirlə və qətiyyətlə, bütöv Qarabağın iqlimini yad nəfəslərdən təmizləmək məqsədilə etdi. Həmin epizoda bütün dünya baxdı. Bu, o deməkdir ki, bundan sonra Xankəndidəki binaların pəncərələri daim Günəşə və sülhə açıq olacaq...
İmran BƏDİRXANLI
XQ