Baş nazir Nikol Paşinyanın Azərbaycanın ərazi bütövlüyünün tanınması ilə bağlı son vaxtlar səsləndirdiyi fikirlər Ermənistan daxilində və Qarabağ iqtisadi rayonunun Rusiya sülhməramlılarının müvəqqəti məsuliyyəti altında olan hissəsində yaşayan ermənilər arasında ona qarşı yeni cəbhə açılmasına səbəb olub.
Qeyd edək ki, Ermənistan Azərbaycanın ərazi bütövlüyünü ilk dəfə 2022-ci il oktyabrın 6-da Praqada və oktyabrın 31-də Soçidə keçirilmiş görüşlərdə 1991-ci ildə imzalanmış Alma-Ata Bəyannaməsi əsasında tanıdığını bəyan edib. Bu bəyannamə ilə yeni müstəqillik qazanmış ölkələr SSRİ dövründə mövcud olmuş müttəfiq respublikaların inzibati sərhədlərini tanıyırlar. Beləliklə, Praqa və Soçi sənədləri ilə Hayastan Azərbaycanın Qarabağ üzərində suverenliyi ilə qəbullanıb.
Bu il aprelin 18-də parlamentdə çıxış edən N.Paşinyan ölkəsinin Azərbaycanın ərazi bütövlüyünü tam tanıdığını bir daha bildirib: “Ermənistan 29,8 min kvadratkilometr sahədə tanınır və heç bir başqa ölkəyə ərazi iddiası yoxdur. Ermənistan və Azərbaycan arasında sülh sazişi o zaman reallaşacaq ki, iki ölkə birmənalı şəkildə, qeyri-müəyyənliklər və tələblər olmadan bir-birinin ərazi bütövlüyünü tanıyacaq və bir-birinə heç vaxt ərazi iddiası irəli sürməyəcək. Mən bir daha təsdiq edirəm ki, biz Azərbaycanın ərazi bütövlüyünü tam şəkildə tanıyırıq və gözləyirik ki, Azərbaycan da Ermənistan SSR-in bütün ərazisini Ermənistan Respublikası kimi tanımaqla eyni şeyi edəcək”.
N.Paşinyan mayın 4-də Çexiyaya rəsmi səfəri zamanı Praqada Transatlantik Əlaqələr Mərkəzində çıxışı zamanı da bu fikrini təkrarlayıb. On gün sonra – mayın 14-də Brüsseldə Prezident İlham Əliyev, N.Paşinyan və Avropa İttifaqı Şurasının rəhbəri arasında keçirilmiş görüşün yekunlarına dair mətbuata açıqlama verən Şarl Mişel deyib: “Liderlər 1991-ci ilin Alma-Ata Bəyannaməsinə və Ermənistanın 29,8 min kvadratkilometr və Azərbaycanın 86,6 min kvadratkilometr ərazisinin toxunulmazlığına birmənalı sadiqliklərini təsdiq etdilər”.
Nəhayət, son olaraq mayın 17-də Avropa Şurasının İslandiyanın paytaxtı Reykyavik şəhərində keçirilən dördüncü sammitində çıxışı zamanı N.Paşinyan Ermənistanın Azərbaycanın ərazi bütövlüyünü tanıdığını bildirib: “Üç gün əvvəl Aİ Şurasının rəhbəri Şarl Mişelin vasitəçiliyi ilə biz irəliyə doğru addım atdıq və vurğuladıq ki, Ermənistan Azərbaycanın 86,6 min kvadratkilometr, Azərbaycan isə Ermənistanın 29,8 min kvadratkilometr ərazisini tanıyır. SSRİ tərkibindəki Sovet Azərbaycanı ilə Sovet Ermənistanı arasındakı inzibati hüdudlar dövlət sərhədlərinə çevrilir”.
Bütün bu fikirlər qeyd etdiyimiz kimi, Hayastan daxilində və Qarabağ erməniləri arasında Paşinyan əleyhinə etirazların baş qaldırmasına səbəb olub. Xüsusilə, separatçıların mövqeyi onların N.Paşinyanın fikirlərini yaxına buraxmaq istəmədiklərini nümayiş etdirir. Mayın 15-də Xankəndidə Samvel Babayana “dövlət naziri” vəzifəsinin verilməsi tələbi ilə mitinq keçirilib. Qeyd edək ki, o, vaxtilə Qarabağdakı separatçı rejimin “təhlükəsizlik şurası”nın katibi olub. S.Babayan mitinqdə deyib ki, ona vəzifə lazım deyil və əgər müşahidəçi kimi kənardan baxsalar, “qaçqın” düşə bilərlər: “Bugünlərdə Brüsseldə dedilər ki, Qarabağ da daxil olmaqla, Azərbaycanın 86,6 min kvadratkilometr ərazisi var. Ermənistan etiraf edir ki, bu, Azərbaycan ərazisidir və bu, onun hüququdur”. Babayan deyib ki, bu gün Qarabağda çoxları özlərini xilaskar kimi göstərir və sonadək mübarizə aparmağa çağırırlar, amma bu əbəsdir: “Bizə heç bir mübarizə lazım deyil. Biz yaşamalı, yaratmalı və müdafiə olunmalıyıq. Bu, bizim gələcəyimizdir və bu yolla getməliyik”.
Qondarma rejimin keçmiş “dövlət naziri”, Azərbaycanın tələbi ilə bu “vəzifə”dən uzaqlaşdırılmış, hazırda “Artsaxın təhlükəsizlik və inkişaf cəbhəsi” adlanan qondarma qurumun koordinatoru Ruben Vardanyan da dilə gəlib. O, mayın 18-də keçirdiyi mətbuat konfransında bildirib ki, “Artsaxın gələcəyi başqalarının deyil, bizim əlimizdədir, Artsaxın gələcəyini biz həll edirik”. Vardanyanın sözlərinə görə, “Artsax xalqı öz vətənlərini sona qədər müdafiə etməyə yüz faiz hazırdır”.
Bu arada dünən Ermənistanın və Qarabağın 30-dan çox “siyasi qüvvəsi” birgə bəyanatla çıxış edərək bildirib ki, hazırkı geosiyasi şəraitdə təzyiq və təhdid altında Ermənistan-Azərbaycan danışıqlarının süni şəkildə sürətləndirilməsi erməni xalqının maraqlarına uyğun deyil. Qeyd olunur ki, Brüsseldə keçirilən görüşün yekunlarına dair açıqlama, həmçinin N.Paşinyanın Reykyavikdə səsləndirdiyi yanaşmalar erməni xalqının dərin narahatlığına səbəb olub: “Nikol Paşinyan Ermənistan-Azərbaycan münasibətlərinin nizamlanması ilə bağlı belə razılaşmalar əldə etmək və vədlər vermək səlahiyyətinə malik deyil. Delimitasiya və demarkasiya prosesləri Birinci Qarabağ müharibəsi nəticəsində baş vermiş qarşılıqlı de-anklavasiyanı düzəltməli və anklavlara qayıdışı istisna etməlidir. Bu müddəalara zidd olan hər hansı danışıqların nəticəsi qəbuledilməzdir və dünya ermənilərinin maraqlarını əks etdirmir”.
Ermənistan və Qarabağdakı “partiyaların” Paşinyan əleyhinə yaydığı birgə bəyanata ölkənin ilk prezidenti Levon Ter-Petrosyanın rəhbərlik etdiyi Erməni Milli Konqresi partiyasının qoşulmadığı da diqqətdən yayınmır. Partiya bəyanata qoşulmamasını onun bir sıra bəndlərinin beynəlxalq hüquqa zidd olması ilə əlaqələndirib. Diqqətçəkən məqam Erməni Milli Konqresinin açıqlamasında Qarabağın “öz müqəddəratını təyinetmə” məsələsinə yer verilməməsidir.
Mövzu ilə bağlı “Xalq qəzeti”nin suallarını cavablandıran Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev bildirib ki, Paşinyana qarşı kampaniya öncə də var idi, indi isə güclənir: “Amma Paşinyanın Reykyavikdəki açıqlaması ürəkaçan deyil. Məncə, ermənilər taktiki gediş edirlər. Deyirlər ki, bəli, biz Azərbaycanın ərazi bütövlüyünü tanıyırıq. Amma Paşinyanın Reykyavikdəki çıxışını kim sözbəsöz oxuyubsa, görə bilər ki, onun taktikası dəyişib. Deyir ki, biz Azərbaycanın ərazi bütövlüyünü, o cümlədən Qarabağ üzərində suverenliyini tanıyırıq. Amma eyni zamanda, üçüncü dövlətlər vasitəsilə Qarabağın “müstəqilliyi”nin tanınmasına çalışacaqlar”.
F.Şəfiyev qeyd edib ki, Ermənistanın bizə qarşı Beynəlxalq Ədalət Məhkəməsində, Avropa İnsan Hüquqları Məhkəməsində iddia qaldırması da buna xidmət edir: “Azərbaycanın, guya, Qarabağda etnik təmizləmə hazırladığını da Paşinyan deyir. Ona görə də son vaxtlar Ermənistanın Azərbaycanın ərzi bütövlüyünü tanıdığı barədə fikirlər səsləndirərkən bir qədər ehtiyatlı olmaq lazımdır”.
Daxildə Paşinyana qarşı çıxan qüvvələrə gəldikdə isə mərkəz rəhbəri bunu müəyyən dərəcədə teatr adlandırıb: “Amma həqiqətən, ona qarşı çıxanlar, onu xain hesab edənlər də var. Belə insanlar diasporda daha çoxdur. Təbii ki, Rusiya faktoru da var. İstənilən halda digər siyasətçilərlə müqayisədə Paşinyanla danışıqları davam etdirmək daha münasibdir”.
Politoloq Fərhad Məmmədov qəzetimizə açıqlamasında N.Paşinyanın Azərbaycanın ərazi bütövlüyünü tanımaqla bağlı bəyanatının Ermənistanda böyük səs-küyə səbəb olduğunu bildirib. Qeyd edib ki, Paşinyan hansısa sənədə imza atsa belə, onun parlamentdə ratifikasiyası, Konstitusiya Məhkəməsindən keçməsi və qüvvəyə minməsi çətin olacaq: “Çünki Ermənistanın daxili qanunvericiliyində bir neçə sənəd var ki, həmin sənədlərdə Qarabağ ərazisi birbaşa və dolayısı ilə Ermənistan ərazisi kimi qeyd edilib. Yəni, onlar ya həmin sənədləri ləğv etməli, ya da ziddiyyət olduğu üçün Konstitusiya Məhkəməsi öz rəyini verməlidir. Bax, burada hüquqi, prosedur baxımından problemlər gözlənilir”.
Siyasi müstəviyə gəldikdə isə F.Məmmədov qeyd edib ki, yaz-yay aylarında kütləvi aksiyaların keçirilməsi üçün əlverişli şərait yaranır: “Böyük ehtimalla yaxın zamanlarda Ermənistanda kütləvi aksiyalar başlayacaq”.
Politoloq Yeganə Hacıyeva isə hesab edir ki, Ermənistanda Paşinyan tərəfindən idarə olunan və müstəqil siyasi qüvvələr var. Onun sözlərinə görə, təkcə Paşinyan üçün deyil, ondan sonra Ermənistanda siyasi hakimiyyətə gələcək istənilən qüvvə üçün Azərbaycanla uzlaşma vacibdir: “Paşinyan artıq sənəd üzərində Azərbaycanın ərazi bütövlüyünü tanıyıb. Burada bir də Rusiya faktoru var. Hazırda Rusiyanın Ermənistan cəmiyyətinə təsir vasitələri əvvəlki kimi deyil. Cəmiyyətin üzünü Qərbə, yaxud Yaxın Şərqə, İrana çevirməsi əsas deyil. Əsas odur ki, Rusiyanın Ermənistanda əvvəlkitək güclü təsir vasitəsi yoxdur. Bundan sonra proses sülh sazişinin imzalanmasınadək davam edəcək. Əgər vəziyyət xeyli dərəcədə gərginləşsə, Paşinyan təkrar seçkilərə gedəcək və situasiyanı 2021-ci ildə olduğu kimi, təkrar seçkilər vasitəsilə öz xeyrinə dəyişməyə çalışacaq”.
Səxavət HƏMİD, “Xalq qəzeti”