Heydər Əliyev siyasəti düşmənin ikiəsrlik miflərini dağıtdı

Əməliyyat başlanmazdan əvvəl mənim tərəfimdən bü­tün hərbi birləşmələrimizə bir daha ciddi tapşırıq verilmişdir ki, aparılan antiterror tədbirlə­ri nəticəsində Qarabağ bölgə­sində yaşayan erməni əhalisi zərbə altına düşməməlidir və mülki əhali qorunmalıdır. Biz həm yüksək dəqiqliyə malik silahlardan istifadə edərək buna nail olduq, eyni zaman­da, Silahlı Qüvvələrimizin peşəkarlığı nəticəsində mülki vətəndaşlar tamamilə özləri­ni sığortalanmış vəziyyətdə hiss etmişlər. 

Azərbaycan Prezidenti İlham Əliyevin xalqa müraciətindən

20 sentyabr 2023-cü il. 

Dünən Dövlət televiziyasında ulu öndər Heydər Əliyevin doxanıncı illərin ortalarında Kəlbəcər köçkünləri ilə görüşdəki çıxışının bəzi məqamlarını verirdilər. İlahi, insan nə qədər inamlı və uzaqgörən ola bilərmiş ki, 25-26 il əvvəl bizim son iki-üç ildə nail olduğumuz uğurlar barədə ən incə detallarınadək aydın proqnoz verə bilsin. 

Ümummilli lider dedi ki, siz Kəlbəcərə qayıdacaqsınız, ağdamlılar Ağdama, şu­şalılar Şuşaya qayıdacaqlar. Oralarda həyat qaynayacaq. Siz yenə də öz işiniz­lə, fəaliyyətinizlə məşğul olacaqsınız. 

Nə xoşdur ki, həmin proqnozların ha­mısı bu günümüzün reallıqlarıdır. Ancaq bu günümüzün reallıqları təkcə həmin proqnozların “çin olması” ilə qurtarmır. Azərbaycan Prezidentinin, xalqımızın və ordumuzun yaratdığı yeni reallıqlar sıra­sında elə siyasi, ictimai, mənəvi və psixo­loji məqamlar var ki, onlar haqqında nəin­ki 25-30 il, hətta, üç il qabaq danışsaq, kiminsə fantaziyası kimi qəbul edilərdi. 

... Qəbələ rayonundan olan təqaüdçü, torpaqlarımızın işğal edilməsindən bəri daim hamını ermənilərdən qisas almağa çağıran Telman Rəfiyev indi deyir ki, tarix boyu düşmənçilik etmək, müharibə şərai­tində yaşamaq olmaz. Danışmaq, razılaş­maq, sülh şəraitində yaşamaq lazımdır. 

Həmin ağsaqqalın bu arqumentini eşidəndə elə bildim ki, biz qalib gəlmişik deyə onun fikri dəyişib. Ancaq Rusiyanın Krasnodar diyarında yaşayan Samvel Badalyanın – yəni məğlub tərəfin təm­silçisinin – “Heç bir müharibə ömürlük olmur. Tarixən bir regionda yaşamış iki xalqın aparrdığı müharibəyə də son qo­yulmalıdır ki, sabaha inamla gedə bilək” – qənaətini eşidəndə isə düşündüm ki, artıq hər iki xalq müharibədən bezib, yorulub. Fikrimcə xalqlar müharibədən hələ on illər əvvəl yorulmuşdular. Ancaq Azərbaycanın yaratdığı reallıqlar həmin “yorğunluğun” dilə gətirilməsinə zəmin yaratdı, stimul oldu. 

2020-ci ilin payızından bəri baş verən hadisələr, əldə edilən nəticələr son iyirmi ildə “Lazım nə vaxt gələcək?” – deyə dövlətimizin səbr və təmkininə iro­niya ilə yanaşan ağzıgöyçəklərin ağızla­rını da bağladı. Onların ağzı elə bağlandı ki, ordumuz lokal antiterror əməliyyatları aparanda bu faktı dəstəkləyən siyasi par­tiyalara qoşula bilmədilər. 

Hətta, 23 saatlıq əməliyyatlardan, düşmənin ağ bayraq qaldırmasından, erməni xalqının sabahını düşünən si­yasətçilərin vəziyyətdən daha az itki ilə çıxmaq üçün Yevlaxa gəlib danışıqlarda iştirak etməsindən sonra da bəzi qaragü­ruhçular cəmiyyətə sual verirdilər ki, bəs nəticə nə oldu?

Həmin sualın cavabını o bədxahlara – Rəsul Quliyevin sözü olmasın, “bəd­baxt”lara mən verirəm: “23 saatlıq əmə­liyyatların nəticəsi odur ki, a) ermənilərin iki əsr davam edən “Böyük Ermənistan” uydurması gündəlikdən çıxarıldı, b) “Mi­atsum” xülyası gorbagor oldu, c) həyasız və şərəfsiz erməni siyasətçilərinin “yeni ərazilər üçün yeni müharibələr” çağırışı öldü, ç) işğalçıların Qarabağa verdikləri “ARTSAX” adı gömüldü, d) Laçın yolu haqqında dedikləri dəhliz ifadəsi sərhəd keçid məntəqəsi ifadəsi ilə birdəfəlik əvəzləndi və sair. 

Bundan başqa, Bakıdan Xankən­diyə ərzaq yardımı və çörək aparan yük maşınları sentyabrın 23-də paytaxtdan yola düşdü, elə həmin gün də yardımı Xankəndidəki vətəndaşlarımıza çatdıra­raq geri qayıtdı. Həm də Laçın– Xankən­di yolu ilə deyil, Ağdam – Xankəndi yolu ilə. Halbuki bir neçə həftə əvvəl Bakıdan yola düşən humanitar yardımla dolu ma­şınlarımız qəbul edilməmiş, on günlərlə yolda gözləməli olmuşdu. 

“Bəs nəticə nə oldu?” –sualını verən­lərə başqa cavablarımız da var. 

Ermənistan baş naziri 23 saatlıq əmə­liyyatlardan əvvəl dünyanın az qala bütün liderlərinə zəng edirdi ki, Laçın yolunun bağlı olduğuna görə – halbuki həmin yol­dan hər gün yüzlərlə erməni əsilli Azər­baycan vətəndaşı keçib gedir və ya gəlirdi – Qarabağda ermənilərin hüquqları pozu­lur. Sentyabrın 19-da başlanan əməliyyat­lardan sonra isə bəyan etdi ki, Qarabağda mülki obyektlərə ziyan dəyməyib və dinc sakinlər zərərdidə olmayıblar. 

Daha hansı nəticələri gözləyirdiniz? Əlavə nəticə istəyirsinizsə, Rusiyanın bu əməliyyatlara münasibətini öyrənin. Bey­nəlxalq aləmdə bu faktın necə qiymətlən­dirildiyinin göstəricisi olan məlumatlarla maraqlanın. 

Mühüm nəticələrdən biri də odur ki, dövlət başçımız Qarabağla bağlı İşçi qrupun yaradılması haqqında tapşırıq verdi. Belə ki, dövlət başçısının tapşırığı ilə Qarabağ bölgəsində sosial, humani­tar, iqtisadi və infrastruktur məsələləri­nin həlli məqsədilə Baş nazirin müavini Şahin Mustafayevin rəhbərliyi altında İşçi qrup yaradılıb. Bu qrup Azərbaycan Respublikasının işğaldan azad edilmiş ərazilərində məsələlərin mərkəzləşdiril­miş qaydada həlli ilə bağlı Əlaqələndirmə Qərargahı çərçivəsində fəaliyyət göstə­rir. İqtisadiyyat, Əmək və Əhalinin So­sial Müdafiəsi, Kənd Təsərrüfatı, Daxili İşlər, Səhiyyə, Elm və Təhsil nazirlikləri, “Azərenerji” ASC, “Azərişıq” ASC, “Azə­riqaz” İstehsalat Birliyi, Avtomobil Yolları Dövlət Agentliyi və digər aidiyyəti qu­rumlar daxil olduğu qrupun son üç-dörd gündəki fəaliyyəti sübut edir ki, regionda vəziyyət sabitləşməyə doğru gedir. 

Ancaq regionun daha sabit və fira­van günləri, şübhəsiz, qabaqdadır. Bu arqumenti əsaslandırmaq üçün indiki qeydlərimizi dövlət başçımızın sentyab­rın 20-də xalqa ünvanladığı müraciətin nikbinlik dolu abzası ilə tamamlayırıq : “Mən ümid etmək istəyirəm ki, bizim at­dığımız addımlar və antiterror tədbirləri­nin nəticələri imkan verəcək ki, nəhayət sülh danışıqları üçün olan, Ermənistan tərəfindən qoyulan, verilən, təklif olunan, necə adlandırırsınız adlandırın, maneə aradan qalxa bilər. Bu, Cənubi Qafqaz­da yeni reallıq yaradacaq, uzunmüddətli sülh yaradacaq. Biz əmin olmalıyıq ki, qarşı tərəf revanşist fikirlərlə yaşamır və onlar da əmin olmalıdırlar ki, bizim onla­rın torpağında gözümüz yoxdur. Biz on­ların ərazi bütövlüyünü tanıyırıq və bunu bəyan etmişik, bütün ölkələrin ərazi bü­tövlüyünü tanıyırıq”. 

Bütün bunlar Azərbaycanın yeni real­lıqlarıdır.

İttifaq MİRZƏBƏYLİ
XQ