Onların ehtiyat taxılı da var, turşusu da, tut arağı da
“Ağdama çatdırdığımız humanitar yükü məlum səbəblərdən Qarabağ iqtisadi rayonunda yaşayan erməni sakinlərə hələ təhvil verə bilməmişik”.
Azərbaycan Qızıl Aypara Cəmiyyətinin vitse-prezidenti Qafar Rüstəmzadənin qəzetimizə verdiyi məlumata görə, altı gündür 40 ton un rus sülhməramlılarının postunda gözləməkdədir.
Q.Rüstəmzadə 40 ton unun Qarabağ iqtisadi zonasında yaşayan erməni sakinlərə mütləq çatdırılacağını söylədi. Hazırda cəmiyyətin əməkdaşlarının və könüllülərin qurduqları çadırlarda qaldıqlarını diqqətə çatdıran vitse-prezident ərazidən bir addım belə geri çəkilməyəcəklərini dedi: “Bölgədə müvəqqəti yerləşdirilmiş Rusiya sülhməramlı kontingentinin rəhbərliyi ilə danışıqlar aparıldı, amma hələlik konkret nəticə yoxdur. Yəni o tərəfdən bizə nə “hə” deyiblər, nə də “yox”.
Vitse-prezident Qafar Rüstəmzadə onu da əlavə etdi ki, Qarabağ ermənilərinin aclıqdan əziyyət çəkdikləri barədə deyilənlər kökündən yalan və dezinformasiyadır: “Təkcə Ağdərə rayonunun məhsuldar torpağında yetişdirilən taxıl, kartof, tərəvəz məhsulları onlara illərlə bəs edər. Ermənilərin özlərinə yaylıq, qışlıq ehtiyat azuqə toplamaqda nə qədər usta oldurlarını isə hamımız çox yaxşı bilirik. Onların hər mövsüm üçün ehtiyat taxılı da, tərəvəzi də, turşusu da yetərincədir. Sadəcə “humanitar böhran”, “aclıq” kimi ideoloji şoulardan Azərbaycana siyasi təzyiq forması kimi istifadə etməyə çalışırlar. Amma bunların hamısı boş cəhdlərdir”.
Xatırladaq ki, avqustun 29-da Azərbaycan Qızıl Aypara Cəmiyyəti tərəfindən Qarabağda yaşayan erməni əsilli sakinlər üçün 40 ton un göndərilib. Yük maşınları Rusiya sülhməramlılarının nəzarət etdiyi Ağdam–Xankəndi yolundakı postunda gözləyir. Yardımın Xankəndiyə çatdırılmasına şərait yaradılması üçün Rusiya sülhməramlı kontingentinin komandanlığı ilə cəmiyyətin yetkililəri arasında razılıq əldə olunsa da, erməni separatçıları Əskəran yolunda barrikada quraraq buna imkan vermirlər.
İ.HƏSƏNQALA, XQ