ABŞ Senatının Xarici əlaqələr komitəsinin sədri, senator Ben Kardin çərşənbə günü “Reuters” agentliyinin müxbirinə müsahibəsində xalqımızın və ölkəmizin ünvanına qərəzli və qalmaqallı fikirlər səsləndirib. Yenicə komitə sədri seçilən senator Qarabağdakı son proseslərdən danışarkən deyib ki, Birləşmiş Ştatlar Azərbaycana təhlükəsizlik yardımını dayandırmalıdır.

Demokratlar partiyasını təmsil edən siyasətçi bu məsələ ilə bağlı bəyanatın­da sonra bildirib ki, guya dünya Azər­baycanın əli ilə koordinasiya edilmiş, məqsədyönlü etnik təmizləmə ilə üz­ləşməkdə davam edərkən, Birləşmiş Ştatlar həm məcburi köçkün ermənilə­ri dəstəkləməyə, həm də Azərbaycanı “məsuliyyətə cəlb etməyə” üstünlük verməlidir. 

ABŞ senatorunun bəyanatı heç bir beynəlxalq hüquq normalarına sığmır. Ona görə ki, Azərbaycan dövləti bu il sentyabrın 19-da Qarabağda öz suve­ren hüquqlarını bərpa etmək üçün lokal xarakterli antiterror tədbirləri keçirib. Bu zaman dinc əhaliyə heç bir fiziki təzyiq göstərilməyib, onlara maddi və mənəvi zərər vurulmayıb. 

Üstəlik, sərhədlərimizi tərk edən hər bir erməni ailəsinə Azərbaycanda qala­caqları halda normal yaşamaları üçün hər cür şəraitin yaradılacağı vəd edilib. Bütün bunlar ölkəmizin Dövlət Sərhəd Xidməti əməkdaşları tərəfindən lentə alınıb və internetdə “Youtube” kanalı vasitəsilə fasiləsiz olaraq yayımlanıb. 

Bütün dünya Azərbaycan dövlətinin Qarabağda ermənilərlə olduqca sivil və mədəni şəkildə davrandığının fərqin­dədir. Lakin amerikalı senatorun bütün bunlardan guya xəbəri yoxdur. Siyasət­çi onu da bilməmiş deyil ki, 1988-ci ilin qarlı-sazaqlı qış günlərində 200 min­dən çox soydaşımız Ermənistandakı ata-baba yurdlarından zorla qovulub­lar. Onların çoxu bu zaman ağır zora­kılıq və məhrumiyyətlərə məruz qalıb. 

Senator Ben Kardin, nədənsə əsl həqiqəti görmək istəmir. “ABŞ Azər­baycanın əlavə ərazi iddialarının olma­ması üçün təxribatçı ritorikanı pisləmək də daxil olmaqla, addımlar atmalıdır”, --deyən Ben Kardinin Azərbaycana qarşı yanlış mövqeyi sadəcə başadü­şülən deyil. 

Senatorun sözündən belə çıxır ki, guya Azərbaycan dövləti yeni ərazi iddiasındadır. Bu, tamamilə əsassız fi­kirdir. Şübhəsiz ki, bu saxta və əsassız fikirləri dövriyyəyə erməni lobbisi bu­raxıb və amerikalı senator faktiki olaraq onların dili ilə danışır. 

Yuxarıda qeyd etdiyimiz kimi, yeni­cə ABŞ Senatında Xarici əlaqələr ko­mitəsinin sədri seçilən Ben Kardin bu vəzifədə ermənipərəst senator Robert Menendezi əvəz edib. Xatırladaq ki, bu, həmin Menendezdir ki, qızıl kül­çələr şəklində rüşvət aldığı iddia edilir. Bu günlərdə onun erməni əsilli həyat yoldaşının piyadanı vurduğu və polisin bu işi ört-basdır etdiyi də bəlli olub.

Hazırda ABŞ Federal Təhqiqatlar Bürosunun istintaqı altında olan sena­tor Menendez son günlərə qədər Azər­baycana qarşı iftiralarından əl çəkmir­di. O, ABŞ Senatında bu il sentyabrın 13-də təşkil etdiyi dinləmələrdə növbəti dəfə kəskin anti-Azərbaycan bəyanat vermiş, ölkəmizin ünvanına əsassız ittihamlar səsləndirmişdi. Lakin ilahi ədalət hər şeyi yerbəyer etdi, kimin kim olduğu bir daha bəlli oldu. 

Arzu edərdik ki, senator Ben Kardin rəhbərlik etdiyi komitədə öz sələfindən fərqli olaraq Qarabağda gedən proses­lərə daha ədalətli və qərəzsiz yanaşsın, erməni lobbisinin təsiri altına düşmə­sin. Çünki ABŞ kimi böyük bir dövlətin Cənubi Qafqazda gedən proseslərə mövqe sərgiləyərkən, ayrı-seçkiliyə yol verməyə haqqı yoxdur. 

Azərbaycanın heç bir xalqın və döv­lətin torpağında gözü yoxdur. Ölkəmiz heç vaxt etnik təmizləmə aparmayıb və niyyəti də yoxdur. Etnik təmizləməni hər zaman Ermənistan hökuməti apa­rıb. Bu monoetnik dövlətin ərazisində bir nəfər də olsun azərbaycanlı yoxdur. 

Ben Kardin müsahibədə sonda onu da bildirib ki, Türkiyə və Azərbaycan Zəngəzur dəhlizinin açılmasına çalışır. Məgər bu, pisdir?! Senator Zəngəzur dəhlizinin fəaliyyətə başlamasını alqış­lamaq əvəzinə, niyə ona qarşı çıxır? Axı, regionda yeni kommmunikasiya­ların açılması bölgəyə sülh və sabitlik gətirə bilər. Bunu hər kəs başa düşür. Deməli, okeanın o tayında Cənubi Qafqazda sabitlik və rifaha etiraz edən qüvvələr mövcuddur. Təəssüf ki, belə­dir! 

Ermənistandan fərqli olaraq Azər­baycan dövləti ölkə Konstitusiyasına və qanunlarımıza hörmət edən millətin­dən və dinindən asılı olmayaraq hər bir vətəndaşın, eləcə də ermənilərin təməl hüquqlarını qorumağa hazırdır. Bakı bölgədə sülhün və əmin-amanlığın bərqərar olunması üçün çalışır. Bunu görməmək, üstəlik, ölkəmizə böhtan­lar yağdırmaq heç bir siyasi etikaya və mənəviyyata sığmır. 

M.HACIXANLI
XQ