Qüdrətli lider iradəsi, cəsarəti və qətiyyəti ilə bütün çətinlikləri aşıb keçdi

“Heydər Əliyev İli”ndə İlham Əliyevdən söz açmaq maraqlıdır. Bunun xüsusi bir önəmi də var. Qələm bizi mövzuya məhz bu cığırdan girməyə sövq edir. Səbəb onun Heydər Əliyevin bütün ömrünü həsr elədiyi mübarizənin, milli mücadilənin davamçısı olmasıdır. Bu, iyirmi illik mücadilədən alnıaçıq, üzüağ çıxmış, adını çağdaş Azərbaycan tarixinə qızıl hərflərlə həkk etdirmiş qalib sərkərdə, Zəfər yolçusu haqqında deyilən sözdür. 

Əsrlərin deyil, minilliklərin qovşağı­nın və bir-birini əvəzləməsinin şahidi olmuş 70-80-ci illər nəslinin yaddaşın­da unudulması mümkün olmayan bir tarix yatır. Bu tarix “qırmızı imperiya­nın” çöküşü, bir ictimai-siyasi forma­siyadan digərinə keçid və bu qlobal dəyişikliklərin gətirdiyi təlatümlər, acı­lı-şirinli anlarla zəngindir. Bu yazıda həmin tarixin ən yaddaqalan, əzəmətli səhifəsinə və o səhifənin müəllifinin iyirmi illik fəaliyyətinə qısa nəzər sala­cağıq. 

XXI əsrin 2023-cü ili ildönümlər və fövqəladə günlərlə zəngindir: Ulu öndər Heydər Əliyevin 100 illiyi! Şərq­də ilk Cümhuriyyətin – Azərbaycan Demokratik Respublikasının yaranma­sından 105, Türkiyə Cümhuriyyətinin elan edilməsindən 100 il ötür. 2023 – “Heydər Əliyev İli” Azərbaycanın çağ­daş milli tarixinə nadir töhfələr verməsi ilə də yadda qalacaq. 

* * * 

Mübaliğəsiz deyə bilərik ki, İlham Heydər oğlu Əliyev XXI əsrdə Qafqaz­da yeni tarix yaradır, bölgənin geosi­yasi coğrafiyasını müəyyən edir, elə­cə də dövlətimizi və xalqımızı daha böyük zəfərlərə daşıyacaq layihələrə, strateji qərarlara imza atır. İlham Əliyevin zəfərləri yalnız hərbi sahə ilə məhdudlaşmır. Onun Azərbaycanın iqtisadiyyatında, elmində, təhsilində, səhiyyəsində, idmanında qazandığı zəfərlərini vətəndaşımız öz həyatında hiss edir. Bu mənada dövlət başçı­mızın hərtərəfli, gərgin və məhsuldar siyasi fəaliyyətində ilk baxışda nəzərə çarpmayan, amma diqqətlə izləyəndə bütün çılpaqlığı ilə görünən mükəm­məl nizam, qeyri-adi ardıcıllıq, daim artan dinamika var. Bu dinamikanın əsasında nələr dayanır? Regionda və dünyada söz sahibinə çevrilmiş bir dövlətin ali məqamından qaynaq­lanan məsuliyyət, özünə qarşı hədsiz tələbkarlıq, öz üzərində daim işləmək vərdişi, təcrübə, intellekt və əlbəttə ki, gendən, fitrətdən gələn keyfiyyət­lər. Bəs, İlham Əliyevin dövlətimiz və millətimiz üçün taleyüklü qərarların qəbul ediləcəyi anlarda, ən ekstremal şəraitdə belə müdrikcəsinə soyuqqanlı davranmasının sirri nədir? Bu sualın ən dəqiq cavabını Qarabağa çoxsaylı səfərlərinin birində cənab Prezidentin özü verib: “İradə, cəsarət, öz gücünə əminlik!”

Prezidentin hər çıxışının, hər bir sözünün arxasında dərin zəkanın da­yandığı bütün parametrləri ilə özünü büruzə verir. O, ən dramatik, ən həs­sas məsələləri elə təqdim və təhlil edir ki, siyasətin içində bişmiş peşəkar dip­lomatın belə onu mübahisələndirmək üçün şansı qalmır.

İlham Əliyev Azərbaycan tarixinə həm də ilklərin müəllifi kimi düşüb. Dövlətimizin başçısı hər il, hər ay, az qala, hər gün bir ilkə imzasını atır. 2023-cü il də bu baxımdan istisna ol­madı. 23 aprel İlham Əliyevin imzası ilə tarixə böyük və qızıl hərflərlə yazıl­dı. 2023-cü il aprelin 23-də Həkəri ça­yının üzərində Azərbaycanın “Laçın” sərhəd nəzarət-buraxılış məntəqəsi quruldu. Prezidentin özünün də de­diyi kimi, 23 aprel bizim ərazi bütöv­lüyümüzün tam bərpası deməkdir. Sentyabrın 19-20-də isə Ermənistan silahlı birləşmələrinin Qarabağdakı tör-töküntüsü 23 saat ərzində təmiz­ləndi. Amma buna qədər sarsılmaz xalq–ordu–iqtidar birliyi dünya hərb tarixinə öyrənilməli nümunə kimi ya­zılan, 44 gün davam edən möhtəşəm Zəfər yolunu qət etmişdi. 

* * * 

Biz gələcək nəsillərin öyünəcəyi bir tarixin şahidləri və iştirakçılarıyıq. İllər, on illər, əsrlər boyu bizi bölüblər, parçalayıblar, kiçildiblər. Özgələr fikrimi­zi soruşmadan, iradəmizi nəzərə alma­dan xəritəmizi çəkiblər, sərhədlərimizi cızıblar. Arazı da ikiyə ayırıblar, İrəvanı da, Zəngəzuru da param-parça ediblər.

İlham Əliyev 200 illik erməni se­paratizminin sonunu gətirdi. Haylar, eləcə də onların bölgədə və kənarda “züytutanları” Azərbaycandan aldıqları iki yüz illik dərsi, Zəfərimizi həzm edə bilməyənlər gözləri bərəlmiş vəziy­yətdə udquna-udquna qalıblar. Təkcə onlar deyil, indi bütün Avropa, dünya heyrət və təəccüb içindədir. Onla­rı ən çox heyrətləndirən Azərbaycan Prezidentinin ilk baxışda mümkün görünməyəni reallaşdırmağı bacar­maq qabiliyyətidir. İlham Əliyev bütün dünyanı təəccübləndirir, heyrətləndirir. Təkcə heyrətləndirmir, həm də Azər­baycanla hesablaşmağa məcbur edir!

Geriyə nəzər salsaq görərik ki, ötən 20 ildə Azərbaycan Ordusunun döyüş qabiliyyətinin artırılması, Silahlı Qüv­vələrin maddi-texniki bazasının möh­kəmləndirilməsi yönündə ardıcıl işlər görülüb. Bunun nəticəsidir ki, bu gün müzəffər ordumuz dünyanın ən güclü 50 ordusu sırasında yer alır. Məhz bu ordu Ali Baş Komandanının sərkərdə­liyi altında 2020-ci il sentyabrın 27-də Ermənistanın hərbi təcavüzünə cavab olaraq qurtuluş savaşını başladı və dünyanı heyrətə salan hərbi zəfərlərə imza atdı. 30 ilə yaxın müddətdə iş­ğal altında qalan torpaqlarımız 44 gün ərzində azad olundu. Qarabağın tacı, döyünən ürəyi Şuşanın işğaldan azad olunması tariximizə Zəfər Günü kimi yazıldı. İki gün sonra isə işğalçı Ermə­nistan kapitulyasiya sənədinə imza at­mağa məcbur oldu. 

* * * 

Bütün varlığıyla yurduna bağlı, təpədən-dırnağa milli və bunu təbliğ və nümayiş etdirməkdən yorulmayan Prezident İlham Əliyev də var. Cənab Prezidentin xarakterindəki bu yük­sək milli-mənəvi keyfiyyətləri, bəşəri dəyərlərə dərin sayğısı müxtəlif mə­kan və məqamlarda bütün çılpaqlığı ilə gözümüzün önündə canlanıb. Onun ölkəmizə təşrif buyuran rəsmilərlə, dip­lomatlarla, iş dünyasının və elm sahə­sinin tanınmış simaları ilə görüşlərin­də siyasi etiketlə yanaşı, sərgilədiyi saf səmimiyyəti və dərin hörməti, qo­naqpərvərliyi əcnəbiləri də heyrətlən­dirir. Bölgələrə səfərləri zamanı xalqla canlı təmaslarında, sıravi vətəndaşlar­la söhbətlərində içdən gələn təbii qay­ğıkeşliyi, çöhrəsində məmnunluğun yaratdığı ülvi təbəssüm dövlətimizin başçısına çox yaraşır. Həmin görüş­lərdə şəhid anasını, qaçqının, köçkü­nün balasını oğul təəssübkeşliyi, ata qayğısı ilə bağrına basanda qəlbimiz fəxarət hissi ilə döyünür. Çünki İlham Əliyev o məqamda əsilli-nəcabətli bir ailənin yetirməsi olmaqla yanaşı, öz xalqının dəyərli övladı statusunda gö­rünür. Bəli, o, milli olduğu qədər bəşə­ri, bizim olduğu qədər də dünyəvidir. 

* * * 

Bəzi xarici siyasi ekspertlər İlham Əliyev və Nikol Paşinyan arasında uğursuz müqayisələr aparmağa səy göstərirlər. Belə yersiz və səmərə­siz məşğuliyyətə baş vuranlara sual vermək istərdik: Məgər bacarıqsız rəqqasla peşəkar diplomatı müqayisə etmək mümkündürmü? Bu müqa­yisə qüsurlu olduğu qədər də yan­lışdır. Türk dünyasında, həmçinin beynəlxalq səviyyədə nüfuzlu siyasi liderlərdən birinə çevrilmiş Azərbay­can Prezidenti dəfələrlə milli maraqlar məsələsində kompromis tanımayan mövqedə olduğunu sübuta yetirib. Əslində, bu keyfiyyət onu digər siyasi xadimlərdən fərqləndirən xarizmatik liderlik xüsusiyyətlərindəndir. 

İlham Əliyevi başqalarından fərqləndirən digər keyfiyyətləri də var: siyasətdə sistemliliyi qorumaq, səbirli, soyuqqanlı, təmkinli davranmaq, sö­zündə və qərarlarında dəqiq olmaq. Onun atacağı addımı öncədən müəy­yənləşdirmək çətindir. Çünki o, nəyi və nə zaman edəcəyini yalnız özü bilir. O, Zəfərlə başa çatan Vətən müharibə­sində bir daha sübut etdi ki, hər şeyi zamanında və həm də doğru məcrada edir.

20 illik ağır zəhmət bahasına Prezident İlham Əliyev müstəqil Azər­baycanın yeni inkişaf mərhələsinə keçidini təmin etdi. Onu sürətlə də­yişən müasir dünyada öz imzası və sözü olan qüdrətli dövlətə çevirdi. Bu sözü bir daha təkrarlamaq istərdik: Prezidentliyinin 17-ci ilində Azərbay­canı hərb meydanında qalib dövlətə çevirən İlham Əliyev xalqımıza sözlə ifadəsi mümkün olmayan böyük qü­rur hissini yaşatdı. Əsrə bərabər 20 ilin zirvəsi, Zəfər yolunun ən böyük dayanacağı torpaqlarımızın işğaldan azad olunması, ərazi bütövlüyümüzün bərpası ilə nəticələnən Vətən müha­ribəsi oldu. Azərbaycan Respubli­kasının Prezidenti, müzəffər Ali Baş Komandan İlham Əliyevin rəhbərliyi ilə qazanılan Qarabağ zəfəri xalqımı­zın qəhrəmanlıq tarixinə qızıl hərflər­lə yazıldı. Bu zəfər Azərbaycanı qalib ölkəyə, xalqımızı qalib xalqa çevirdi. İlham Əliyev Azərbaycanın son iki əs­rdə düçar olduğu və girdabından çıxa bilmədiyi ən böyük və ən ağrılı milli problemlərindən birini həll etdi.

* * * 

Əlbəttə, Prezident, Ali Baş Komandan, qalib sərkərdə, mahir siyasətçi kimi İlham Əliyevin şah əsəri azad Qarabağ, suverenliyi və ərazi bü­tövlüyü tam təmin olunmuş Azərbay­candır. “Şuşasız Qarabağ, Qarabağ­sız Azərbaycan yoxdur” – deyən Ulu öndərin vəsiyyətinə əməl edən oğul İlham Əliyev dünyanın ən xoşbəxt qa­lib varisidir. O, Qarabağ Zəfəri ilə yal­nız Heydər Əliyevin vəsiyyətinə əməl etməyib, həm də Cümhuriyyət dövrün­dən bugünədək Azərbaycanda heç bir dövlət xadiminin yerinə yetirə bilmədi­yi vəzifənin öhdəsindən gəlib. İlham Əliyev xalqın əyilmiş qəddini dikəldib, zədələnmiş qürurunu, ləyaqətini bərpa edib.

Ötən iki onillikdə Azərbaycan xalqı həmişə öz liderinə güvəndi və inandı, ona arxa və dayaq oldu. Prezidentimiz fəxarətlə deyir ki, bu uğurların əsasın­da ölkədəki sağlam ictimai-siyasi mü­hit, sabitlik, xalqla hakimiyyətin birliyi dayanır.

İyirmi il əvvəl bu gün Azərbaycan xalqı özünün yeni prezidentini seçdi. 2003-cü il oktyabrın 31-də andiçmə mərasimində Prezident İlham Əliyev artıq tarixin arxivinə gömdüyü “Dağlıq Qarabağ” münaqişəsi barədə bunları demişdi:

“Azərbaycan heç vaxt bu vəziyyət­lə, torpaqlarının işğal altında qalması ilə barışmayacaq. Hamı bilməlidir ki, sülh tərəfdarı olmağımıza, müharibə­nin yenidən başlanmamasını və bu məsələnin sülh yolu ilə həllini istəmə­yimizə baxmayaraq, bizim səbrimiz də tükənməz deyildir. Azərbaycan öz doğma torpaqlarını nəyin bahasına olursa-olsun azad edəcək”.

İyirmi il əvvəl üçrəngli bayrağın qarşısında diz çökən, onu öpüb gözü­nün üstünə qoyan gənc milli lider dedi­yi sözün arxasında durdu, vədinə əməl etdi. Bu tarixi missiyanın öhdəsindən xalqı və ordunu vəhdət halında ətra­fında cəm edərək, “dəmir yumruğ”unu başının üstünə qaldıraraq, özünün de­diyi kimi, iradənin, cəsarətin və özünə inamın hesabına gəldi.

Azərbaycanın Zəfər yolu davam edir. Bu yolun baş memarı İlham Əliyevin hələ neçə-neçə zəfərlərə imza atacağına əminik. 

İmran BƏDİRXANLI
XQ