Azərbaycan–Ermənistan sərhədindəki gərginlik və hərbi qarşıdurma fonunda regondakı gələcək siyasi konfiqurasiyalar mövzusunda müxtəlif baxışlar meydana çıxmaqdadır. Əlbəttə, İrəvanın siyasi dairələri gərginliyə görə Bakını günahlandırırlar. Halbuki, təxribatı törədən Ermənistandır. Bəs, ölkə nə üçün bunda maraqlıdır?
Mövcud xüsusda müxtəlif versiyalar irəli sürmək mümkündür ki, bunlardan birinin məğzində Türkiyə amili dayanır. Ermənistanın siyasi gündəmi atəşkəsin pozulmasına görə Türkiyə Prezidenti Rəcəb Tayyib Ərdoğanın Bakıya səfərinə fokuslanır. Daha doğrusu, erməni siyasilər həm Ərdoğanın paytaxtımızda səsləndirdiyi fikirlərin üzərində dayanırlar, həm də özlərinin məlum səfərlə əlaqədar konspriativ düşüncələrini işə salırlar. Yekunda belə təsəvvür formalaşdırırlar ki, sanki, Türkiyə lideri gəldi və indiyədək gedən prosesləri alt-üst etdi, yeni reallıq formalaşdırdı. Azərbaycan isə guya sərhəddə toqquşmalar yaratmaqla, həmin yeni situasiyaya adekvat davranış ortaya qoymaqdadır.
Yeri gəlmişkən, qeyd edək ki, cənab Ərdoğan ölkəmizdəki bəyanatlarında xüsusən Zəngəzur dəhlizinin açılmasının vacibliyi üzərində dayanmış, dəhlizin ölkəsi və ümumilikdə Türk dünyasını üçün əhəmiyyətini dilə gətirmişdi. Təbii ki, Türkiyə lideri Şuşa Bəyannaməsinin işləkliliyini qabardıb, bunun Ermənistana və havadarlarına mesaj anlamını da vurğulamışdı.
Bəli, Ermənistan, necə deyərlər, qabaqdangəlmişlik edir. Ölkə sərhəddə təxribat törətməklə, öz aləmində Cənubi Qafqazda Türkiyə faktorunu önə çəkir ki, bölgədə maraqlı olan digər qüvvələrdə qıcıq yaransın. Təxminən belə: baxın, Ərdoğan gəldi, hər şeyi qarışdırdı. İrəvan həmin qüvvələrin hərəkətə keçəcəyinə siyasi sərmayə yatırır və beləliklə hazırda özü üçün məqbul olmayan reallıqları dəyişəcəyinə ümid bəsləyir. Böyük ölçüdə yanaşsaq, sərhəddəki təxribatın məqsədi məhz budur.
Yeri gəlmişkən, onu da diqqətə çatdıraq ki, hələ atəşkəsdən əvvəl Ermənistan mediası və siyasiləri Azərbaycanın və Ermənistanın xarici işlər nazirləri Ceyhun Bayramov və Ararat Mirzoyanın iyunun 12-də Vaşniqtondakı görüşünün Ərdoğanın səfərinə görə təxirə salınması məsələsinə toxunarkən, mövcud məqamı Bakının sülh danışıqlarından çıxması kimi qələmə verirdilər. Türkiyə Prezidenti Bakıya gəlib-getdikdən sonra atəşkəs pozuldu. Demək, Ermənistan təxribat törətməklə, əvvəldə uydurduğu mülahizəyə məntiqi qanunauyğunluq libası geyindirdi.
İndi isə Ermənistan mediası qarşısına qoyduğu “məqsədi” regionun ictimai rəyində möhkəmləndirmək üçün hərəkətə keçib. Ölkənin müxtəlif politoloqları, belə demək mümkünsə, “Türkiyə və təxribat” ritorikasını inkişaf etdirməyə girişiblər. Mövcud istiqamətdə erməni ictimai rəyinə ən böyük dəstək, gözlənildiyi kimi, Rusiyadan gəlməkdədir. Bu baxımdan, Rusiyadakı Yaxın Şərq İnstitutunun rəhbəri, əvvəllər də anti-Azərbaycan baxışları ilə gündəmə gəlmiş Yevgeni Satanovskinin söylədiklərinə də diqqət yetirmək mümkündür.
Y.Satanovski soyadındakı şeytani mənanı işə salaraq deyir ki, Türkiyənin Cənubi Qafqaza yanaşması dəyişməyib. Bu, Azərbaycanın Ermənistana qarşı irəli sürdüyü kifayət qədər sərt ultimatumdan da görünür: “Ərdoğan seçkidə qalib gəldi. O, Bakının ən yaxın müttəfiqidir. İkinci Qarabağ müharibəsində də qalib gələnlərdən biridir. Qarabağ və onun Ermənistana məxsusluğu mövzusu qapanıb. Bunu Paşinyan edib. Ermənilərin orada qalıb-qalmayacağı və hansı ampluada qalacağı böyük sual altındadır. Bundan başqa, Azərbaycandan, Ermənistan ərazisindən keçməklə, Naxçıvana dəhliz mövzusu açıqdır. Daha böyük sual Ermənistanın Sünik rayonunun ölkənin nəzarətində qalıb-qalmayacağı ilə bağlıdır. Paşinyan açıq şəkildə Qarabağdakı Rusiya sülhməramlılarından və Ermənistandakı Rusiya hərbi bazasından xilas olmaq istəyir. Amma bu halda o, nə üçün hesab etmir ki, Bakı və Ankara ilə növbəti toqquşmada uduzmayacaq? Bu məsələ aydın deyil".
Göründüyü kimi, müəyyən qüvvələr Türkiyənin nəinki bölgə, ümumən Ermənistan üçün təhlükə təsvirini cızmaqda maraqlıdırlar. Onların 44 günlük müharibədə Ankaranın rolunu qabartmaları erməni ictimai rəyindəki anti-türk təmayülünü körükləməyə hesablanıb. Satanovski də bunu etməyə çalışanlardandır. Elə isə onun aşağıdakı fikirlərindəki Ermənistan dövlətçiliyinin iflası məntiqinə diqqət yetirək. “Ermənistan–Türkiyə münasibətlərinin normallaşması prosesinə gəlincə, hər şey hansı normallaşmadan danışmağımızdan asılıdır. Əgər Ermənistan bu gün Ərdoğanın inşa ermək istədiyi gələcək Osmanlı limanının periferik əyalətlərindən birinə çevrilərsə, o zaman normallaşma mümkündür”, – deyən rusiyalı politoloq əlavə edib ki, Ermənistanı daha hansı aqibətin gözlədiyini başa düşməkdə çətinlik çəkir və indiki halda Paşinyanın sırf Qərbə yönəlməsi ölkə üçün müsbət perspektiv vəd etmir. Deməli, Stanovski Türkiyəyə fokuslanmaqla, nəzərləri həm də Qərbə yönəldir.
Ümumən, belə bir nəticəyə gəlmək mümkündür ki, Ermənistandakı revanşist dairələr Ankaranın, belə demək mümkünsə, hərbə-zorba gələn tərəf kimi təqdimatını aparmaqla, onu həm də Bakı–İrəvan tənzimləməsinin Qərb formatının pozucusu kimi göstərməyə çalışırlar. Deməli, Ərdoğanın Azərbaycana səfəri müstəvisində qurulmuş siyasi oyun son dərəcə incə mahiyyətə malikdir.
Oyunun məqsədi həm Qərbi, həm də Cənubi Qafqazda bilavasitə maraqlı olan Rusiyanı Türiyəyə qarşı qaldırmaqdır. Erməni siyasi istebleşmenti hər iki cinah üçün müstəqil siyasət yürüdən Ankaranın yolverilməzliyini anlayır. Diqqət yetirin, Satanovski Türkiyənin Osmanlı dövlətinin mirasına sahiblik ritorikasını qabardır. Bir növ, dünyanın yadına Osmanlı zamanını salır. Heç şübhəsiz, bu yanaşma 44 günlük müharibədən sonra Cənubi Qafqazda formalaşmış yeni siyasi düzəni öz xeyrinə çevirməyə çalışan İrəvan üçün müstəsna önəm daşımaqdadır. Satanovskilər ona bu anlamda lazımdır, baxmayaraq ki, belə şəxslərin yalnız Rusiyanın maraqlarını ifadə etdikləri, İrəvanı yenidən Moskvanın orbitinə qaytarmaq istiqamətində ideoloji səylər göstərdikləri yaxşı məlumdur.
Bəli, Satanovski Rusiyanın marağını özünün növbəti fikirlərində də ortaya qoymaqdadır. O, Türkiyənin Cənubi Qafqaz aktivliyindən söz açarkən, bunun ABŞ-ın mənafelərinə uyğunluğunu bildirir. O ABŞ-ın ki, Rusiya ilə ziddiyyətdədir. Deməli, indiki halda ABŞ–Türkiyə ikilisinin Rusiyaya qarşı çıxdığı təsəvvürü formalaşdırılır. Belə yanaşma isə Ankara-Moskva münasibətlərinin hazırkı pozitiv axarını zədələmək niyyəti güdür. Təsadüfi deyil ki, politoloq çox açıq mətnlə Ermənistanın Paşinyanın apardığı siyasətlə Türkiyənin əyaləti olacağını vurğulayır və əlavə edir ki, Türkiyə–Ermənistan normallaşmasın bu xətti Ərdoğan üçün tam sərfəlidir.
Sonda həm atəşkəsin pozulması, həm də qeyd etdiyimiz düşüncələrin fonunda belə nəticəyə də gəlirik ki, Ermənistan hakimiyyəti Azərbaycanla danışıqlar prosesindəki müsbət dinamikanı aradan qaldırmaq, sülh müqaviləsinin bağlanmasının qarşısını almaq üçün regionumuzda baş verən bütün proseslərdən istifadə etmək “əzmindədir”. Bu isə aşkar spekulyativ yanaşmadır. Mövcud durumun hansı pesrpektiv nəticələr doğuracağını isə əlahəzrət zaman göstərəcək. Hər bir halda nəticənin Ermənistanın xeyrinə olmayacağı, əksinə ölkənin durumunu bir qədər də ağırlaşdıracağı birmənalıdır.
Ə.CAHANGİROĞLU, “Xalq qəzeti”