“Xristian klubu”nun niyyəti, əslində, dünyanı orta əsrlərə qaytarmaqdır

Azərbaycan Prezidentinin siyasi uzaqgörənliyi və mükəmməl diplomatiyası onların ağzını elə bir labirintə yönəldib ki, istənilən istiqamətə getmək istəyəndə burunları divara dəyir. Söhbət Avropadakı bəzi anti-türk və anti-Azərbaycan mövqeli siyasətçilərin atdığı addımların hamısının dalana dirənməsindən və ya ifşa olunmasından gedir. 

Bu dalanları və ifşaolunmaları Fran­sanın təşəbbüsü ilə Qarabağla bağlı çağırılan BMT Təhlükəsizlik Şurasının təcili iclasının tamamilə nəticəsiz başa çatmasında da gördük. Bədxahlarımız orada heç nəyə nail ola bilməsələr də, dünya şahid oldu ki, Fransa və Ermə­nistan BMT Təhlükəsizlik Şurasını öz­lərinin siyasi maraqlarının alətinə çe­virmək istəyindən əl çəkmirlər. Onların əl çəkib – çəkməyəcəklərinə baxmaya­raq, Paris və İrəvanın beynəlxalq icti­mai rəyi manipulyasiya etmək, bununla Azərbaycanın əleyhinə hansısa bir qə­rar və qətnamə qəbul etdirmək cəhdi bu dəfə də iflasa uğradı.

Başqa cür ola da bilməzdi. Çünki BMT Təhlükəsizlik Şurasının üzvlərinin hamısı Makron ağılda olmadıqları kimi, təcili iclasa dəvət edilənlər də İrəvan səviyyəsində deyildilər. Ona görə də, bəzi iclas iştirakçıları əvvəllər müşahidə edilməyən, lakin bizim üçün ən önəmli məsələ olan Qarabağ ermənilərinin Azər­baycana reinteqrasiya olunması prosesi­ni dəstəkləyən bəyanatla çıxış etdilər. İc­lasın Azərbaycan üçün xüsusi əhəmiyyət kəsb edən hissəsi də bu oldu. Beləliklə, Fransanın Azərbaycanın əleyhinə ça­ğırdığı iclas və müzakirələr tam əksinə, ölkəmizin reinteqrasiya ilə bağlı siyasəti­nin BMT TŞ-nın əksər ölkələri tərəfindən dəstəklənməsi ilə yekunlaşdı.

Bu məqamda xatırladaq ki, həmin ic­lasda bizim üçün önəmli olan məsələlər­dən biri də Türkiyə Xarici işlər nazirinin müavini Burak Akçaparın səsləndirdiyi arqumentlər idi. Cənab Akçapar xatırlatdı ki, Türkiyə Prezidentinin hər zaman de­diyi kimi, Ermənistan öz vədlərini yerinə yetirməli, Zəngəzur dəhlizinin açılmasını təmin etməlidir. Burada olan hər kəsin bil­diyi kimi, Qarabağ Azərbaycan ərazisidir: “Son üç ildə Ermənistan tərəfi üçtərəfli Bəyanatın icrasına əməl etməyib. Eyni zamanda, Xankəndidə olan qeyri-qanu­ni nümayəndələr öz təcrübələrini tətbiq edib. Həmçinin bu müddət ərzində Ermə­nistan Azərbaycana qarşı “mina mühari­bəsi”ni davam etdirib. Ancaq bu müddət ərzində Azərbaycan davamlı şəkildə dia­loqlara təşəbbüs göstərib”. 

Bəli, Fransanın təşəbbüsü ilə çağırı­lan bu iclasda Parisin, Berlinin və Brüs­selin nümayiş etdirdiyi mövqe sübut etdi ki, bu “üçayaqlı” siyasi dairə Nyu-Yorka birmənalı olaraq “səlib yürüşü”nə getmək ruhunda toplaşmışdı. Müasir dünyanın üzqaralığı olan “Xristian klubu”nun üzvlə­ri heç bir ölçü-biçi, mizan-tərəzi gözləmə­dən, haqlı, haqsız İslam aləminə hücum edirlər. 

Hamı üçün əlçatan olan mənbələrdən birində oxuyuruq ki, Türkiyənin Avropa Birliyinə (o zaman qurum belə adlanırdı) qəbul edilməsinə münasibət bildirən AB qurucularından biri həmin qurumu “Xris­tian klubu” adlandırmış və müsəlman ölkəyə burada yer olmadığını açıqca elan etmişdi. Ekspertlərin fikrincə, ona səmi­miyyətinə görə təşəkkür etmək lazımdır. Çünki Avropa Birliyi, həqiqətən, “Xiris­tian klubu”dur. Belə olmasaydı, Avropa Birliyinə üzv ölkələrin gözləri qarşısında, foto-video faktlarla Xocalı qətliamı baş verirsə və bunun əvəzində Avropa Birliyi azərbaycanlıların deyil, 100 il əvvələ aid, yalnız sözdə olan və arxasında əsaslı fakt dayanmayan bir hadisəni “soyqırı­mı” olaraq qəbul edirsə, bu artıq “Xristian klubu”nun təəssübkeşliyi, siyasi basqısı və iç üzüdür. Biz son otuz ildə də bunun şahidi olduq, son üç-dörd gündə də. 

Fikrimizi konkretləşdirək. BMT Təh­lükəsizlik Şurasının Makronun təşəb­büsü ilə çağırılan və anti-Azərbaycan əhval-ruhiyyəli sənəd qəbul edilməsini məqsəd kimi qarşıya qoyan iclasında Av­ropa İttifaqının Xarici işlər və təhlükəsiz­lik siyasəti üzrə ali nümayəndəsi Cozef Borrel ölkəmizin ünvanına hər cür həd­yanlarla çıxış edib. O, Azərbaycanın öz ərazisində separatçı xunta rejiminə qarşı həyata keçirdiyi əks-terror əməliyyatını şərh edərkən bildirib ki, Bakı Qarabağda­kı ermənilərin hüquq və təhlükəsizliyinə görə məsuliyyət daşıyır və əgər ermə­nilərin hərbi yollarla zorakı yerdəyişməsi­ni həyata keçirərsə, Aİ-nin ciddi reaksiya­sı ilə qarşılaşacaq. 

Bəs XXI əsrdə “səlib döyüşçüsü” li­basından və təfəkküründən əl çəkə bil­məyən həmin Borrel quldur Ermənistan rəhbərliyinin Cənubi Qafqazda törətdi­yi vəhşilikləri nə üçün görmürdü? İndi onun dayəlik etmək istədiyi separatçılar Qafqazda Xirosimanın təkrarını törə­dəndə, Xocalı şəhərini yandırıb-yaxan­da, bir milyondan çox azərbaycanlını qaçqın-köçkün kimi yurd-yuvasından didərgin salanda, Azərbaycan-türk mə­dəniyyətinə qənim kəsiləndə Borrel və “borrelkimilər nə üçün kor idilər? 

Unutmasınlar ki, “səlib yürüşləri”nin müasir dünyaya tətbiq edilməsi heç kəsə xeyir gətirməyəcək. Bugünkü Türkiyə də, Azərbaycan da, Türk dünyası da, lap elə ərəb ölkələri də artıq “səlib yürüşləri”ndən “tük salacaq” səviyyədə deyil. Azərbaycan öz ərazisində lokal antiterror əməliyyat keçirəndə hər şeyi ölçüb-biçmiş, hansısa “Xristian klubu” üzvünün qulp qoymasına imkan verməmişdir. Odur ki, aparın həmin qulpu Afrikada, Asiyada milyonlarla insa­nın qırılmasına səbəb olmuş öz dövlətlə­rinizin “əməllərinə” qoyun.

İ.QAÇAYEV
XQ